Sfuei Mensîl Furlan Indipendent
Archivi de Patrie

SOLIDARIETÂT. Solidarietât furlane a Gjenue

............

Un tronc di arbul, un fi salt de nature, interpretât dal om al pues deventâ un ogjet di indulà difondi la peraule di Diu intun lûc ferît di une calamitât. Il leam tra il Creadôr, l’om e la nature no si pues dividi in nissun aspiet de vite: gaudiôs, ordenari o dramatic.
A Gjenue, intal mês di Novembar, la plene dal torint Fereggiano e à puartât muart e devastazion, ma la volontât di tornâ a scomençâ no è mai mancjade. Dilunc de strente e cimentificade val colpide de aluvion, a vivin tancj Furlans che daurman si son metûts in contat cui gjornâi, cu lis radios e cu lis televisions par confuartâ, denunziâ e puartâ la lôr testemoneance. In pocjis oris si è metude in moviment la “machine de solidarietât” e dal Friûl a son partîts volontaris, mieçs e risorsis a pro dai aluvionâts. Graciis a internet, cierts amîs furlans di Gjenue a àn fat circolâ lis fotografiis de capele di Sant Josef invadude dal pantan, svangjât di desenis di fantatis e di fantats. La piçule Glesie e je sotetade intai fonts di un condomini dai agns ‘60, che si cjate su la rive çampe dal Fereggiano, intal cuartîr di Quezzi. Lis fotos e lis cronichis dai furlans a àn colpît i ativiscj de Pro Loco “Amici di Avasinis” che e à volût promovi une iniziative a pro de Glesie danezade. Selezionât un arbul di cocolâr su lis monts parsore dal paîs, contatât un amì marangon/scultôr, in pocjis setemanis al jere pront un ambon di donâ ae glesie di Quezzi par anunziâ, come che al à scrit Pre Roman Michelotti intai salûts: “La buine e la biele notizie dal Vanzeli e de Peraule di Diu, Peraule zovevule di vite e di sperance”. Ai 21 di Mai passâts si è tignude la cerimonie di donazion a Gjenue, li che a àn partecipât desenis di furlans residents inte citât de Lanterne. L’ambon al jere cuviert de bandiere dal Friûl, in Glesie la lenghe prevalente e jere il furlan e i presints gjenoans cun comozion a àn rigraciât e esaltât la amicizie tra ligurs e furlans, fin dai timps des grandis emigrazions pes Americhis, cence mai dismenteâ la presince dai volontaris ligurs intai dîs e intai mês dopo al taramot dal 1976.
Nol è mancjât un rinfresc bondant dulà che i vins furlans a jerin a confront cun chei ligurs, il Montasio cu lis tortis saladis e lis fuiacis gjenoanis, il salam furlan cun chel di Sant Olcese. ■
Daniele Martina

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +