La impuartance dal insegnament di pre Checo Placerean te scuele al risalte soredut dal fat che un so student, za di passe mieç secul, al conserve ancjemò vîf il so ricuart. Di sigûr no si trate di contignûts specifics, ben pluitost di une metodologjie e di chê che vuê si podarès clamâ programazion, tiermin burocratic che in realtât si concretizave tes sôs lezions tant che un itinerari che al puartave i fantaçuts di une provincie lontane, come che al jere il Friûl, a une maturitât di judizi autonom e a cuistâ une libertât responsabile.
◆ Cjalant a grande distance di timp, ma di un pont di osservazion critic di sigûr plui precîs, o stimi che si puedi individuâ plui liniis te realizazion de sô ativitât pedagogjiche: prime di dut chê specifiche dal so insegnament – che a clamavin ore di “Religjon” – insegnament fat tun confront seguitîf cui grancj temis dal pinsîr ocidentâl, contestualizât te realtât specifiche dal Friûl.
◆ A jerin i agns che si celebrave il Concili Vatican II; e chel spirt di roture profonde e insperade cu la tradizion post tridentine al soflave fuart tes glesiis e tai moviments de grande part dal mont catolic. Pre Checo al cirì di spalancâ puartis e barcons de nestre ment sierade par dânus snait cun chel aiar gnûf, no dome tignintnus informâts sui lavôrs conciliârs ma, soredut, fasintnus olmâ lis lidrîs profondis di chel cambiament dal pinsîr teologjic de prime metât dal Nûfcent. E cussì, pe prime volte o sin vignûts a contat cu la teologjie protestante. Mi impensi ancjemò cun clarece lis sôs lezions sul “Coment ae letare ai Romans” di Karl Barth, che pre Checo al cognosseve fintremai il metodi di lavôr un grum esclusîf e furnît di supuarts mirabii.
◆ La Glesie intindude dal Concili tant che “Popul di Diu” e implicave, daûr la sô opinion, une conformazion une vore precise insedade te storie e te culture di ogni popul: di li, la rivendicazion ferbinte de bisugne estreme di vê une Bibie e une liturgjie te lenghe dal popul furlan e, di consecuence, une valorizazion de tradizion tipiche de Glesie aquileiese.
◆ Il Patriarcjât al deventave il simbul di cheste rivendicazion ma, sot di chê bandiere, la atenzion e jere centrade massime su lis dinamichis atuâls des realtâts eclesiâls dal Friûl, dulà che si veve di meti in opare la pastorâl dai “paîs piçui”.
◆ Mi domandi se culì il ricuart de didatiche di pre Placerean no si incrosi cun altris ricuarts in riferiment ae sô mission pastorâl: o crôt, par altri, che chest incrosâsi dai fîi de memorie al sedi il specific de sô presince che, ancje di dentri dai mûrs di une aule, si slargjave plui inlà dai confins de scuele. A conferme di chest, al è il rûl che lui al à vût te organizazion dal siopar studentesc proclamât par domandâ a fuart la istituzion de universitât dal Friûl, siopar dulà che pe prime volte o ai riscjât di cjapâ lis pachis de polizie. Esperience che si sarès ripetude tai agns straordenaris dal Sessantevot a Milan.
◆ La memorie dai events no pues – par altri – stratignî dal dut il ricuart, che de memorie razionâl si diferenzie parcè che al è cjapât dentri ancje il cûr: cuant che al jentrave in classe cun chel zigar in bocje che nus intosseave – tant che ae fin de ore ancje di Invier o scugnivin spalancâ i barcons – la sô figure e cjapave come une calamite la nestre atenzion, parcè che si inviave a colp un dialic cence confins su cualsisei argoment, pa la cuâl o pues culì confermâ che o ai capît plui di filosofie cun lui che no cul insegnant di chê materie, che po o varès sielzût come facoltât a la Catoliche.
◆ Si fevelave dal om, dai problemis fondamentâi de sô esistence. Assertôr convint dal libar arbitri che, cun voli plui atent, dopo o varès ritignût di pendence pelagjiane, stant che al palesave un otimisim san viers de nature umane puartade di biel principi al ben, dulà che il mâl al rapresentave dome une deviance che cu la libertât di judizi e cul jutori divin e podeve jessi comedade. Par me, tirât sù tes regulis di un agostinisim deteriorât che, al contrari, al svalutave ogni capacitât umane di resistence al mâl, chel otimisim san e motivât al deventà a prin colp un confuart salutâr che, cul passâ dai agns, al sdrondenà cun simpri plui fuarce fin a sdrumâle chê corace di precets dulà che e tentave di parâsi la inciertece e la pôre dal vivi.
◆ Su la mê scrivanie, di agnorums, o ten incurnisade une foto di pre Checo cul zigar in bocje e cul colbac sul cjâf, content e legri da pît dal so rocul fûr regule: imagjin perfete, par gno cont, dal so magjisteri, che al saveve comunicâ il sens de felicitât ancje cuntune sbrissade fûr de leç. ❚
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +