TERITORI – AUSTRIE. La nêf: l’aur dal turisim invernâl in Austrie

Passe il 70% dai turiscj invernâi al ven par schiâ_ Se si cîr il significât dal tiermin «nêf» intune societât, a disin che par viodi trop che e je impuartante al basti contizâ il numar des peraulis che si doprin par indicâle. Chel dai eschimês che a cognossin centenârs di tiermins al è dome un mît: il grant numar di peraulis par indicâ la nêf al è une conseguence dal sisteme polisintetic de lôr lenghe, che al fâs in mût che une frase lungje e vegni esprimude cuntune peraule uniche. In Europe, tra i plui esperts di cheste materie a son i austriacs, almancul te part alpine, te Basse Austrie, Burgenland, mentri che a Viene o vin mancul nêf, anzit masse pocje.
I ultins agns a àn mostrât che la nêf e je in crisi, di conseguence in Austrie si investissin sumis grandononis tai implants di inevament, scuasit tant che in dut il sisteme di teleferichis. Anzit, tal futûr la nêf e costarà di plui che no lis teleferichis. I motîfs a son palês: ancje se o vin vude la sorprese di chest Otubar cu la prime nêf ancje a Viene, si scuen deventâ indipendents dai «capriçs» de nature. Dutis lis previsions alfin a fevelin di mancul nêf naturâl intai prossims agns.
Industrie di nêf cuintri ambient_  La Austrie e je un dai paîs cul plui grant numar di turiscj invernâi tal mont, passe il 70% di lôr a vegnin par schiâ – e cence nêf, nuie bêçs. Cuintri il sisteme di inevament al fevele il consum alt di energjie eletriche e di aghe. La energjie necessarie par un metri cubi di nêf artificiâl e je tra un e dîs KW. Dome i implants tirolês a disgotin ogni an un cuart de cuantitât di aghe che al ven consumât dai 120.000 abitants di Innsbruck.
Un particolâr interessant: in dut il mont la cualitât de aghe di balneazion e je suficiente, in Tirôl si domande dome aghe potabil, almancul al è positîf però che in Austrie no si doprin gran aditîfs, dome aghe.
Pionîrs dal schi alpin_ La Austrie e je une dai pionîrs dal schi alpin e e à un rûl clâf in chest sport. Tor dal 1870, il sport al rivà de Norvegje intes regjons alpinis, dulà che la Austrie e à zuiât un rûl significatîf pal svilup tecnic. La figure centrâl de rivoluzion de tecniche dal schi tes Alps al fo Mathias Zdarsky, nassût in Moravie intune isule linguistiche storichementri todescje di Iglau; dopo Zurì e Munic, si spostà a Lilienfeld, in Basse Austrie. Tal 1890, al svilupà l’atac di schi di açâl moderni – la »Lilienfelder Stahlsohlenbindung» –, che al rint pussibil doprâ i schîs ancje in condizions estremis. Il 19 di Març dal 1905 al à organizât sul Muckenkogel a Lilienfeld la prime gare di slalom di schi: Zdarsky al vincè e al deventà cussì il prin vincidôr te storie des garis di ski. Lui al è ancje l´inventôr dal sac di bivac.
No dome i schîs, ancje i implants di risalide a son stâts doprât par prin in Austrie: la prime costruzion te storie e jentrà in funzion tal 1907 sul Bödele, in Vorarlberg. Il produtôr di Dornbirn Otto Hämmerle al fasè costruî tal 1907/1908 a sôs spesis un proto-skilift pai ospits dal so albierc. Naturalmentri chest prototip nol è paragonabil ae risalide di vuê: al jere pluitost une specie di slite, che si tirave sù cuntune cuarde. In gracie di chest svilup primiedi sul Bödele, o podìn dî che il sport e il turisim dal schi al nassè in Vorarlberg, sul Bödele e sul Arlberg.
La lavine, testimonie di un passât retoroman tes Alps_ Simpri atuâl il pericul des lavinis scuasit in dutis lis regjons de Austrie: ancje se la plui grande catastrofe e je stade a Galtür, al pues sucedi in dute la regjon alpine. Tal 1999, une lavine a passe 300 km/h e rivà tal Jamtal a Galtür, e e copà 38 personis. Plui di 2000 agns indaûr, tal 218 p.d.C., Anibal al à pierdût propit in cheste regjon la metât dai siei oms (cirche 20.000).
La peraule furlane »lavine« e je viere e e diven tant che lis variants retoromanis diretementri dal verp latin „labi«: sbrissâ, sgliciâ. Propit cheste forme retoromane e je jentrade te regjon alpine alemaniche te lenghe todescje, e di là ancje indevant tes lenghis slavis, tal ongjarês e v.i. I austriacs a àn puartât ator pal mont cheste peraule retoromane.
Janez Erat