Cuant che Glesie e popul no fevelin la stesse lenghe

I fedêi de Valcjanâl al Vescul:
lis funzions no àn di jessi dome par talian
I  valcjanalês a son cetant leâts aes lôr lenghis e culturis, che vie pe storie ancje une sdrume di predis a àn difindût. Di un pont di viste storic, tai paîs de Valcjanâl li che une volte si fevelave soredut sloven a son simpri stâts a servî predis che a fevelavin par sloven o che a jerin bilengâi talian e sloven. Te Valcjanâl, l’ultin predi bilengâl al è stât pre Mario Gariup che al è rivât a Ugovize daûr di une petizion a pro di un predi che al fevelàs par sloven. Tal 1973 i ugovizans le vevin mandade al arcivescul di Udin di chê volte, bonsignôr Alfredo Battisti. Gariup al è stât a servizi te Valcjanâl dal 1974 fintremai cuant che al è muart, tal Fevrâr dal an passât. Fûr che pre Peter Lah, che massime vie pal Istât al viôt dal santuari de Mont Sante di Lussari, ancje tal gnûf an pastorâl de Valcjanâl nol è servizi religjôs par sloven, todesc e furlan.
◆ Cun chestis considerazions e je tacade la conference stampe inmaneade de Associazion slovene don Mario Cernet, vinars ai 23 di Otubar, te sale de Vicinie di Ugovize, par puartâ la atenzion su la assence di servizis religjôs tes lenghis locâls de Valcjanâl, massime par sloven.
A non de Associazion Cernet, Alessandro Oman al à prime di dut ricuardât lis iniziativis di pre Gariup a pro de difese e valorizazion de culture slovene, che a son ladis indenant fintremai che al è muart.
◆ Tal Novembar dal 2019, al è deventât plevan de Colaborazion pastorâl di Tarvis pre Alan Iacoponi, che al cure lis parochiis di Tarvis, Cjamparòs, Fusinis, Rabil, Ugovize e Malborghet e Valbrune. Al à 43 agns e al è nassût in Bolivie. A judâlu in maniere stabile tes parochiis de Valcjanâl, tant che vicjari parochiâl, cumò al è dome pre Gabriel Cimpoesu, che al à 44 agns e che al ven de Romanie. Presentantsi aes comunitâts, l’an passât pre Iacoponi al veve mostrade cetante viertidure, cun chê che al veve prometût di imparâ ancje il sloven e il todesc. Dut câs, fûr che no a Lussari, tal ultin an te vite religjose di Ugovize e di Cjamparòs il sloven al è stât presint soredut par iniziative dai fedêi, che al a àn judât cun leturis, cuant che no cun cualchi preiere bilengâl; a Valbrune cul cjant, che al è tornât a tacâ l’an passât.
◆ La situazion e va indenant di Novembar di chel altri an, cuant che al à finît il so servizi pre Jan Cvetek. Fintremai chê volte, il pari francescan – che al à 39 agns e che al ven di Bohinj – al veve judât massime tes parochiis li che al jere stât responsabil, fin ae sô muart, pre Mario Gariup, ven a stâi a Malborghet, cun lis filiâls di Lusniz, Sante Catarine e Valbrune, e a Ugovize. Cuant che al jere par scjadi l’acuardi tra la arcidiocesi di Udin e la provincie francescane slovene, i fedêi de Valcjanâl a àn preparade une letare, li che a àn domandât ai responsabii di acetâ di gnûf pre Cvetek te arcidiocesi di Udin e di mandâlu tes lôr comunitâts. A firmâ la letare a son stâts plui o mancul mil fedêi di ducj i paîs valcjanalês (e in dute la val a son plui o mancul cinc mil abitants). I rapresentants di tantis parochiis de Valcjanâl a àn dât chest document al arcivescul di Udin, Andrea Bruno Mazzoccato, bielzà tal Dicembar dal an passât. Dut câs, no je inmò rivade nissune rispueste.
◆ Tal ultin an, tes parochiis de Valcjanâl a son vignûts a judâ plui predis, soredut par dî lis Messis des fiestis. A stâ daûr aes ativitâts pastorâls, di fat al è pre Alan Iacoponi.
◆ I organizadôrs de conference stampe a àn puartade la atenzion ancje su la vitalitât dal ûs de lenghe slovene tes celebrazions religjosis. Chest ûs al ven di cetant inlà tal timp e te storie, e al à inmò cumò lidrîs fuartis massime tes parochiis di Ugovize e di Cjamparòs; la tradizion slovene e va indenant a jessi presinte ancje te glesie filiâl di Valbrune, midiant dal cjant. Oman al à sotlineât ancje la vivarosetât de Valcjanâl te suaze de arcidiocesi di Udin. La sô ricjece religjose e culturâl si palese ancje cul mantigniment des celebrazions religjosis ancje in lenghe slovene, cui rîts tradizionâi des processions, cui cjants par sloven e cu la colaborazion strente cul mont de scuele midiant de stesse Associazion Cernet.
◆ In merit ae tradizion culturâl e religjose slovene di Ugovize, Cjamparòs e Valbrune, Oman al à ricuardade la encicliche di Sant Zuan Pauli II cul titul Slavorum apostoli, li che il Pape al notave cemût che il stes Ciril al rimarcàs la stesse dignitât des lenghis slavis denant dal ebraic, dal grêc e dal latin, e in gjenerâl la dignitât di ogni lenghe. Oman al à ancje citât il defont arcivescul di Udin, Alfredo Battisti, che al Dan emigranta dal 1977 al veve spiegât che il messaç cristian nol à lenghis esclusivis. «La Glesie e je clamade a jentrâ, incjarnâsi tes culturis diferentis dai popui che a fasin il mont svariât, siôr e biel ». E inmò: «Par chest, la Glesie e je a pro de justizie, pe veretât, pe libertât dai popui, cuintri ogni discriminazion raziste, culturâl, linguistiche e sociâl. E je la veretât consolante ripetude tal Concili Vatican II, che massime te liturgjie si è ispirade a chest criteri. Come che al è normâl doprâ la lenghe locâl tes conversazions, te vite familiâr, cussì al è normâl doprâ cheste lenghe ancje te preiere, tal cult, fevelant cun Diu. La anime e scuen capî ce che a disin i lavris».
◆ La Associazion don Mario Cernet e à sierade la conference stampe domandant aes autoritâts eclesiastichis, ven a stâi al arcivescul di Udin bonsignôr Andrea Bruno Mazzoccato, di garantî la presince di un predi che al feveli talian, sloven e chês altris lenghis de Valcjanâl, cussì che al dedi une man a mantignî il siôr patrimoni di fede, linguistic e culturâl locâl. Bielzà pari Cvetek, tal an che al è stât atîf te Valcjanâl, al à rispuindût in maniere positive a chest compit. I socis de Associazion Cernet si visin cemût che al à savût, intun an dome, tirâ dentri dutis lis comunitâts parochiâls li che al è stât a servizi.
◆ Se la richieste de Associazion don Mario Cernet no sarà scoltade, i socis a àn chê di lâ dal stes Pape Francesc, che in chescj agns al à mostrade sensibilitât par dutis lis cuistions che a àn a ce fâ cui ultins, cu lis minorancis, cu lis comunitâts cristianis bandonadis e no scoltadis. ❚