VIERZIDURE – Un Friuli Doc plui furlan

Une edizion che e à savût plui di furlan. Chest al è in sostance un belanç in struc de edizion 2011 di Friuli Doc. In efiets, za des peraulis dal “santul” che al à viert la fieste, Fabio Capello si veve di intuî alc «O soi un emigrant di privilegjât, ma sot o ai simpri la maiute dal Friûl» al à dit “sir” (ma forsit al sarès miôr clamâlu “sâr”) Capello, alenadôr de nazionâl inglese di balon, «O soi partît di cheste tiere e cuant che o torni e je simpri une emozion. Cuant che o soi tal forest o soi braurôs di jessi furlan, pe nestre societât e la nestre mentalitât». Peraulis che a fasin efiet, massime parcè che ditis di un di Pieris, comun di Sant Canzian dal Lusinç, provincie di Gurize, che fevelant dal palc de inaugurazion si è ancje un pêl ingropât pe emozion.
LA PATRIE IN MUNICIPI_ Ma a cjalâ ben il program no son mancjâts i apontament che a àn vude une particolâr atenzions pe lenghe e la identitât furlane. Une vore di int e à partecipât al event di vinars ai 16 cuant che in sale Ajace “La Patrie dal Friûl” e à presentât il speciâl su la “Leture continue de Bibie par furlan” «L’event culturâl plui impuartant davuelt in Friûl tal 2011, comprindudis lis iniziativis pe celebrazion de unitât dal Stât talian» come che al à dit Dree Venier, curadôr dal speciâl e che al è stât ribadît cun plasê ancje dal President de Agjenzie regjonâl pe lenghe furlane Lorenzo Zanon. Il President de ARLeF al à ancje rivendicât un «Friûl finalmentri libar e autonim, parcè che fevelâ di politiche linguistiche pal furlan intune regjon che si clame Friûl-Vignesie Julie al significhe simpri sbassâsi a compromès cun int che no i interesse nuie de lenghe furlane». Sul scomençâ de serade, prin dai intervents di Dree Venier, pre Roman Michelot e Agnul Floramo, a àn puartât il lôr salût ancje il Sindic di Udin Furio Honsell che al à invidât ducj a no vê pôre di fevelâ furlan «O vin di deventâ ducj ambassadôrs de lenghe furlane». Al è intervignût ancje il President de provincie di Udin Pieri Fontanini «Mi à displasût no podê partecipâ in prime persone a la leture» al à dit «ma no vin di dismenteâ mai lis lidrîs, nancje a Friuli Doc, cheste e je la motivazion che o vin sielt il teme de Tiere dai Patriarcjis. O vin intindût ricuardâ cussì la ete plui biele dal popul furlan».
IL DOCUMENTARI_ Te stesse ore al vignive presentât, in prime vision, li dal cine centrâl il documentari “Udine/Udin – e i Patriarchi scendevano dal Castello”, de regjiste Giovanna Zorzenon. Prodot de “ilariavalliproduzioni”, al è stât realizât cu la presince di dialics, in contemporanie, in lenghe taliane e furlane, e lis imagjins a son relativis ai lûcs plui significatîfs a lis situazions de zornade mancul frecuetâts de citât.
UN PAS INDEVANT O DOI INDAÛR?_Inte sabide a buinore il nestri diretôr Dree Valcic al è stât clamât ancje a moderâ un incuintri su la situazion de politiche linguistiche in Friûl dulà che a son intervignûts il President de Provincie di Udin Pieri Fontanini, la prof.e Silvana Schiavi Fachin, William Cisilino (neo-diretôr de Agjenzie Regjonâl pe lenghe furlane, ndr) e l’assessôr dal comun di Udin Kristian Franzil. Intant che in sale e leve indevant la cunvigne, su la place Libertât al jere il presidi dal gnûf comitât “Furlan Nestre Lenghe Vive” che al sensibilizave sul teme i visitadôrs di Friuli Doc.
PE PROSSIME EDIZION_ A coment de edizion a pene sierade si è viert ancje un dibatit sul fat che forsit si podarès ancje pensâ di clamâlu “Friûl Doc” cul non par furlan, ma alore al ven di domandâsi ancje parcè che invezit dai balons tricolôr di chest an, no si sedi pensât pal prossim an a une decorazion che e riclami i colôrs zâl e blu de nestre bandiere, e magari, considerant che Udin chest autun al ospitarà la finâl dal Liet Festival, no si ponti di plui ancje sui events musicâi che a presentin un repertori in lenghe furlane come lis esibizions di Arbe Garbe, Ulisse e i Ciclopi, Resistence in Dub che a àn sunât ator pes placis di Friuli Doc.
Redazion