Aromai lu savìn ducj: no esistin plui i agricultôrs di une volte, chei che a cjapavin sù lis culturis a man, che a dopravin dome ledan e che a lavin daûr dai ritmis de nature. Vuê, dut al è gjestît de tecnologjie, il timp al cor e bisugne spesseâ e lis plantis a van tratadis cuintri di malatiis e besteatis simpri plui resistentis. Fintremai il tiermin “contadin” al nase di vieri e mufulît: cumò a van di mode i imprenditôrs agricui, chei che a passin plui timp sentâts sul tratôr che in pîts. Purpûr, tal mieç di cheste tindince, al è ancjemò cui che al cîr di cjatâ un troi alternatîf che al meti adun inovazion e tradizion.
Jenfri di chestis aziendis, par solit piçulis realtâts di paîs a conduzion familiâr, tantis a son puartadis indevant di int zovine, dispès studiade e cun altris esperiencis di lavôr, che però e decît di tornâ ae tiere e di seguî lis olmis dai vons.
Un di chescj esemplis nus ven de Friûl Bios dai fradis Gabriele e Fulvio Tavano (classe ’79 e ’86) di Gjalarian di Listize, che a àn decidût di cjapâ in man la aziende di famee, cun obietîfs specifics: coltivâ daûr des regulis de agriculture omeodinamiche, cuntune atenzion particolâr ae tradizion contadine, aes dibisugnis des plantis e al rapuart energjetic jenfri om e nature.
«La nestre sfide e je stade chê di tornâ indaûr a ce che si faseve une volte, ma cu la inovazion e cu la culture», nus conte Gabriele Tavano. «O produsìn un prodot di cualitât, cuntun valôr une vore bas di glutin, une vore digjeribil e che si pues doprâ par ducj i tips di panificazion». La aziende e prodûs farine blancje e rosse (une misture di cuatri tips diferents di blave) par polente, di spelte, di forment, di siale, di sarasin e di vuardi. Chest Istât e à metût in cumierç ancje la paste fate cu la sô spelte e produsude di un pastifici artesanâl. «Un dai nestris obietîfs al è chel di vierzi un pastifici par paste secje trafilade al bronç, di mût di ampliâ la nestre ufierte».
Doi zovins ambiziôs, duncje, ma ancje umii e rispietôs de tiere, che ai 20 di Otubar a àn screât un altri dai lôr tancj progjets, fat sù dut cui lôr invistiments e cun fadie e sacrifici: il mulin a piere naturâl pal Friûl di Mieç. «O vin simpri vût chest balin, viodût che la plui part dal procès produtîf lu fasevin in propri e nus mancjave dome la lavorazion finâl. In cheste maniere, o rivìn a vê un margjin ancje sul presit de trasformazion. Cun di plui, o ufrìn un implant inovatîf che nol esisteve ancjemò tal Friûl di Mieç. Cumò, il nestri imprest al è a disposizion ancje di chês altris aziendis de zone, e o sin sigûrs che la colaborazion cul DES e puartarà a tancj zovaments par ducj».
Tant che dute la filosofie ae fonde de Friûl Bios, ancje il mulin al unìs tradizion e inovazion, di mût di masanâ la farine a temperaduris che no ledin parsore dai 37°/38° C, cuntun numar ben precîs di zîrs al minût. «O sin lâts fintremai in Austrie par cirî ce che di miôr al jere sul marcjât, po dopo o vin capît che in Italie o vin za dut ce che nus covente, cence lâ tant ator pal forest. Il mulin, di fat, al ven di Trevîs e lu vin progjetât adun cui costrutôrs». La atenzion e la sensibilitât di cheste aziende, dut câs, no si fermin dome al prodot naturâl, ma si mostrin ancje tai confronts dai clients. «A mi no mi interesse tant di rivâ a vendi, par me al è impuartant che il consumadôr al sepi ce che al compre. O cîr simpri di spiegâ la nestre filosofie, di mût che la int e sedi cussiente di ce che al finìs tal so plat. Cuant che o vent un prodot, o domandi simpri di tornâ a clamâmi par inzornâmi su cemût che e je lade. Il confront al è fondamentâl, parcè che dome de condivision si pues costruî alc che al sedi stabil, cun rapuarts umans che nus judin a cressi ducj i dîs e a puartâ indenant pardabon la nestre mission». ❚
Serena Fogolini
