Lis fameis a àn dite di sì, ma si pues fâ ancjemò miôr

Lis tabelis che a son sot a fevelin plui clâr di ogni articul, ma ancje i numars a àn un valôr se si rive a comparâju fra di lôr e – soredut – se metûts dongje, a rivin a fâ clarece.
Prime di dut, nus disin une robe: che ancje pal prossim an al sarà plui o mancul compagn il numar dai frutins che a podaran vê il furlan in classe. Plui o mancul nol è un criteri sientific, ma cemût che o podarês lei tal articul di analisi dal di dentri de istituzions scolastichis, e je voltade ancje la struture de scuele in Regjon.
Dut câs, a saran in dut 43.218 su 68.432 i arlêfs che a àn dite di sì ae propueste dal insegnament de marilenghe. In cheste cifre a son dentri sedi i students de scuele publiche che chei des parificadis.
Se tal prin câs la percentuâl e rive al 61%, tal secont e tocje il 73%, puartant chê complessive al 67%.
O viodês duncje la impuartance de paritarie tal tirâ sù la percentuâl, ma e je facile di capî: chê paritarie e vûl dî soredut scuele de infanzie, dulà che si regjistre ancje il nivel plui alt di adesions (il 76% te publiche, l’82% in chê privade).
I nivei plui alts a son inte provincie di Udin: 88% pe publiche e 86% pe privade. E une osservazion e va fate: la diference tra lis dôs percentuâls e je picinine, a dimostrazion che e je une uniformitât di consens pal insegnament ai plui piçui. Al vûl dì tantis robis, no simpri positivis ancje se al somearès di no, ma lait a lei ancje in chest câs l’articul dongje.
Tornìn par un moment ae difusion teritoriâl des adesions. Al prin puest a son lis scuelis de provincie di Udin (71%), po dopo Gurize (42%), e da pît Pordenon (35%). Compagn pe paritarie, ma chi a mancjin i numars di Gurize.
Prime di lâ a viodi cualchi situazion in particolâr, o vin di segnalâ un dât che nol è biel: cuant che si passe de scuele de infanzie aes primaris, la percentuâl e cale in progression: al vûl dî che se in cualchi maniere, ma no di cumò, te materne cuasi ducj a ricognossin la impuartance de lenghe, plui si va indenant tal troi scolastic, plui il ricognossiment al cole.
Un esempli al ven dal comprensîf di Sant Zorç e Tor di Zuin: 109 arlêfs su 175 (62%) te infanzie, 67 su 518 (13%) te primarie, 0 su 342 tes mediis. No dome alc nol funzione, ma di sigûr la dirigjence scolastiche di chel comprensîf no à puartât indenant in maniere juste e corete la propueste didatiche.
Ma cualchidun al fâs piês: il comprensîf di Gardiscje nol à nissune opzion nancje te infanzie, 5 tes elementârs e 17 tes mediis, cuntune percentuâl finâl dal 3%. Chi la modulistiche e la didatiche a son restadis tal casselin dal dirigjent e lis fameis che a àn dite di sì ae opzion a son di chês che no molin sui dirits.
Duncje i numars a fasin viodi ancje dulà che si lavore in maniere serie e li che lis scuelis a crodin al progjet.
A son chês che a rivin al 100% in ducj i trê grâts: Darte e Paulâr, te publiche, une vore di plui ta lis paritariis, ma chi al vâl il discors de infanzie.

Simpri tal public a van ben ancje, cun percentuâls ator dal 90% – e ancje plui – Dimpeç, Buie, Faedis, Glemone, Gonârs, Maian e Forgjarie, Mortean – Cjasteons, Tarcint, Tarvis, Trasaghis.
Debule la zone de Basse cun Lignan (26%) e Tisane (20%).
Une peraule su Udin, cjâf lûc: ancje tai cinc comprensîfs i numars pe infanzie a son te medie, un tic sot, a dî la veretât, ma dome a Udin 2, 4 e 5 a rivin dongje de medie totâl provinciâl.
E va mâl a Gurize citât, e no si rive a capî cemût mai che te scuele di Lucinins, di simpri furlane e braurose di jessilu, dome il 48% al vedi dite di sì. Piês ancjemò a Gurize 1 (19%) e 2 (15%).
La vere perle e je il comprensîf di Cormons: ae Pascoli, lis adesions totâls a rivin al 85%, cuntune distribuzion compagne in ducj i grâts de scuele. Al vûl dî che il cuarp insegnant e la dirigjence a àn lavorât in mût professionâl e cence prejudizis al progjet.
Pordenon al mostre ancjemò la muse dividude tra citât e perifarie, cun Porcie ai nivei plui bas e i paîs plui dongje al Venit che a patissin la presince dal so dialet.
Par finî, dôs situazions che nus somein une vore strambis: il comprensîf di Cjasarse e l’Uccellis di Udin. Tal prin câs, viodût che propit a Cjasarse la lenghe e la poesie furlane a àn in Pasolini une impuartance storiche, al è almancul strani che te scuele de citât si rivi dome al 25%. Alc nol va, tant che al Uccellis di Udin, une scuele che e fâs des lenghis la sô cjarte di identitât: il so 15% al è une contradizion grande tant che une cjase.
Ultimissime osservazion: no stait a crodi che chei contraris al furlan inte scuele si sedin fermâts o che a vedin intenzion di fâlu. A son simpri daûr dal cjanton, pronts a ripeti lis robis di simpri sui bêçs, sul inglês e vie indenant. La contestazion di un grup di gjenitôrs – paraltri une vore di minorance – al furlan in classe, tal comprensîf di Cormons, e je li a dimostrâlu. No a câs, propit dulà che la propueste dal furlan si cjate inseride in maniere serie, articolade tal plan didatic de scuele stesse.
Dulà che al funzione ben il furlan te scuele, al è clâr che al da ancjemò plui fastidi, parcè che e je la dimostrazion che il progjet al pues lâ indenant ancje cun dutis lis falopis dal regolament e de leç. ❚
Redazion