Al è dificil catalogâ il progjet dai “Tofugate”. Si tratial di un concept album modernist che al dopre une vetrine sul presint? Di une tragjiche comedie poetiche musicâl su base eletroniche a bas voltaç? O forsit di un elocui digjitâl low-fi? Lis rispuestis a puedin jessi tantis, ma alc al è sigûr: il progjet nol è dome musiche. Al è un manifest culturâl che al cîr di metisi fûr des retorichis semplificadis e di frontâ temis complès come il confront tra Ocident e Orient cun onestât inteletuâl.
◆ “Tofugate” al è un progjet colaboratîf che al nas de union des ideis dal ghitarist, compositôr e poete Fabrizio Citossi – che si impensìn di lui pe nestre interviste cui “Autostoppisti del Magico Sentiero” – de galeriste Maria Da Broi di Udin, che cu la sô vôs nus conte la opare, e dal artist techno talian e produtôr di colonis sonoris pal cine indipendent francês Emil Baghino. Il progjet duncje al è un coletîf di artiscj che si son metûts insiemi par chest progjet specific, cirint une sintesi tra esperiencis musicâls e visions artistichis diferentis.
◆ La opare prime, intitulade “Il Quarto conflitto ormonale”, e à viodût la lûs su lis plateformis digjitâls ai 21 di Novembar dal 2024. L’album al conte dodis tocs che a esplorin diviersis sfumaduris sonoris e tematichis. Il progjet si ispire, almancul in part, al romanç di Iosif Brodskij “Fuga da Bisanzio” e al torne a percori, midiant di chescj scrits, la storie dal confront eterni, spirituâl e ideologjic, tra Ocident e Orient, cirint di distanziâsi des narazions dominantis e dal dogmatisim ideologjic.
◆ Il cûr de opare al è il spoken word recitât dal scritôr e atôr Agnul Floramo, che al dopre le sô maestrie tal recitâ par dâ vôs a tescj plens di significât. Ae narazion vocâl di Da Broi si zontin lis vôs des cjantantis Laura Giavon e Ambra Drius, e chê dal cjantant Alberto Blasizza, che a complementin la composizion cu lis lôr sfumaduris vocâls.
◆ Ae formazion si son zontâts musiciscj di cime: un dai mestris dal jazz talian Francesco Bearzatti al sax; Gianni Massarutto, virtuôs de armoniche blues cognossût pes sôs colaborazions intai circui dal blues talian e european; la pianiste classiche cinese Simiao Sun e il polistrumentist australian Martin O’Loughlin. Te liste des colaborazions si à ancje le presince dal gjornalist e ativist culturâl Flaviano Bosco, culì come trombetist e cjantant, e il poete e compositôr Franco Polentarutti, tal rûl inedit di organist. Chest al dimostre cemût che la formazion dai Tofugate e sedi plasmabil e une vore creative.
◆ La linie sonore dai Tofugate e spiete une trame di influencis che a van dal jazz ae musiche eletroniche contemporanie, dal blues ae sperimentazion avant-garde. La base eletroniche “a bas voltaç” e cree un orizont di suns che al permet ae dimension teatrâl e poetiche di lâ indevant, cence taponâle.
◆ Chest progjet al rapresente ancje un esempli di cemût la culture furlane e podedi dialogâ cun orizonts globâi cence pierdi la sô identitât. La presince di musiciscj e artiscj de regjon tal contest di un progjet tant ambiziôs e testemonie la vitalitât de sene culturâl locâl e la sô capacitât di contribuî a une ricercje artistiche di nivel internazionâl.
◆ Produsût de New Model Label di Milan e inricjît des imagjins dal fotograf udinês Sandro Antoniolli, il disc al è disponibil su dutis lis principâls plateformis di streaming musicâl e altris servizis digjitâi. Par sostignî in maniere direte i artiscj, l’album si pues cjatâ ancje su Bandcamp, là che al è pussibil cuistâlu in diviers formâts di cualitât alte.
◆ Une ocasion di confront e di sperimentazion artistiche e je la schirie di events dal vîf che a misclicin la dimension musicâl cun chê culturâl, organizâts in colaborazion cun Euritmica, Arci Cervignano e MAKE Spazi Espositîf. La prossime esibizion e sarà a Pradaman ai 14 di Març tal Teatri de Ruggine – Autodemolizioni Del Frate. No stait a pierdisai! ❚
Tofugate: une fuide moderniste jenfri orient e ocident
Moira Pezzetta
