Al jere un pôc che no levi li di Sauris&Borc da Bria, ristorant furlan in ativitât di agns, intune laterâl di vie Padova. L’ambient al è nassût su iniziative di Eros Puppini, di Cjavaç, che cu la femine greghe al veve za il Mykonos, pal Vivimilano «il miôr ristorant grêc de citât».
◆ Cumò lu à passât in gjestion a Mirko Torresani, un fantat di Milan, e a Christina Perdikaki che e je greghe. La mobilie e il furniment no son cambiâts: banc di len grês, i mûrs di modons a viste, cossis, ristiei e fotos cjargnelis picjâts sui mûrs.
◆ «Voaltris no sês furlans, cemût us isal vignût di cjapâ sù un ambient cun cusine furlane? E isal un câs che tu tu sedis greghe?» o domandi a Christina.
◆ «Nol è un câs parcè che jo o ai lavorât al Mykonos e ancje ca al Sauris, dulà che mi soi apassionade ae cusine de vuestre regjon. Mirko al è il gno om, e al gjestive un pub. Jo o stoi daûr al mangjâ, lui ae sale». Ma cuissà ce che a disin i clients che i titulârs no son furlans «O vevi dubis se cjapâ in man chest ambient par chel, ma nô o sclarìn subit che no sin furlans e la int nus cjape in simpatie e nus da conseis, che o acetìn vulintîr.» Il mangjâ che o ai cjatât cuant che o soi passât nol jere di plante fûr tradizionâl e Christina mi spieghe che «Il titulâr di prime al faseve cusine cjargnele cul stes menù, che no je adate par dut l’an, di fat in Istât si sierave par doi, trê mês. La nestre intenzion e je fâ une cusine cjasandrine di tradizion, ma ancje cun ricetis inovativis doprant simpri i prodots di cheste tiere maraveose. E cussì o podìn fâle dilunc di dut l’an, cambiant il menù.» Duncje une atenzion al teritori «Nô o vin vierzût tal Zenâr 2019 e o sin rivâts a lâ in Cjargne une volte; dopo o vevi la intenzion di fâ il Friûl di Mieç e i Cuei, ma al è rivât il Covid». Une atenzion ai prodots che però si scuintre cun cualchi dificoltât «O rivìn a cerçâ e cognossi prodots fantastics di ditis piçulis, ma al è un grant probleme chel di fâju rivâ fin a Milan. O pensi che la logjistiche e sedi pardabon un dai problemis plui grues che a impedissin di cognossi i prodots furlans». Un criticitât di risolvi, fasint cressi la cognossince dai prodots furlans fûr regjon, tant par ristoradôrs che a vuelin doprâju cun chest entusiasim, che pal consumadôr privât. ❚
Dree Venier
