TELEVISION, CINE E TEATRI. Finalmentri tant furlan par television… di 30 agns za fa

Pierdude une pontade di “Caric e briscule”, il mitic program curât e presentât di Dario Zampa su Telefriuli? Cence recuperâ lis vecjis VHS che cumò nissun nancje no lis à plui, la soluzione e je cirî une gnove ufierte dal digjitât terestri. Daspò dal switch off, Telefriuli e à screât il so secont canâl: sul 622, si cjate “Telefriuli Archivio”. Inmagjinis, programs, presentadôrs e looks di altris timps: un passât autoprodusût e cumò visibil. E ae fin, par dîle dute, chest “Archivi” e je la uniche ocasion che o vin par viodi alc in lenghe furlane, denant de puare ufierte dal panorame gjenerâl. Ancjemò di plui cul rivâ dal Istât, che al met sot naftaline ogni forme di creativitât catodiche.
La idee – di par se – no je masse origjinâl: e fâs “man basse” tai scantinâts de emitente di Tavagnà. E e torne a proponi lis mitichis trasmissions che a àn costituît la sô stesse memorie e decretât il so sucès. Chê stesse emitente che, tai prins agns Setante, e foderà il canâl de Ledre di fîi e di centralinis, par vie che e voleve costruî la prime television vie cabli in Italie. Chê TV che e veve soredut sul imprin un so precîs impegn e une mission: pandi la furlanetât, culture e lenghe, e peâ la programazion al teritori e ae int. Il prins palinsescj a ricuardin programs tant che “Flôrs, prose furlane”.
Il sburt lu de ancje Valter La Tona, diretôr di Tf tai agns Ottante e vuê president di une societât di rêts televisivis a Rome.
Chest gnûf canâl nus darà la pussibilitât di viodi cemût che o jerin e ce che o sin deventâts. O tornarìn a viodi i prins gjornaliscj e presentadôrs: Lorenzo Petiziol cu lis sôs rubrichis di balon; lis telecronachis des partidis di Pietro Micoli; “Fogolâr”, zûc a premis tra scuelis mediis. O pûr, apont, “Caric e briscule”, varietât cun zûs e quiz e “Joibe furlane”, program di intrateniment che al meteve a confront i paîs dal Friûl. Chescj ultins simpri presentâts di Dario Zampa. Cun cjavei plui cotonâts e plui neris, cjamesis di fieste cul golet a pic e bregons a gjambe largje. Altris timps. Dome Zampa al reste simpri in onde.
Redazion