UNIVERSITÂT. Universitât dal Friûl tra lis primis par inovazion

Il leam cul teritori lu à tal dna. In fin dai fats, la Universitât dal Friûl e je nassude plui di 30 agns za fa in gracie di 125 mil firmis di furlans. Al articul 1 dal Statût si lei: “L’ateneu al contribuìs al svilup civîl, culturâl, sociâl e economic dal teritori”. Un impegn rispietât par Michele Morgante, delegât ae ricercje dal ateneu, e che, in dì di vuê, si tradûs te volontât de Universitât di jessi motôr de inovazion de regjon. Sburtant su la acuisizion di brevets e su la creazion di gnovis impresis, massime tal biomedicâl.
NASSUDE PAR INZIATIVE DAL POPUL_ “La Universitât dal Friûl e je stade istituide, uniche in Italie, par iniziative popolâr – al ricuarde Morgante, che al è ancje professôr di gjenetiche, diretôr dal Istitût di gjenomiche aplicade dal Parc sientific e tecnologjic di Udin e soci de Academie dai Linceos – e par chest si sint in debit inviers dal teritori”. Un debit che l’ateneu al paie “trasferint cognossince”. Vuê la Universitât dal Friûl “e je une dai leader in Italie tal trasferiment de cognossince che e devente imprese”. Un risultât che al ven “in gracie dal grant lavôr che e à fat la retore Cristiana Compagno, cuant che e jere delegade al trasferiment tecnologjic e che al à puartât a inmaneâ iniziativis impuartantonis tant che Start Cup e la fiere Innovaction (scancelade de Zonte Tondo, ndr)”. Chest lavôr “al à judât a instilâ une mentalitât imprenditoriâl in tancj ricercjadôrs e a convinciju a provâ a meti in pîts gnovis impresis inovativis”. In dì di vuê, la Universitât dal Friûl e à plui di une vincjine di spin-off (impresis che a nassin di altris impresis, ndr), cualchidun une vore ben inviât. Par esempli, tal setôr des biotecnologjiis, VivaBioCell al lavore tal cjamp de rigjenerazion tissutâl e “al à prodots che a stan par jentrâ sul marcjât” e Transactiva e smire a svilupâ gnovis medisinis. Cun di plui, l’ateneu di Udin al è ae avanguardie in Italie te gjestion dai brevets. “Al à un atîf impuartant te diference tra lis jentradis dai brevets e lis spesis par mantignîju e vênt di gnûfs”, al conte il delegât ae ricercje. Di tignî a ments il kiwi “Soreli”, une gnove varietât de pome a polpe zale, selezionade e brevetade de Universitât dal Friûl, difondude in dut il mont. “O vin acuardis in Italie, in Europe e un, cetant impuartant, ancje cuntune societât sudafricane”.
INOVAZION PAR CRESSI_ Nol è, però, di contentâsi. Anzit. “O vin di produsi ricercje simpri miôr, parcè che no si pues trasferî cognossince se no si le prodûs. O vin, duncje, di miorâ la cualitât de ricercje e smicjâ a trasferîle in maniere simpri plui eficace al sisteme produtîf e economic, metint in pîts gnovis impresis e interagjint cun chês che a son, robe che o fasìn za”. Chescj i impegns de Universitât. E de bande des istituzions, de politiche? Ce si spietial l’ateneu furlan? “Tancj intervents che a vegnin fats in chest setôr a lassin perplès su la lôr eficacie – al dîs Morgante –. Al coventarès, tant che al à domandât di resint ancje Sergio Cecotti, president di Friûl Inovazion, une planificazion strategjiche di mût di rivâ a instradâ i sfuarçs che a vegnin fats de bande di ducj i atôrs de inovazion – un al è l’ateneu furlan – intune direzion comune”. Une richieste di no cjapâ sot gjambe, stant che, tant che al motive Morgante, “se o vignarìn fûr de crisi, al sarà in gracie dal fat che o savìn inovâ.
CENCE? MANCUL VIVAROSITÂT_ Ce saressial stât il Friûl cence la sô Universitât? Morgante i pense un moment parsore prime di rispuindi. “Probabilmentri – al dîs – la vite culturâl e sarès stade mancul vivarose di ce che e je. Dal pont di viste economic, dificil a dîsi. Ma o pensi che il belanç des ativitâts dal ateneu in plui di 30 agns di vite al sedi, in tiermins di impat sul teritori, cetant positîf e che, fevelant dal trasferiment de cognossince al sisteme economic, lis risultis plui grandis a sedin ancjemò di viodi. Rispiet al avignî – al siere – o soi otimist”. ■
Erika Adami