TERITORI – In Slovenie Internet al è di mode

Il rapuart jenfri i Slovens e l’ûs dal computer al pâr che al sedi une vore fuart e vivarôs. La prove nus rive des ultimis cifris su chest cont: il numar di chei che a van a dâ un cuc su internet al è plui che dopleât in pôcs agns, passant dai 600 mil dal 2001 al milion e 300 mil dal 2007 (e no vin dubis che une tindince di cheste fate no stei lant indevant ancje cumò). Numars che dal sigûr a pandin la «computerizazion» dal paîs nestri vicin: su doi milions di abitants, chest al vûl dî che almancul doi slovens su trê a son usâts a doprâ dispès la rêt. In cheste classifiche, la Slovenie si cjate a jessi al puest numar 69 tal mont, mintri che – par chel che al inten la numerositât de sô popolazion – e je al numar 146.
Ma a Soreli Jevât no usin «navigâ» e vonde, impen a vuelin cjatâsi fûr un propi spazi, sedi che si trati di une aziende, sedi che si trati di un privât cu la passion dal computer. Une stime e dîs che in dì di vuê in Slovenie a son regjistrâts plui di 134 mil dominis; di chescj plui di 65 mil a àn il codiç dal paîs, vâl a dî «.si». Par cont dai dominis, la Slovenie e je indaûr te Union europeane, stant che e je dome al vincjesimcuart puest su 27 paîs, dut câs si cjate ae posizion 57 a nivel globâl.
Lis fameis a vê in cjase un computer a son dôs su trê; pôc plui di metât invezit (54%) a àn internet. Fra chei che no lu àn, un su cuatri al dîs che no i covente, il 16% par vie che nol sa cemût che si dopre, il 14% parcè che nol pues permetisal par vie dai coscj.
A doprâ cun regolaritât la «rêt des rêts» al è il 58% dai slovens jenfri i dîs e i 74 agns di etât: la fasse che plui e va su internet e je chê dai zovins che a àn dai dîs ai cuindis agns. Di chei che a «navighin», cuasi un tierç al cjape part a cualchi forum, il 24% al à chê di «çatâ» e un 10% al dopre il pc par telefonâ e par viodisi cu la videocjamare. Invezit, cuatri su dîs par solit a discjamin de rêt cines, musiche e materiâi video; un su cuatri al scolte musiche, e un su cinc si coleghe par viodi un canâl televisîf.
Stant che l’86% cent di cui che al dopre internet lu fâs in cjase, si pues rifleti suntun dât che al rivuarde la sigurece: dome il 30% dai slovens jenfri i 16 e i 74 agns al à discjamât un program par protezi il so pc dai virus, mintri che, par esempli, in Danimarche lu à fat il 60%.
Ancje lis aziendis slovenis a crodin te informatizazion: il 96% di chês che a àn fin a nûf lavoradôrs al dopre internet. Di chês parsore i dîs impleâts, il 62% al à ancje un so sît.
Alessio Potocco