TERITORI – Par sloven l’ort al e’ ancje zardin, asîl e… zoo

La peraule slovene doprade par dî “ort” e je vrt, che però e pues stâ ancje par “zardin”. E cussì vrtnar al è sei l’“ortolan” che il “zardinîr” (chel stes al vâl par vrtnarica, “ortolane” o “zardinire”).
Ma i esemplis dal ûs di vrt e dai tiermins che i divegnin te lenghe slovene a son cetancj, e cualchidun al pues someâ un pôc strani. O vin, par dî une, botanicˇni vrt (“ort botanic”) come chei di Lubiane, Maribor, Sežana e chel te valade di Trente dilunc dal Lusinç, ma ancje živalski vrt, che al vûl dî nuie di mancul che “zoo” (il significât leterâl al sarès “zardin dai animâi”). Po si pues olmâ che vrtnartsvo al sta par “zardinaç”, ma bisugnarès studiâ insot il parcè che “asîl” si dîs vrtec, val a dî “piçul zardin, zardinut”… Forsit, a jessi triscj, si podarès sostignî che, se al esist un zardin pai fruts piçui, al è just che ‘ndi sedi un ancje pai animâi (o il contrari): in ducj i doi i câs si trate di zonis centadis di dulà che no si pues saltâ fûr!
Cul ort, o ben vrt, al à a ce fâ ancje il balon, stant che il stadi di Maribor, la seconde citât de Slovenie dopo la capitâl Lubiane, al è clamât Ljudski vrt, ven a stâi “zardin dal popul”. E chi al è clâr, nissune cuestion: il zardin al è stât centât par podê zuiâ di balon là dentri.
Alessio Potocco