Devant de vuere ae Ucraine al covente ancje pensade une trasformazion dal nestri sisteme alimentâr. Un apel di plui di 550 ricercjadôrs e sienziâts europeans
La injustificade invasion russe de Ucraine e à creât une catastrofe umanitarie e e à savoltât i sistemis energjetics globâi e i marcjâts agricui dal planet. La Ucraine e la Russie a son grancj produtôrs globâi di forment, blave e semencis oleosis (e di fertilizants e carburant). Il Medi Orient e la Afriche a dipendin une vore dal forment impuartât di chê zone e a saran i plui colpîts. I previodûts shocks ai marcjâts agricui a son daûr a sburtâ al abandon des pratichis agriculis sostignibilis de Ue e al aument des capacitâts di produzion di forment de Europe, in part ancje par garantî la provision di pasturis pe zootecnie.
Trasformâ i sistemis alimentârs di vuê par garantî la sigurece alimentâr di doman
La insigurece alimentâr globâl no à origjin di une carence di ufierte, ma di disavualancis economichis fuartis e di une brute distribuzion. La produzion alimentâr globâl di vuê e je plui che suficiente par nudrî une popolazion mondiâl ancjemò plui numerose. Dut câs, i cereâi a deventin pasturis par animâi e biocarburants. Al contrari di ce che la plui part des discussions in cors a podaressin fâ pensâ, la sigurece alimentâr europeane no je menaçade de crisi ucraine, cemût che al è stât sotlineât di resint ancje dal vice president de Comission Europeane, Frans Timmermanns. Invezit, par plui di 550 ricercjadôrs e sienziâts europeans che a àn sotscrit un apel detaiât, la Europe e je menaçade de abitudin al consum di cereâi rafinâts e di prodots animâi in misure tant plui alte des racomandazions des liniis vuide nazionâls dietetichis e di chês par dietis sanis e sostignibilis, come chê Mediteranie.
Adotâ regjims alimentârs cun mancul prodots animâi
Un moviment bande un consum plui uman di liùms, verduris e pomis, e mancul prodots animâi, in Europe al podarès slizerî in sostance la pression su lis furniduris mondiâls di forment. Un tierç des caloriis globâls al è doprât par nudrî i animâi, e plui di trê cuarts dai terens agricui a son dedicâts ae produzion di aliments di origjin animâl. Su la fonde dai dâts Fao, si stime che la riduzion dal ûs de Ue di cereâi par nudrî il besteam di plui o mancul un tierç e podarès compensâ la colade des esportazions ucrainis di cereâi e semencis oleosis. Riduzions contemporaniis intal consum e inte produzion di aliments di origjin animâl a puartaressin a un sisteme alimentâr e agricul plui ecuilibrât, in linie cui obietîfs sanitaris e ambientâls. Un spostâsi bande dietis pal plui vegjetâls al podarès prevignî ogni an la muart prin da la ore di 11 milions di personis e sbassâ in sostance il pês globâl des malatiis. I sfuarçs politics par destinâ altris terens ae produzion di cereâi cul obietîf di stabilizâ lis capacitâts di arlevament zootecnic dentri de crisi di cumò,
al contrari, a cressin la competizion tra pasturis animâls e mangjative umane e a intardin la trasformazion bande une produzion alimentâr plui sostignibile.
◆ Al è ancje il pont di viste de ASVIS che, intal so Rapuart su la sostignibilitât 2021, par altri, e domande che la intensificazion produtive sostignibile e vegni “leade ae diete sostignibile, incentivant la riconversion des dietis, e duncje des produzions bande une plui grande cuantitât di produzion vegjetâl e di dietis plant-based”. ❚