Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano?
◆ A partî de fin di Jugn al è rivât tes ediculis dal Friûl il secont album di colorâ dai Gnognosaurs, i simpatics dinosauruts dordei che a fevelin par furlan. Chest secont numar al è continue la prime aventure che e à concuistât grancj e piçui dilunc des fiestis di Nadâl.
Intitulât «Tal blu piturât di blu», al è publicât simpri di La Vita Cattolica, il setemanâl de Diocesi di Udin. Come tal prin album, lis pagjinis di colorâ no son dome dissens par cont lôr: dutis adun a componin une storie complete, deventant un fumet di piturâ di bessôi, pagjine dopo pagjine.
I protagoniscj di cheste seconde aventure a son il professôr Einsaur, sienziât strambalât dal Jurassic, e il so fidât assistent Blik. Cjalant il svol dai pterodatii, i doi a decidin di imitâju e si butin intune imprese dute di ridi e di colorâ. L’album al è completât di zûcs, quiz e ativitâts pensadis par un Istât di divertiment, sot dal segn de creativitât e de lenghe furlane.
I pterodatii a deventin ancje l’argoment de pagjine “educational”, presinte in ogni album. Cheste volte i fruts a podaran scuvierzi il Preondatil (Preondactylus buffarinii), il retil svolant che al viveve cirche 228 milions di agns indaûr, che al è stât cjatât tal comun di Preon. Calcolât un dai plui antîcs mai scuvierzûts, al è un vêr tesaur paleontologjic locâl: un mût par fâ sintî i piçui letôrs braurôs dal teritori dulà che a vivin.
«Tal blu piturât di blu» al è disponibil tes ediculis dal Friûl e si pues comprâlu ancje online sul sît de La Vita Cattolica: lavitacattolica.it. ❚
