Un ent che il Friûl al ringracie e che no si dismentee

“Il Friûl al ringracie e nol dismentee”: chest sproc che al ven doprât par ricuardâ i timps da taramot al po jessi ancje riferît al contribût che di agnorums al ven indreçât ae societât di chent de Fondazione Friuli. Ce saressie la nestre tiere cence une realtât come cheste, che dal 1992 pardabon e jude in maniere concrete centenârs di associazions, ents e privâts che a disvilupin iniziativis e progjets in diviers setôrs strategjics: educazions, istruzion e formazion, ma ancje art, culture, salût, medisine preventive e riabilitative.
◆ Il 2024 de Fondazion vuidade dal president Giuseppe Morandini al à sigurât la continuitât dai bants che a vegnin ativâts in riferiment a ducj i setôrs (scuele, lenghis, istruzion, sanitât, sociâl). 600 mîl euros a son lâts a finanziâ il bant pe istruzion, che al puarte indenant azions funzionâls a scambis internazionâi, ativitâts di doposcuele (impuartante chê ativade ae scuele Fruch di Udin), percors cjase-scuele e miorament des competencis leadis al moviment. La stesse cifre e va a finanziâ il bant pal welfare, che al smire a realizâ progjets di comunitât pe assistence e il benstâ dai sogjets plui debii. Mieç milion di euros al è invezit destinât a intervents di restaur: e in cheste suaze al va ricuardât che la Fondazion e à za finanziât, de so istituzion, plui di mîl intervents di cheste fate”.
◆ Strategjic al è il rapuart cu la Universitât di Udin: il president Morandin e il retôr Pinton a àn rignuvide la firme de convenzion che e previôt un contribût di 800 mîl euros pes ativitâts dal Ateneu. L’acuardi al conferme tantis azions za in vore sul colocament lavoratîf (par inglês “placement”) ma al smicje ancje a potenziâ il trasferiment tecnologjic e l’avignì dal agroalimentâr. E tancj a son i risultâts tal cantin dal lavôr e de economie cun progjets come Aziende in cattedra”, che al viôt colaborâ Universitât e Fondazione Friuli, adun cul Master in People management, Diritto del lavoro, HR analytics, e con Alig – Associazione Laureati in Ingegneria Gestionale.
◆ Une note particolâr al merite il supuart ae Scuele Superiôr de Universitât che e fiesteze 20 agns de sô viertidure. E d’in chê volte e à diplomât 167 arlêfs che vuê a lavorin in puescj come Google o la Nasa, la Bancje di Italie o il Parlament European. In gracie de Fondazion students dal ateneu furlan a son lâts ae St. John’s University par studiâ “Intercultural management”: e cun “EuroJobs Labs” si va ae scuvierte de Ue e di cemût che jude a fâsi une cariere tal mont dal lavôr.
◆ La zoventût furlane e impare cetant ae universitât parcè che la inovazion e rivuarde ancje la maniere di condusi lis aziendis: a chest rivuart e je stade interessante la taule taronde su “Lis diferencis gjenerazionâls te gjestion aziendâl inmaneade cul jutori de Fondazion alì de Tôr di Sante Marie.
◆ Une peraule di ordin de Fondazione Friuli e je “inclusivitât”: in chest la Universitât e ven judade in progjets ae avanvuardie taliane tant che la “Tutele de Salût tes RSA”, coordenât dal professôr Silvio Brusaferro. O il Progjet Spaziaperti con Asufc, Universitât, Fondazione Friuli, Centro Micesio, dulà che 9 zovins in condizion di disasi a àn ideât e realizât 25 panei pe Aziende agrarie universitarie “Antonio Servadei”.
◆ Progjets culturâi inclusîfs come il Festival Ephemera di Verzegnis o “In bici contro la solitudine” e “A proprio Agio” a Udin a mostrin la volontât di doprâ lis risorsi par fâ comunitât secont i valôr che la Fondazion e à ereditât de storie furlane. ❚