Il plui impuartant cuotidian sloven, il Delo, al à fevelât di presenecˇenje, ven a stâi di “sorprese”. No je falade, anzit: a falâ – e di brut – a son stâts i scandais dai istitûts di pueste, che fin a un pâr di setemanis prime des elezions a viodevin il Sds (il Partît democratic al podê) devant di ducj cun plui dal 30%. E invezit, ancje se dome par 12 mil e 600 vôts, a vinci a son stâts i Socialdemocratics (Sd) dal prin ministri jentrant Borut Pahor: 30,5% pal Sd cuintri dal 29,3% dal Sds di Janez Janša, cjâf dal guvier dal Dicembar dal 2004. Par dî il vêr, nancje Janša sal spietave, e al à subit fevelât di un pas indaûr viers la ideologjie dai agns passâts (lei: comunisim) par dute la Slovenie.
Dopo mancul di cuatri agns, duncje, il centriçampe al torne a cjapâ in man il guvier di Lubiane. Ve ca cemût che a saran distribuîts i seçs te gnove Cjamare di Stât (Državni Zbor par sloven): 29 seçs pal Sd, 28 pal Sds, 9 par Zares (formazion di centriçampe che e à cjapât il 9,4%), 7 pal Desus (partît dai Pensionâts cul 7,5%), 5 seçs pal Sns (Partît nazionâl di drete estreme che al à vût il 5,5%), 5 pe liste unide Sls-Sms (Popolârs e Partît dai zovins cul 5,2%), 5 ancje pe Lds (Liberâi democratics, al 5,2%). Fûr ducj chei altris partîts sot dal 4%, limit previodût dal sisteme eletorâl proporzionâl in vore in Slovenie pes elezions parlamentârs. Dodis in dut lis feminis elezudis, une in plui a pet de legjislature passade. Te Cjamare a àn cjatât puest ancje il sindic di Gnove Gurize Mirko Brulc (Sd) e chel di Pleç Danijel Krivec (Sds).
Sucès personâl duncje par Pahor, che al è rivât adore a puartâ il so partît dal 10% al 30% in cuatri agns; il Sds al à mantignût i siei vôts, mintri che a pierdi a son stâts i aleâts di centridrete, tacant di Gnove Slovenie (NSi) dal ministri Bajuk, che si è dimetût la sere stesse des elezions stant che la sô formazion e je restade fûr dal parlament.
Fasint i conts, il centriçampe (Sd, Zares e Lds) al à 43 seçs sui 90 totâi de Cjamare; par meti in pîts un guvier stabil Pahor al à di tirâ dongje ancje il Desus (te ultime legjislature tal guvier Jansa) e la liste unide cui Popolârs e il Partît dai zovins.
Ancje in cheste ocasion, come cuatri agns indaûr, i eletôrs slovens a àn pandût il lôr disinterès viers la politiche di cjase. La afluence e je stade dal 62,3% (a son lâts a votâ dome un milion e 57 mil di lôr suntun milion e sietcent mil). Aes parlamentârs dal 2004 al le a votâ il 60,5%.
Alessio Potocco
___________________________________
Cui che al è Borut Pahor
Borut Pahor al nas ai 2 di Novembar dal 1963 a Postumie. A 15 agns al è za membri de Zoventût socialiste de Slovenie: duncje a son juste 30 agns che Pahor al à a ce fâ cu la politiche. Tal 1987 si lauree in politologjie; doi agns plui tart al è il membri plui zovin dal Comitât centrâl de Leghe dai comuniscj de Slovenie. Tal Zenâr dal 1990 al è presint a Belgrât in ocasion dal ultin congrès de Leghe dai comuniscj de Jugoslavie, congrès cetant innomenât par vie che la delegazion slovene e le vie prime dal timp, bandonant i lavôrs in polemiche cu lis posizions dai politics serps: di li a pôc al sarès tacât il sfantament de Jugoslavie.
Simpri tal 1990, a 27 agns, Pahor al è za deputât te Cjamare di Stât di Lubiane, li che al è simpri stât elezût fin in dì di vuê; tal 1995 al è a cjâf de comission pai Afârs forescj, tal 1996 invezit al ven nomenât vice president de Cjamare di Stât.
Tal 1997 al cjape il puest di Janez Kocijan?i? tant che president de Liste unide dai Socialdemocratics, cumò clamâts dome Socialdemocratics. Dopo des elezions dal 2000 lu sielzin tant che president de Cjamare di Stât, cjarie che al ten fin cuasi ae fin dal mandât.
Jenfri il 1993 e il 2000 al è stât a cjâf de delegazion slovene tal Consei di Europe. Lis elezions europeanis dal 2004, lis primis pe Slovenie, a puartin Pahor tal parlament di Strasburc, li che al fâs part dal grup socialdemocratic. Al è membri di diviersis comissions e ancje de presidence dai partîts socialiscj europeans. (A. P.)
_______________________
“Plui tutele pe minorance slovene in Carinzie”
Al è stât un sucès eletorâl pal partît di centriçampe Zares, peraule che, voltade par furlan, e vûl dî “Pardabon, Pardavêr” (a pro di un gnûf mût di fâ politiche). Un dai siei leaders, l’ex ministri dai Afârs Forescj Ivo Vajgl, al à daurman esprimût la volontât di risolvi la cuestion dai confins cu la Cravuazie prime de jentrade di Zagabrie te Ue. Ma Vajgl al cjale ancje di là des Alps: secont lui il guvier Janša no si è dât da fâ avonde pe minorance slovene che e vîf in Carinzie, e dut câs e sarès ore che Viene e Clanfurt a aplichedin ad implen lis normis di tutele, tacant di chês rivuart la toponomastiche bilengâl tes localitâts li che e vîf la minorance. (A. P.)
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +