A son svolâts cinc agns di cuant che Riedo Pup al polse te ombrene de plêf di Sante Margarite, ma il vueit che nus à lassât, impen di jemplâsi o di stemperâsi, al devente simpri plui pesant. Al è di bant: nus mancje! Nus mancje il so toc su la Vite Catoliche, chel toc che di tancj, masse agns, al compagnave il nestri drandran e la nestre storie di provincie apartade e a pene sfiliade dai grancj fats e misfats de storie. Nus mancje la sô leture serene, sapienziâl, positive, ironiche de nestre storie e de storie dal mont. Lui, cronist di paîs, anzit di borgade, setemane dopo setemane, al spaziave de cronache locâl, minude, indifarente, insignificante, a la grande cronache mondiâl, cu lis problematichis vitâls simpri plui ingredeadis, cui siei senaris simpri plui preocupants. E lui, simpri, nus insegnave a lei e a cjalâ dut “sub specie aeternitatis”, come chei munics medievâi che a misuravin il mont e i siei problemis a partî de imensitât e de infinitât di chel Diu che denant di lui dut al è grant ma dut al è piçul, dut al è impuartant ma dut al è relatîf, dut al semee decisîf ma dut al devente secondari e insignificant. Parcè che Pup nol cjalave lis robis dal so pont di viste personâl, ma dal pont di viste di chel popul che al dure cetant di plui de singule persone e al rive, a fuarce di vitis e tignint dûr, a superâ tant Atile cui siei flagjei che Napoleon cui siei sperons di aur.
La sô biografie e je lungje come spazi, vint passât i otante agns biblics. Ma e je curte, limitade, come spazi gjeografic e culturâl, vint zirât dute ator des culinis dal Friûl di mieç. Pa la cuâl si pues fevelâ di lui come di un reporter di paîs plui che di un globe-trotter. Cundut a chel al rivave a dâ une dimension globâl a lis nestris barufis curtilanis e un savôr dumiesti a lis grandis tensions dal mont. Parcè che al veve capît che il mecanisim che al rêç la cronache locâl e la storie globâl al è simpri chel pal fat che al è simpri compagn l’om, cui siei difiets e cu lis sôs virtûts, cu lis sôs bramis e cu lis sôs magagnis. Te sô leture armoniche de realtât, nus à insegnât in maniere concrete e vive che une barufe di curtîl no je mancul stupide e negative e periculose di une vuere e che la muart di Dreute in Grecie, te sô assurditât, e rapresente ducj i milions di muarts de vuere prime e seconde.
Di profession insegnant, pe precision mestri, al à savût mantignî par dute la vite chê virtût didatiche artesanâl che no si stufave mai di ripeti chê e simpri chê, partint de realtât plui che des ideis o des ideologjiis, de vite plui che des astrazions. Il so insegnâ al è stât simpri concret, facil, clâr, sostanziôs. Dutis cualitâts che lui al à puartât cun costance e profit tes mansions o missions che la vite lu à clamât. Al è stât sindacalist, gjornalist, conferenzîr scoltât cun gust, scritôr popolâr come pôcs. Al à scrit tant, ma la sô produzion no je cui sa ce bondante. Ai libris al preferive la pagjinute di riflession, di coment, di confront, là che al podeve sbrocâ dute la sô ironie mai pesante e fâ la sô critiche mai ofensive. Parcè che al jere une anime semplice, armoniche, curiose. Al è stât un grant furlan e un grant cristian. Jessint piçul di stature e spaurôs di temperament, nol varès mai podût fâ vueris. Nol à mai frontât di pet i grancj. Le varès pierdude prime di tacâ. Ju à mostrâts ridicui e chest ur à dât inmò plui dam.
La sô produzion leterarie, la sô lezion di vite, la sô ereditât spirtuâl e culturâl a son come une risultive di aghe che e spissule fûr cidine cidine tra il vert. La sô aghe di sapience e pues distudâ ancjemò la nestre sêt di veretât e di pâs.
Antoni Beline
Riedo Puppo : schede biografiche
Riedo Puppo (Pup) al è nassût a Sarsêt di Martignà ai 11 di Avost dal 1920 e al à muart a Udin ai 12 di Març dal 2002. Come profession al jere mestri elementâr. Al à insegnât a Murùs e po al à passade gran part de sô vite come sindacalist. Chest, e la sô vene, i à permetût di deventâ un gjornalist atent, un oratôr gjoldibil e soredut un dai grancj scritôrs furlans. Al è cressût a la scuele di pre Josef Marchet, tal grup de “Risultive”. Al à vût scrit ancje te nestre “Patrie dal Friûl” ai timps di Marchi. Se “Par un pêl” (cun sîs edizions) al reste un classic de leterature furlane, i furlans si son sostentâts par agns cul so “cjanton” e cu la sô “letare” su “la Vite catoliche”.
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +