Sfuei Mensîl Furlan Indipendent
Archivi de Patrie

Un grup par straviâsi sôl che in lenghe furlane

............

“A chi, si scrîf e si rît NOME par furlan e par cjargnel!!!”
al fâs un an e al sta deventant simpri plui grant

Ogni tant e ven fûr une novitât in marilenghe sui social, a testemoneâ che il furlan al è vivarôs e si doprilu ancje sul web. Il grup di Facebook “A chi, si scrîf e si rît NOME par furlan e par cjargnel!!!” al sta deventant simpri plui grant e al è scrit dut in lenghe furlane. Nassût ai 11 di Otubar dal an passât, chest mês, duncje, al fâs un an. O vin fat cualchi domande a doi dai fondadôrs, Anna Romanini e Mauro Urli.

__

Cemût isal nassût il grup e parcè?

Mauro: «O jeri iscrit al grup “Quelli che cjacarano il taliano leato col filo di fiaro”, li che come regule si fevele par talian, ma doprant peraulis furlanis “intalianadis”.

A mi, però, mi vignive di comentâ par furlan e mi cridavin ogni volte, e cussì mi soi gjavât. No capivi il parcè di strambî la nestre lenghe: jo i ten e o volarès che si conservi. E cussì, une dì mi soi cjatât cun dôs amiis, Anna Romanini e Lorena Bassi, e ur ai proponût di meti sù un grup dome in marilenghe. E cussì o vin tacât».

Anna: «Ancje jo o jeri in chel grup, e ancje se no mi soi gjavade, mi plaseve di fâ alc propit par furlan. Duncje o ai aderît cun entusiasim a cheste gnove imprese».

__

Cuâl isal il spirt e i contignûts dal grup?

«Il nestri grup al vûl jessi un moment par fâ cuatri ridadis par furlan, cuant che si rive ae fin de zornade stracs, o par tacâle ben. Pal plui, o cirìn batudis e vignetis che a son ator in internet e lis voltìn par furlan. Dut chi, cence pretesis».

__

In plui des vignetis, vêso in progjet altris contignûts? E cuâi sono chei che a àn vût plui sucès?

«A àn vût sucès particolâr un pâr di fotos vignetis cun fruts tant che protagoniscj. Po dopo, al dipent de batude te vignete se “e cjape” o no. Come altris contignûts, o metìn ancje bielis fotos dal Friûl, o batudis su fotos che o fasìn nô. E su propueste de nestre iscrite Linda Picco, che mi pâr che o cognossês ancje voaltris (e je une colaboradore da La Patrie dal Friûl, ndr), o vin inviât un piçul cors di furlan. Ancje nô lu scrivìn come che o podìn, viodût che no nus al àn insegnât a scuele, e duncje e je une robe che e pues jessi interessante par ducj».

__

Une robe che mi à incuriosît e je che voaltris o tignîs une vore aes regulis dal grup, in particolâr a chê di fonde: doprâ il furlan. Cemût lu gjestîso?

«Prin di dut, cu la domande che e ven fate a chei che e vuelin jentrâ tal grup, che e je par furlan: “Sâstu il furlan, o dut câs sâstu scrivilu avonde ben?” e la rispueste, che e à di jessi par furlan, e je necessarie pe eventuâl aprovazion. Se no rive dentri di trê dîs, la domande e sarà cancelade. E dopo, o tignìn di voli ancje i coments, che a àn di jessi par furlan, e che i utents no metin fotos o batudis par talian te bacheche. Lis regulis a son claris e a àn di jessi rispietadis. Al è un lavôr che nus impegne avonde, ma al covente fat, par regolâ ben l’andament dal grup».

__

E rispiet a cheste “severitât”, vêso vude cualchi contestazion?

«No cuissà ce, anzit nus àn fat i compliments: un iscrit al à dit che si jere gjavât di un grup di argoment furlan propit parcè che aromai a metevin di dut, ancje robe che no jentrave cul Friûl. Chest al è il nestri cjanton par fâsi cualchi ridade in marilenghe: se cualchidun no i ten, no capìs parcè che al à di iscrivisi o lâ fûr dai semenâts».

__
E vêso ancje altris regulis?

«Sì. No fevelâ di politiche o fâ batudis su chel argoment in nissune maniere. A vegnin fûr dome barufis. Bandidis ancje peraulatis, blestemis e volgaritât in gjenerâl».

__

Nus fasêso cualchi numar a proposit dai iscrits? La incressite ise stade costante?

«Nô o sin nassûts ai 11 di Otubar dal 2017. A Març o sin rivâts a mil iscrits, prime dal Istât a 2 mil e propit in chescj dîs o sin rivâts ai 3 mil. Cumò o vin 20-30 domandis in dì, duncje e je une incressite esponenziâl. Però, un 30% des domandis lis scancelìn parcè che no rispuindin ae domande di jentrade, pe regule che si sin dâts che si diseve prime. Une altre statistiche interessante e je che o vin vût 52 mil coments tai ultins 28 dîs. Un grup une vore atîf».

__

E i iscrits, ce carateristichis àno?

«Plui feminis (il 56,4%) e la fasse di etât cun plui iscrits e je chê dai 45 ai 54 agns, che e je ancje la nestre».

__

E cui zovins, cemût? Si iscrivino? Partecipino?

«O vin ancje zovins che si iscrivin, e chei che si iscrivin a son contents. Ma no son trops. I zovins, magari cussì no, no fevelin plui furlan. O forsit a balinin in altris grups. Ma no nus displâs di vê un public plui “grant”: une robe biele e je che o fasìn compagnie a tancj anzians che a stan in cjase e cussì si fasin une ridade par furlan».

__

Ultime domande. Par fortune, il mont di Facebook nol reste dome virtuâl, e je une scuse par cognossisi “dal vêr” e o vês tacât a organizâ cualchi cene. Cemût sono ladis, e vêso intenzion di lâ indevant a fâlis?

«A ‘nt vin fatis dôs, par cumò: te prime o jerin in 9, te seconde 15. In incressite ancje chês, in sume. Cumò o vin in program une prime de fin dal an. O vin plasê di proponilis, e ancje i iscrits al grup nus domandin di fâlis. Pe prossime o varìn di cjatâ un locâl plui grant. O sês ducj invidâts, ma cu la regule di fevelâ par furlan, si capìs. Magari si viodarìn li, mandi!». ❚

Dree Venier

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +