Sfuei Mensîl Furlan Indipendent
Archivi de Patrie

Tignìn cont des pocis, a son impuartantis pe biodiversitât

Gianluca Rassati
Une des dôs pocis esaminadis
Une des dôs pocis esaminadis

Une volte, il rapuart cu la aghe al jere dal dut diferent e lis personis a vevin ogni dì un contat diret cui elements teritoriâi formâts di chê. Che si pensi aes aghis che a jerin intai paîs ma ancje intes citâts, tant che lis roiis dulà che i fruts, e no dome, a fasevin il bagn di Istât, ma ancje aes pocis o “sfueis” che si cjatavin sedi ator pai prâts che tai paîs e che a coventavin par fâ bevi lis bestiis. Cul mudament socioculturâl che si è verificât tal secont dopovuere, al è stât un abandon e un cambiament des ativitâts agriculis, silviculis e pastorâls che al à modificât insot il rapuart che l’om al à cu la tiere. Chest al à fat in mût che cierts elements a sedin vignûts a pierdi la lôr funzion: al è il câs des pocis di aghe.
◆ Fin a cualchi desene di agns indaûr, lis pocis a jerin comunis in mont, stant che a jerin stadis fatis, dulà che a mancjavin, par favorî arlevament e agriculture. La pierdite di interès pes ativitâts leadis al mont rurâl e à compuartât il lôr abandon che, midiant di une evoluzion lente, lis à puartadis a discomparî cuasi dal dut. In altris câs, a son stadis eliminadis cui lavôrs di ristruturazion dai edificis rurâi che a jerin dongje di chês. In altris câs ancjemò, a son stadis “sostituidis” di bacins cun funzions diviersis – par esempli cuintri i fûcs – o distrutis par colpe de urbanizazion (sensu lato) o in virtût di azions di chê che e je clamade “bonifiche”. Chescj fenomens a son stâts distrutîfs in particolâr intai pidivals e tes zonis di mieze mont, dulà che dome pocjis si son salvadis, massime in gracie de lôr conformazion, struture, ubicazion e par vie dal mantigniment des ativitâts agriculis.
◆ Zonis dulà che chest al è ben visibil, e che al à vût consecuencis une vore fuartis, a son chês de Val dal Tiliment e de Val dal Lumiei in Cjargne. I doi cors di aghe a son stâts interessâts di dighis pe produzion di energjie eletriche: chest al à compuartât, a val des dighis, in plui de distruzion dal ecosisteme fluviâl, ancje un cambiament sostanziâl dal ambient, che al à incidût a fuart su la biodiversitât.
◆ Aes pocis a son leadis diviersis speciis animâls e vegjetâls. Par chest, l’autôr al à condusût un studi cirint di capî cemût che chestis componentis ambientâls a influissin, tal arc dal an, su la presince dai vertebrâts.
◆ A son stadis metudis in confront, midiant di un monitorament bienâl cun rilêfs fats dôs voltis al mês, dôs areis che si cjatin intai comuns di Soclêf e di Denemonç, cun disponibilitât idriche diferente: inte prime, a son dôs pocis di aghe permanentis, inte seconde no je aghe.
◆ A part i risultâts che a tocjin in gjenerâl la composizion des comunitâts animâls e lis lôr variazions tal arc dal an che chi no son specificâts, dal confront al è saltât fûr ce che o ripuartìn culì sot.

  • Anfibis: ogni mês il numar di speciis al è stât plui grant inte zone cu lis pocis, dulà che cun di plui il numar totâl di speciis cjatadis al è stât plui alt dal 50% a pet di chê altre aree. La diference e je stade favoride di elements leâts ae aghe, come la Mandraula Ichthyosaura alpestris e il Crot Pelophylax kl. esculentus/lessonae, che a mancjin dal dut inte aree cence aghe.
  • Retii: ogni mês il numar di speciis al è stât compagn o plui grant inte zone cu lis pocis, dulà che cun di plui il numar totâl di speciis cjatadis al è stât plui alt dal 25% a pet di chê altre aree. La specie che à fat la diference e jê chê dal Madrac di aghe (Natrix natrix), cjatât sedi intes pocis che dulintor di chês.
  • Uciei: viodudis lis lôr carateristichis, ogni mês lis diferencis plui grandis a son evidenziadis dai uciei massime intant des migrazions, cuant che a passin speciis leadis ae aghe; chestis a son stadis contadis dome dongje des pocis (par esempli Airons, Masurins, Agarûi). Ogni mês, il numar di speciis al è stât plui grant inte zone cu lis pocis, dulà che il numar totâl di speciis al è stât plui alt di cirche il 17% a pet di chê altre aree.
  • Mamifars: viodût il metodi di studi che nol permet di rilevâ la gran part di chei di dimensions plui piçulis che, pe lôr ecologjie, se presints a varessin podût furnî elements di diversitât, lis dôs areis a son risultadis similis, ancje se cuntun numar totâl di speciis plui grant di cirche il 14% te aree cu la aghe. L’element di diferenziazion plui evident a son i rescj des predazions dal Morson o Spuç (Mustela putorius, che e je une specie leade ae aghe), cjatâts dongje des pocis.
Crot
Crot

Su la fonde dai risultâts, si à podût verificâ che i anfibis a son chei che a son plui influençâts de aghe; subit dopo a vegnin retii, uciei e mamifars.
◆ Il studi al à evidenziade la impuartance des pocis permanentis tant che element doprât dai uciei intant des migrazions, tant che lûc riprodutîf di cualchi specie di anfibis e frecuentât par motîfs alimentârs di speciis di retii e di mamifars leâts ae aghe. Par ciertis speciis tant che il Crot ma ancje il Spuç, lis pocis – intun setôr des Vals dal Tiliment a dal Lumiei dulà che la aghe e je scjarse par colpe di captazions idrichis – a son puescj indispensabii pe sorevivence.
◆ In conclusion, ce che al è saltât fûr dal studi al à mostrade la impuartance che a àn ancje lis superficiis piçulis cuviertis in maniere permanente de aghe intal “mantignî” ciertis comunitâts di animâi e, di consecuence, un bon nivel di biodiversitât. Duncje, ancje su la fonde de lôr impuartance par cierts grups di invertebrâts e di vegjetâi e par motîfs di caratar paisagjistic, storic e culturâl, a coventin tutelâts chescj biotops puartantju a di un regjim di protezion totâl prime che la indiference complete e lis modificazions ambientâls peadis al abandon e ae variazion des pratichis agriculis e/o ae urbanizazion dal teritori lis fasin sparî.
◆ Par podê fâ cun sucès ce che al è ripuartât intes ultimis considerazions, al covente un cambi radicâl di vision; di fat – cemût che l’autôr al à podût verificâ in plui ocasions – cuant che a son stâts fats lavôrs di “sistemazion” tes paluderis cul risultât di produsi un ambient “artificiâl” che al à pôc a ce fâ cun chel origjinari(par esempli cun canai e pocis petonadis e intervents su la vegjetazion), la vision comune e je stade chê di vê sistemade une zone “sporcje”, “disordenade”, “plene di jerbatis” e altri: chest al sotintint un miorament dât de azion dal om. Bisugne però considerâ che chel che al somee “sporc” o “disordenât” al è la consecuence dai fatôrs naturâi, che dal sigûr no àn bisugne dal om, e che jenfri chês “jerbatis” a cjatin cjase tantis speciis animâls e vegjetâls che a contribuissin a mantignî alte la biodiversitât e a conservâ il sisteme dulà che al vîf ancje l’om. ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +