MOSTRIS. Cjarte e ingjustri. Une mostre a Cividât

La mostre “I mestris dal Nûfcent. La rapresentazion de figure umane in Friûl-Vignesie Julie” a palaç de Nordis a Cividât (che e à vût, fin cumò, plui di 5 mil visitadôrs) si insiore di une gnove sezion: “Il ritrat e la figure, cjarte e ingjustri”. E je une selezion des oparis grafichis stampadis in scuasi 40 agns di ativitât di Federico Santini te sô stamparie d’art.
Lis oparis selezionadis (a son esponudis incisions di Giuseppe Zigaina, Paolo Comuzzi, Franco Dugo e Virgilio Tramontin, tant par ricuardâ cualchi non) a vegnin fûr de esperience, de passion e dal impegn di un mestri d’art che, fin sul imprin de sô cariere, al à furnît lis sôs competencis tecnichis, cun buinegracie e umiltât, a ducj i plui grancj artiscj furlans, lavorant ancje fûr dai confins de Patrie. La stamparie e je stade par decenis un lûc di lavôr, ma ancje di incuintri, di scambi, di dialic e di confront tra artiscj, poetis, critics e apassionâts d’art che a àn fat incressi il panorame culturâl de regjon e che cumò a insiorin la esposizion, dant plui struments di leture pe storie culturâl e artistiche dal Friûl tal Nûfcent.
La sezion, tant che la mostre che e fâs part, si podarà visitâ fin ai 18 di Març, di joibe a domenie, des 11 di matine aes 6 e mieze dopomisdì. Informazions al numar 0432/731540. ■
Erika Adami