TAL ETERE. E je tornade la vôs des nazions cence stât

L’an gnûf al à puartade une gnove a Radio Onde Furlane, o miôr le à tornade a puartâ, parcè che al è tornât a partî Internazionalitari. Di fat, dopo passe un an di sospension, e je di gnûf in vore la trasmission di Radio Onde Furlane (www.ondefurlane.eu) dedicade aes nazions cence stât e aes comunitâts minorizadis europeanis.
Il program al va in onde ogni cuindis dîs il martars a undis di matine e, in repliche, il miercus a une dopodimisdì.
«Magari cussì no, lis dificoltâts economichis che la Radio si è cjatade a frontâ par vie de politiche de aministrazion regjonâl e che a jerin daûr de decision di fermâ ancje cheste trasmission no son inmò superadis» al spieghe Carli Pup de redazion gjornalistiche di Rof e responsabil dal program «ma alc si à mot e cussì si à decidût di tornâ a tacâ». Adun cu la trasmission radiofoniche al è di gnûf in vore ancje il blog (internazionalitari.blogspot.com) che, pe ocasion, al è stât rignuvît ancje dal pont di viste grafic. Cun di plui, l’ultin post di cheste ripartence in date 21 di Zenâr al ricuarde Txillardegi che o ripuartìn in part chi sot.
«La sperance e je chê di rivâ, almancul ogni tant, a insiorâ il blog ancje cun altris materiâi rispiet a chei de trasmission» al siere Carli Pup. ■
REDAZION