«Cuant che o soi jentrât tal sît de Patrie par metii man, mi à someât di jessi jentrât te tombe di Tutankamon» cussì nus à dite Fulvio Romanin il titolâr de Ensoul, la web agency che nus à fat sù chel gnûf.
Eh sì, il sît de Patrie al jere un tic vecjut, fat al è che al funzionave ancjemò, duncje la impostazion che i vevin dât e veve di jessi buine. Se ancje lis piramidis a son ancjemò in pîts, al vûl dî che cuant che si fasin lis robis cun cjâf, a durin. Fintremai intun mont che al viaze svelt e li che lis robis a cambiin dispès come chel di internet. Dut câs, al jere rivât il moment di passâ a alc di plui complet e al pas cui timps, e cussì o vin cjapade la grande decision di fâ un gnûf “lûc internet”.
◆ ALC DI COMPAGN, TANT DI GNÛF Come che o podês viodi, nus pâs che al vedi une biele grafiche e un aspiet plui moderni. Chel che al è restât compagn e je la sô funzion di archivi, cun ducj i articui vignûts fûr di cuant che al è stât metût sù, e che anzit o vin intenzion di incressi, metint planc plancut ancje i numars dai agns passâts, comprendûts chei plui storics a partî dal 1946.
Altre robe restade compagne e je la publicazion di ducj i articui che e vegnin fûr su la cjarte ogni mês. A saran disponibii doi mês dopo de publicazion su cjarte, parcè che o vin simpri il balin di favorî i nestris abonâts, che a son chei che nus dan une man fondamentâl a menâ indevant la barache. Però in plui di cheste solite impostazion, il sît al varà ancje alc che al sarà plui di atualitât, cuntune sezion li che o informarìn su lis iniziativis che o inmaneìn: la rubriche «Apontaments». Cun di plui, in paralêl al “flus” di articui vignûts fûr sul mensîl, si podaran lei articui scrits “dal moment” par stâ daûr ancje ae atualitât.
Un spazi impuartant che al è stât zontât al è chel dai anunziis publicitaris, cun cuatri banners li che lis aziendis si puedin fâ viodi sul nestri sît. Se o vês une imprese che e à chê di fâsi cognossi fra i nestris letôrs, fasêtsi indevant scrivint a info@lapatriedalfriul.org, che us fasarìn un bon presit.
◆ RUBRICHIS E SEZIONS Cun di plui, par viazâ miôr tai contignûts che o produsìn, o vin previodût sezions cu lis rubrichis plui impuartantis, chês di cumò e chês passadis. O vin ancje une sezion li che o segnalìn links impuartants di altris, par mostrâ a ducj e valorizâ l’“internet furlan” (mandait pur segnalazions). O vin ancje une sezion li che si mostrin lis nestris publicazions, cu lis indicazions par cuistâlis. Nol mancje il solit spazi dulà che si spieghe cemût abonâsi e une descrizion di “cui che o sin”, afidade aes peraulis di pre Toni Beline.
◆ SUL CELULÂR Par ultin, ma fra lis robis che a son di marcâ di plui, al è di dî che dut chest grum di biele robe e je ancje in version mobile. Ven a stâi che si viôt dut ben ancje sul telefonut, cuntune impostazion fate di pueste. La plui part dal trafic di internet al viaze sui celulârs, e cumò La Patrie dal Friûl e pues rispuindi ad implen ancje a cheste esigjence.
Duncje, par finî, o ringracii Fulvio Romanin e i siei colaboradôrs de Ensoul pal grant lavôr fat, Pieri Zanini, il nestri art director dal gjornâl par vê lavorât cun me al progjet gnûf, e dute la redazion pai sugjeriments e pes corezions. Cumò no mi reste che invidâus a gjoldilu, cul computer o cul celulâr. Buine leture. ❚