Sfuei Mensîl Furlan Indipendent
Archivi de Patrie

Il furlan a scuele nol pues jessi dome “cjantìn, balìn e zuìn“

............

L’an precedent al à viodût la introduzion dal furlan a scuele, cun cuote obligatorie intal curriculum di une ore setemanâl inte scuele de infanzie e primarie, intant che inte secondarie di prin grât si è lâts indevant cu la programazion di prime. Ven stâi, cuntune atenzion difondude ai aspiets storics e sociolinguistics de lenghe e de culture furlane, cun risorsis individuadis in autonomie di bande de istituzion scolastiche pes secondariis, vincoladis a une liste regjonâl pe infanzie e pe primarie.
Inte analisi al va tignût cont che par solit, intune istituzion scolastiche, la promozion di azion didatichis, sperimentâls o ancje dome diviersis dal curriculum ordenari, in insiorament POF, e je une facende dut altri che confinade ae dirigjence: e à bisugne di une grande motivazion dai docents, ancje se al sta intes definizions e intes solecitazions dal dirigjent scolastic, l’orientament.
✽✽  Lis disponibilitâts finanziariis, tant impuartantis in chest ambit, a levin impegnadis, si che duncje e jere impressindibile une azion dirigjenziâl significative. Paraltri, si à di visâsi che la analisi comparative tra iscrits di chest an scolastic e di chei precedents e varès di tignî cont dai cambiaments introdots intes istituzions scolastichis de azion di dimensionament des stessis, che al à viodût a modificâsi l’asset des scuelis.
✽✽  Dut câs, il belanç de introduzion dal furlan daûr des gnovis direzions e prescrizions regjonâls, su la fonde de normative nazionâl, al jentre inte analisi pes areis di problemis esponudis culì sot.
✽✽  La progjetazion dal intervent e je podude partî cun tant intart: lis situazions plui felicis a àn viodût l’inviament intal Zenâr dal 2013, in altris nol è stât intervent.
✽✽  La disponibilitât di risorsis formadis, dal imprin inconsistente e dal dut insuficiente (tant che a àn vût di tornâ a vierzi i tiermins par eventuâls integrazions), e à viodût la presince di risorsis docentis distribuidis a magle sul teritori, e tant dispès lis scuelis a àn lavorât cun risorsis esternis. Par chestis, al veve di jessi metût in cjamp un lavôr pazient di mediazion tra la programazion di istitût e chê dal furlan, par garantî une cierte coerence pedagogjiche dal curriculum: tant dificil, fâ chest a Març.
✽✽  O vin regjistrât compuartaments tant diformis tra lis scuelis intai aspiets aministratîfs, dulà che ciertis dirigjencis a àn ritignût di dovê tornâ a someti ae atenzion des fameis – par une eventuâl gnove firme – il modul di adesion al progjet pal an scolastic 2012/2013 dal moment che lis regulis dal zûc a jerin cambiadis in cors di opare, massime intai aspiets pedagogjics. Di fat, ciertis scuelis a àn puartade indenant la progjetazion, altris lu àn fat a magle, altris ancjemò no lu àn propit ativât.
Diviers a àn sotlineât il valôr e il significât de ore di insegnament, legjitimant la valence tant che te aree dal imparâ, ricuardant che, saldantsi ai aspiets plui “naturâi” dal imparâ, al costituive dut câs un insiorament e un contribût pussibil al sucès formatîf globâl dal arlêf.
Altris, al contrari, indi àn fevelât tant che di une sotrazion no dovude dal curriculum, chel “scolastic”. Une posizion tant debile e pardabon no competente su lis modalitâts dal imparâ in cheste fasse di scuele, ma movude su la onde di une posizion provocatorie che e je dibant.
Si obietave su la pierdite dal talian, de matematiche, ma al jere soredut l’inglês la materie plui sielte.
Grave la responsabilitât di chei operadôrs scolastics, che in plui a fevelavin dispès a une vôs, cence une delibare formâl dai orghins competents. O visìn che e je in cjâf al Coleç Docents la primazie de responsabilitât su la programazion didatiche educative di dut l’istitût, e duncje la condivision di dut il cuarp docent.
✽✽  Al risulte duncje che, in linie gjenerâl, pe scuele de infanzie, l’intervent al è “passât” tra lis maiis de burocrazie scolastiche e, cuant che si è scuintrât cun prejudizis e resistencis, al à rivât dut câs a jessi sopuartât intal cuarp de istituzion, stant che al jere percepît in sostance come no impuartant. O ben, inte scuele de infanzie “si zuie, si cjantuce, si fâs cualchi balet”, ma daûr des piês impostazions pedagogjichis, no si fâs vere scuele. E je stade veicolade ancje chi une imagjin di chest segment di scuele dramatiche, e no dome pal furlan ma ben pe tignude gjenerâl de cualitât dal intervent.
Ciert, no van dismenteadis ativitâts e progjetualitâts cetant buinis fatis in graciis dal personâl, formât, atent e competent, cemût che la scuele furlane e sa jessi. Ma al è in assolût ciert che il dât cetant positîf di adesions regjistrât inte infanzie si contrassegne par cheste dople leture, necessarie pai fins de analisi e dal cambiament inte scuele primarie. Ancje chi, dongje di esperiencis impuartantis di procès di insegnament curâts e competents, si à di visâsi di cemût che e fos tant ample la aree de percezion de pierdite dal curriculum e no de oportunitât didatiche.
E chi, e varès vût di cjapâ cuarp la azion dal dirigjent, inte azion di formazion dai docents e tal tornâ a orientâ la azion gjenerâl de ufierte formative, intal riclamâ la cualitât dal intervent, sensibilizant lis fameis, introdusint elements di clarece, ancje su la politiche scolastiche, intal cuarp docent, riclamant la responsabilitât, in condivision cui orghins competents preponûts, pe lôr rapresentance de utence e cu lis aministrazions dai paîs.
Dome a bande, ma no ultin, al va dit che a pressin liniis di direzion tant plui esplicitis su lis cundizions contratuâls dai docents specialiscj individuâts, cuant che si trate di esternis, e modalitât plui condividudis sui indicadôrs e descritôrs di valutazion dai aprendiments, tant che la valutazion su la pagjele.
✽✽  Pe scuele medie nol è cambiât nuie, o disarès che si è lâts indevant a fâ alc di difondût, in particolâr inte aree de storie e de culture furlane: i docents a son stâts ben contents di no vê di stâ sul front di une programazion estreme e di esplicitâ inte individuazion di obietîfs, strategjiis, modalitâts di valutazion.
O podaressin in sostance afermâ che o varessin vût di confrontâsi cuntune tignude a magle, e cui stes prejudizis che si à dit parsore, agravâts di une framentazion par dissiplinis de scuele secondarie che la primarie no previôt cu la stesse intensitât e cun confins dissiplinârs e di docents, tant risaltâts.
✽✽  Lis iscrizions in linie: la modulistiche ministeriâl naturalmentri no previodeve la domande de opzion dal furlan (o ricauardi che pe infanzie, invezit, lis iscrizions a jerin su cjarte), si che duncje lis scuelis a vevin di integrâ la domande, come previodût dal rest des indicazions ministeriâls. Ancje lis modalitâts grafichis sieltis a podevin jessi decisivis intal determinâ une opzion pluitost che une altre: i dâts a rifletin ancje cheste complicazion. La infanzie, al contrari, e contave suntun comportament consuet e, o disarès, consolidât.
In conclusion, o stimìn che l’impegn des scuelis a guviernâ cheste espansion curicolâr e a esponi i arlêfs a chestis esperiencis formativis, in sostance confermât, al vedi di jessi potenziât. In particolâr, pai aspiets di rilevance pedagogjiche che al presente e al conten, intune logjiche di coerence cui curricula che lis istituzions scolastichis, intal ambit de progjetazion POF, ancje in autonomie, a previodin par garantî il plen sucès formatîf dai lôr arlêfs.
No si pues rinunziâ ae cussience che il furlan nol pues jessi dome “cjantìn, balìn, zuìn” ma al rapresente une oportunitât didatiche significative, e in bande, di cressite culturâl, di disvilup dal implant di responsabilitât e impegn pal ben comun, des competencis di citadinance: aree là che la scuele e je clamade a impegnâsi.
Fâ ben il furlan a scuele nol fâs ben dome al furlan, ma al fâs ben a dute la scuele. Guviernâ chest procès di insiorament al costituìs un teren di prove par imparâ a saldâ la culture de storie di comunitât cu lis solecitazions di une culture plui ancorade ai gnûfs procès di globalizazion, segnâts di un implant informatic e de comunicazion in gjenerâl, di no podê rinunziâi: lavorâ suntune mediazion segnade in maniere pedagogjiche al vûl dî tornâ ae scuele e ai docents il compit di presidiâ il cjamp di un disvilup de personalitât che al dedi reson de complessitât e che al feveli il lengaç de inclusion. ❚
Rose Turchin

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +