Sfuei Mensîl Furlan Indipendent
Archivi de Patrie

Une aziende dal teritori a ’nt salve une altre. Il câs (finît ben) de Itlalricambi: ecelence cuasi lade a patràs no par motîfs economics

............

La Faber, imprese metalmecaniche impuartante de zone di Cividât, e je stade la uniche aziende a vê formalizade une ufierte par cuistâ la Italricambi, ancje cheste realtât metalmecaniche cun propris sîts a Cividât, Flavuigne e Gaiba (Ro).
No son rivadis, di fat, dentri de date fissade dai 6 di Mai dal 2015, altris ufiertis e viersaments di caparis di almancul 500 mil euros.
La Faber, duncje, si è adiudicade, al cost di un milion e 570mil euros, la Italricambi.
In chest mût, si è infin disblocade une situazion tant dificile là che la Federazion Taliane Metalmecanics e à fat in maniere responsabile fin in fonts la sô part, cirint soluzions pai lavoradôrs e impegnantsi pal proseguiment de ativitât aziendâl.
Al va visât cemût che la Italricambi Spa, cu la denominazion “Trattamenti Cividale”, e sedi stade metude in licuidazion e, cun sentence dai 22 di Mai dal 2014, al sedi stât declarât il so faliment.
Intant, il prin di Mai dal 2014, la “Trattamenti Cividale” e veve stipulât doi contrats distints di fit cu lis societâts Early Spa e Ir Srl. Chescj rams di fit a son stâts revocâts, ai 10 di Lui dal 2014, dal Tribunâl di Udin cun oblic di restituzion imediade de aziende.
Di cheste dade al è scomençât un percors di casse integrazion straordenarie par ducj i 95 dipendents (66 a Cividât, 7 a Flavuigne e 22 a Gaiba).
Chê de Italricambi di Cividât e Flavuigne e je stade une vicende pardabon tant, masse confondude.
Che si pensi che cheste aziende e rapresente une ecelence, a nivel internazionâl, inte produzion dai tocs pes machinis di moviment tiere. Cundut achel, prime e à corût il pericul di jessi sierade in maniere incomprensibile cun dutis lis comessis che e veve e, in maniere seguitive, e je finide sot dai rifletôrs par une serie di pleis judiziariis che a àn causade la sospension di ogni ativitât produtive.
Intai ultins mês, infin, si à vivût ancje il paradòs di vê une casse integrazion vuadagns straordenarie za autorizade dal Ministeri dal Lavôr e, inte stesse suaze, di viodi recapitâ ai lavoradôrs bonifics falâts, e duncje no fruibii, par vie di un probleme informatic dal studi di consulence.
Cumò la Fim, infin, si podarà confrontâ cuntune aziende tant che la Faber, note pe serietât fin cumò dimostrade e che e je daûr a impegnâsi ancje in cheste vicende.
Il confront, pûr no facil, al sarà fondât su la concretece.
La Fim e strenzarà i timps par rivâ a acuardis sindicâi che a permetin la riprese produtive in mancul timp pussibil e e cirarà di mantignî cun indurance la difese dai nivei ocupazionâi. I lavoradôrs de Faber a àn vivût su la lôr piel masse inciertecis e umiliazions. Si meretin cualchi ciertece e un pocje di serenitât.
Intal passât, masse dispès in Italricambi al è mancjât cualsisedi confront cu lis proprietâts, stant che a jerin dificilis di intercetâ e di individuâ inte lôr efetive realtât e volontât.
O tornìn a partî cuntune aziende dal teritori intal teritori. ❚
Giorgio Spelat
Fim Cisl Provinciâl di Udin

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +