Un progjet par insiorâ lis bibliotechis furlanis

Dopo doi agns di interuzion par vie de pandemie, al à tornât a inviâsi il progjet puartât indevant de Fondazione Friuli par insiorâ il patrimoni des bibliotechis furlanis. Il progjet al previôt la spedizion di libris, comprâts de Fondazione, aes bibliotechis publichis e privadis operativis tal teritori di riferiment dal sodalizi. Tal detai, a saran consegnâts 2 mil titui par sù par jù 11 mil e 300 volums, a 309 ents: ven a stâi, 129 bibliotechis publichis de provincie di Udin, 37 bibliotechis publichis di chê di Pordenon, 77 tra istitûts comprensîfs, scuelis paritariis di prin e secont grât dal teritori di Udin, 41 comprensîfs e paritariis de zone di Pordenon, e 25 cjasis di polse. In dì di vuê a son stâts consegnâts 357.376 volums. Il progjet al è stât inviât tal 1999 e si è fermât dome tal 2020 e 2021, i doi agns de pandemie. ❚