Daûr un grup zovin che al à a cûr la lenghe furlane
Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf (www.sborf.io), il zûc enigmistic di peraulis par furlan in linie che in pôcs mês al à cjapât dentri miârs di personis.
Daûr dal progjet e je une scuadre zovine: un grup di amîs tra i 26 e i 30 agns cressûts in Friûl, che al à metût a disposizion competencis diviersis par une idee comune, ven a stâi judâ il furlan: Marco Bianco, programadôr e ideadôr; Daniela Chen, grafiche; Aurora Paternò, responsabile dal progjet; Karmen Gorjanac, puartevôs e colaboradore. Intal timp libar a lavorin sul progjet, che a àn imbastît di zero, cence jutoris istituzionâi. «Ognidun di nô al à un rûl ben definît: al è cui che al cure la grafiche, cui il disvilup, cui i contignûts e la comunicazion», a contin i cuatri zovins, che a zontin: «O vin di dîi graciis al lessicograf e linguist Sandri Carrozzo che nus sosten e nus jude fin dal imprin, e a amîs e fameis che a àn provât il zûc prime di rindilu public».
Un zûc par dutis lis etâts
Sborf al nas di une intuizion dal programadôr Marco Bianco. Intant che al zuiave a Wordle, un dai zûcs in linie plui popolârs dal New York Times, si è domandât parcè che nol esistès un compagn par furlan. Di chê domande e je partide la idee che e inviât il progjet.
Sborf al è un zûc linguistic, a gratis, par ducj: adults, fruts, cui che al fevele furlan e cui che al vûl svicinâsi ae lenghe in mût lizêr e interatîf.
La muse dal zûc e je il sborf – la lisierte plui biele che e vîf di chestis bandis – e nol è stât sielt a câs: «Al funzione ben dal pont di viste grafic e al lee il nestri progjet a cheste tiere», a sclarissin Marco, Daniela, Aurora e Karmen.
Cemût si zuie?
Il zûc al consist intal induvinâ une peraule par furlan intun massim di sîs provis; i nivei di dificoltât a son diviers. L’algoritmi al marche se intes peraulis proponudis a son lis letaris justis, se a son inte posizion sbaliade o se no son propit. Ogni letare induvinade inte posizion juste si colore di vert; ogni letare presinte inte peraule segrete, ma inte posizion falade si colore di zâl; la letare che si cjate inte posizion corete, ma che e je presinte ancje intune altre posizion, si colore di blu; ogni letare che no je te soluzion e devente grise scure.bg
Cressint il grât di dificoltât, la sfide enigmistiche e devente simpri plui vivarose.
Lis definizions e lis traduzions a son citazions dai dizionaris in linie che a son sui sîts dizionarifurlan.eu e lenghefurlane.eu
Un sucès in pôcs mês
Sborf al è daûr a regjistrâ numars sorprendents e un entusiasim che al cres. Passe 4 mil personis a àn risolt almancul un nivel e ogni dì plui o mancul 400 utents si metin ae prove, 300 di lôr si misurin cu la “sfide dal dì”: la funzion plui preseade. «E je la part che nus da plui sodisfazion».
Dai proverbis al libri
Dilunc dal disvilup di Sborf, i autôrs si son intopâts intune vore di proverbis furlans. Cussì ur è vignude la idee di metiju dongje e condividiju ogni dì su Instagram. La pagjine @proverbis.furlans e je cressude di corse: le seguissin passe 13 mil personis. Al è nassût un sît dedicât (www.proverbisfurlans.com), une rubriche dulà che i utents a mandin vie i lôr proverbis preferîts e, tal ultin, un libri: “Timp, Vite e Sintiment” che al da dongje i 100 proverbis furlans plui biei, cu la spiegazion e la traduzion par talian.
«O vin metût adun passe 4 mil proverbis, ducj selezionâts e verificâts».
Di là dal libri – disponibil su Amazon.it –, a son ancje tacis, borsis, maiutis e altris articui, si ju cjate su: gadgets.proverbisfurlans.com
Ideis gnovis
La scuadre di Sborf e je daûr a lavorâ ae modalitât multiplayer dal zûc che e permetarà di sfidâ i amîs in timp reâl.
Cun di plui, in curt, e rivarà une gnove app che e permetarà di consultâ in maniere svelte i contignûts dai sîts dizionarifurlan.eu e lenghefurlane.eu
Tecnologjie e social par svicinâsi ai zovins
Pal grup di Sborf sostignî il furlan al è une sielte naturâl. «La lenghe furlane e je un patrimoni identitari. Cui nestris progjets si impegnìn ogni dì a promovile, di mût che e sedi cognossude, fevelade, passade. Magari cussì no o viodìn simpri mancul zovins che a fevelin par furlan. De bande nestre, o cirìn di creâ un puint tra lenghe e tradizion e gnovis gjenerazions».
Tecnologjie e social, a spieghin, a son imprescj decisîfs: «Par mantignî vive une lenghe bisugne fâle jentrâ inte vite di ogni dì in maniere naturâl, divertente, apassionante cun struments modernis e lengaçs dongje aes fantatis e ai fantats».
Cui che al vûl savênt di plui e pues scrivi un messaç su la pagjine Instagram @sborf.io o une mail a: mandi@sborf.io ❚
