TERITORI – Divari digjitâl (digital divide) des monts di Pordenon

Daspò ducj i proclamis e lis buinis intenzions pandudis de passade zonte regjonâl par ridusi il «digital divide» (o ben, il divari digjitâl) e puartâ la bande largje e la television vie cabli ancje tes vals, i abitants de mont pordenonese si jerin cuasi iludûts di jessi mancul penalizâts. Ma passâts i proclamis e lis bielis promessis, i fats, cun buine pâs de int, a son lâts in maniere cetant difarente.
ANTENIS_ Intant, la regjon a à dade la pussibilitât di conetisi vie «wireless» (cence fîi), ma nancje cheste no samee la miôr des soluzions; prin, parcè che il segnâl al fâs fature a rivâ e e coventarès plui potence, e daspò parcè che intun invier come chel che o stin vivint (che al sarès dal dut normâl, ma che al è dal sigûr stramp se o cjalìn la ande dai ultins agns), cun tante nêf e tantis precipitazions, lis antenis a van distès sot la nêf e, di conseguence, si rive a un vêr e propri black out des comunicazions e a un isolament dal mont. Comuns tant che Claut, Cimolais, Nert e Cjas ma ancje Frisanc e altris, ancjemò vuê no àn la bande largje, e chei imprenditôrs che a àn sielt di no scjampâ vie des monts si cjatin a cjalâ viers il doman savint di jessi penalizâts tal disvilup e jessint costrets in cualchi câs a doprâ la classiche linie ISDN cun coscj alts e prestazions bassis. Cualchi imprenditôr te zone di Budoie, pûr di vê une mieze bande largje, al è obleât a cjapâ il segnâl wireless dal Venit, che – si ben che al passe parsore dal Plan dal Cjaval – al rive a jessi plui fuart e comut di chel furlan.
CUALCHI SOLUZION_ Ma alc si môf! Tal gnûf programe di intervents par puartâ la bande largje tes areis di mont, a son in moviment i lavôrs pe linie ADSL (rêt publiche e privade) di prime gjenerazion tai comuns di Montreâl, Vaiont, Fane, Cjavàs, Midun, Travês e Pinçan. In fase di finiment ancje i lavôrs tai comuns di Frisanc, Tramonç Disore e Disot, Vivâr, Darbe, Sequals, Cjistielgnûf, Clausêt e Vît.
In vie di progjetazion a son lis liniis di Andreis, Barcis, Claut, Cimolais, Nert e Cjas, li che ancje la linie telefoniche normâl no passe vie cabli ma vie aerie (cui problemis che si à vûts indiment parsore).
Miôr a vadin lis robis intal distret dal curtìs e te zone industriâl di Spilimberc, li che ancje in gracie de UE, jenfri il 2011 a varessin di jessi ativis lis liniis ADSL di tierce gjenerazion (plui di 50 Mb/s).
In chescj agns, tancj imprenditôrs e privâts citadins a àn scrit letaris e fat miârs di telefonadis par spesseâ a rivâ a une soluzion dai problemis, ricevint in cualchi câs rispuestis mortificants: «noaltris o sin une aziende come tantis e o vivìn di faturât; di conseguence o metìn implants li che al conven». …Ma alore, cui vevial dit che la ADSL e veve di rivâ prime intai paîs disasiâts?
Sandri Olivetto