Sfuei Mensîl Furlan Indipendent
Archivi de Patrie

TERITORI – PORDENON. Fich, ecelence al figomoro

............

Tal confin plui ocidentâl dal Friûl lant bande dal Venit, intun teritori che plui voltis te sô storie al è stât teatri di invasions e concuistis frontadis e vintis da la braurose e fuarte int dal puest, si cjate une frazion di paîs, Saron di Cjanive, li che la int e je famose par jessi buine di cûr e libare.
In chest teritori masse, pôc cognossût, ancje la nature e je une vore siore e gjenerose tant che da lis visseris de mont, in tre lûcs difarents (Gorgaç, Santissime e Saron) e salte fûr une aghe di risultive, insiorade di sâi minerâi, che e alimente il cors dal Livence, confin naturâl de Patrie.
Cheste aghe, chi prime di vignî fûr a 10 grâts si purifiche dilunc cunicui e misteriôs terens cjarsics, e ven fûr e e devente l’element di fonde di une bire artigjanâl produsude dal famôs microbirifici «Valscura».
Plui che un birifici, un progjet nassût dal desideri di fâ un alc di unic e speciâl, disleât da lis logjichis dal mercjât e da la produzion di masse, plaçât intun lûc di crude e integre bielece naturâl de pedemontane di Pordenon e disvilupât in gracie di un ingredient particolâr (la aghe) cuntune purece e une cualitât organoletiche come chê di une aghe minerâl naturâl.
Un prodot di ecelenze chi a dispiet di une nassite relativementri resint, al à bielzâ vût il ricognossiment tant che bire dal an 2008 (premi da la «Unionbirrai») par la varietât Fich. Cheste e je une bire «season» di degustazion, fermentade in boce e aromatizade al «figo moro» une tipologjie di fîc tipic che al cres dome te zone di Saron, intun particolâr microclime; il fîc in cuistion al è caraterizât di une forme une vore slungjade rispiet a la variant tradizionâl cuntune polpe tenare, disavide e une vore plui dolç. Chestis carataristichis si tradusin in savôrs e profums in bocje. E merte di jessi ricuardade ancje la variant «Canipa», une bire chi come te Ete di Mieç e ven confezionade cuntune insiemit di speziis, cereâi, misturis di spelte e vuardi che a lassìn in bocje un savôr ruspiôs e plen.
Produzion limitade e di grande cualitât, fate di une famee cun grande passion, semplicitât e cuntun grant rispiet par nature e tradizions di un teritori cun storie impuartante.
Sandri Olivetto

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +