Segnaitsi la date: domenie ai 5 di Otubar ai Colonos “La Patrie dal Friûl” e clame dongje la comugne dai siei colaboratôrs e letôrs, intun moment di fieste che al è aromai deventât un “classic”: si trate di “Stin dongje a la Patrie”, un apontament di no pierdi par ducj chei che a vuelin ben ae nestre riviste, e soredut ae nestre tiere.
◆ Trê agns indaûr cualchi musicist, atôr e scritôr al veve pensât di pandi la sô vicinance al unic gjornâl che dal 1946 al puarte indevant in marilenghe la vôs dai furlans che no si rindin, dantsi dongje e inmaneant une serade spetacul che e coventàs a rifleti sul rûl de informazion libare par furlan pe cressite de culture e de societât di chenti. E je stade une propueste perfete par mostrâ che ducj chei che a fasin riferiment ae cussience identitarie furlane a vevin bisugne di metisi dongje dopo de pandemie che e veve sierât ducj inte lôr cove, e cheste idee e à cjatât daurman un bon acet. Lis primis dôs edizions lis à ospitadis il Teatri Sant Zorç a Udin, dulà che tancj artiscj a son vignûts a poiâ la nestre bataie comunitarie: dut câs l’an passât o vin sielzût di puartâ la fieste al viert e nus è someât che i Colonos a fossin il puest just, une farie di ideis e di identitât che e à sburtât la cussience e la cognossince dal Friûl e dai furlans.
◆ Al è stât un moment bielonon dulà che tantis associazions e personis impegnadis pal Friûl a àn contade la lôr esperience, dulà che si è fat il pont su lis plui impuartantis iniziativis in vore inte anade e, soredut, si è fat fieste cun biele musiche, leturis e sunadis e cuntun ghiringhel di gale. E viodût il biel sucès, la repliche tal 2025 si scuen fâle parcè che la sensazion e je chê di un event necessari par coltâ lis nestris lidrîs.
◆ Chest an, in gracie de Associazion culturâl Colonos, la Cuarte edizion e sierarà il program de storiche rassegne Avostanis. E par cheste edizion – oltri ae colaborazion dal Istitût Ladin Furlan e di Glesie Furlane – o vìn za vude la adesion di tancj nons dai monts de culture, de musiche, des associazions, dal sport, intun program che dut câs al è ancjemò in vie di definizion. O varìn bielis sorpresis come la presentazion des gnovis iniziativis de “Patrie” e des sôs associazions amiis, e sarà cun nô la Nazionâl feminine furlane di balon, o fasarìn il pont sul stât de culture furlane cun autôrs impuartants come Tullio Avoledo, Angelo Floramo e Laurin Zuan Nardin, vincidôr dal Sant Simon 2024, e nons di ponte dal mont musicâl furlan come Andrea Del Favero, Leo Virgili e Nicole Coceancig, oltri al Gruppo Flokloristico Caprivese Michele Grion. In cheste ocasion no mancjaran il dibatit e la riflession sui temis de identitât furlane, e su la lote par difindile: a partî dai segnâi che a marchin la apartignince a une comunitât. Ma al sarà prin di dut. Ma al sarà prin di dut un moment di fieste e amicizie, des 3 dopomisdì fin che il soreli al larà a mont. Us spietìn. Steit dongje ae nestre “Patrie”, che e je un patrimoni di ducj i furlans. ❚
