Sfuei Mensîl Furlan Indipendent
Archivi de Patrie

Une partide di balon pe nestre economie

............

Chi Stadi Friûl: la partide e je finide cu la vitorie de Emilie sul Friûl par 3-0. Il risultât al è stât disblocât de acuisizion de mulltiutility Amga de bande di Hera e la Emilie e à dopleât dopo cul afidament aes cooperativis rossis di Bologne (Consorzio Cooperative costruzioni, intune cuardade là che a comparissin ancje lis furlanis Icop e Pre-System, a morestâ il disapont dai locâi) dai lavôrs pe realizazion dal gnûf stadi Friûl. La scuadre di cjase e veve tentât di limitâ i dams cirint di parâ il rigôr de acuisizion di Latariis Furlanis de bande di Granarolo, che però e à segnât distès. A voaltris la linie.
Al sarès biel se il periodi che la economie furlane e je daûr a passâ si podès ridusi a une semplice croniche sportive di une durade ben definide. Invezit chi il nonantesim minût (e eventuâl recupar, al solit discrezionâl) al è ancjemò ben lontan, e intes partidis che si stan davuelzint a son in zûc ben plui che i trê ponts in classifiche. Chi, come minim, si zuisi une retrocession intune serie “cadete”, che di chê rimontâ al sarès pardabon tant dificil.
Parcè che in zûc a son, in tancj câs, setôrs strategjics. Dopo la energjie, al è il futûr di dute la filiere dal lat e dai siei derivâts a jessi metût in discussion, intal câs de vicende che e rivuarde lis Latariis Furlanis: in bal, no son dome i puescj di vore – ancje se une vore impuartants – dai dipendents direts dal Consorzi di Cjampfuarmit. In ritart – ben di là de zone Cesarini, in chest câs – l’intervent de Regjon, in cualsisedi maniere che e ledi a finî. Cussì come che masse a dilunc si è fat spietâ un plan regjonâl de energjie; cussì come che  dome a peraulis si è lâts indevant a sostignî la situazion strategjiche de aree de Ausse Cuar, rivant ae fin a un comissariament che cence indicazions precisis e volontât di disvilup al riscje dome di fâ di maquillage par scuindi il vueit pneumatic di ideis e di progjets.
La atenzion focalizade su lis cifris eclatantis e à fat forsit pierdi di viste a tancj di lôr un altri grâf “flop” de Regjon, tant plui grâf stant che i siei efiets si son fats e si fasaran sintî ancjemò su lis Pmi regjonâls e su lis sachetis dai contribuents de Regjon. Il “vulnus” al è chel dal Mediocredito dal Fvj, che par chel e je previodude une ricapitalizazion di 100 milions in trê agns, par rivâ ae pate di belanç intal 2016 cuntun braç operatîf regjonâl cun operativitât infuartide. Cussì, almancul, a peraulis. La ricapitalizazion e je stade necessarie stant che a belanç 2013 il Mediocredito al mostre un “ros” di 60 milions. Ur è forsit scjampât a tancj di lôr che metât dal pês complessîf des soferencis de controlade regjonâl al derivi di operazions fatis fûr regjon, Venit in particolâr. Il 76% dai credits deteriorâts al rimonte al periodi 2006-2009 (president Flavio Pressacco, dal 2005 al 2008, e prins timps di presidence di Massimo Paniccia) e di chescj il 66%, vâl a dî duncje il 48% dal totâl, al risulte di operazions fatis a pro di impresis fûr regjon. Dibant fermâsi sul sens des sieltis strategjichis fatis chê volte, ma al è lecit domandâsi se il Mediocredito dal Fvj forsit nol varès vût di ocuâsi prin di dut di sostignî lis impresis locâls. Ancje di “stiçâlis” ai invistiments, se dal câs. Invezit si assist cussì ae dople burlade dai credits deteriorâts “made in Venit” (ma no dome) e duncje di risorsis regaladis fûr regjon e ae dibisugne di tornâ a meti man al tacuin “nostran” par tornâ a sestâ la barache. E stant che la Regjon e deten il 51,46% dal Mediocredito, plui di 50 milions de ricapitalizazion previodude ju varà di sostignî jê. Ven a stâi noaltris. Graciis.
Ma ben che e vegni la ricapitalizazion, se dopo però il Mediocredito al sarà pardabon in stât di supuartâ il disvilup des Pmi locâls. Locâls, no dal Venit o de Emilie, viodût l’aiar che al tire… Parcè che si sa che, se lis nestris impresis (e dut il teritori, viodêt ben…) no rivaran a jessi Pmi competitivis, la partide tra Emilie e Friûl – ma ancje chês tra cualsisedi altre regjon dal mont e Friûl – e va a pericul di finî cuntun capot inevitabil e retrocessions dopo retrocessions. Fintrimai ae ultime serie. Di là dal aiût dai tifôs.
Chi Friûl, a voaltris la linie. ❚
Linux

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +