Sfuei Mensîl Furlan Indipendent
Archivi de Patrie

Stâts Gjenerâi dai coregjonâi in Americhe Latine: protagonist… il puart di Triest

............

.

Intal mês di Març si son davuelts I Stâts Gjenerâi dai coregjonâi de Americhe Latine in Argjentine, a Buenos Aires. Une delegazion dal guvier regjonâl vuidade de presidente Serracchiani e dal assessôr ae culture Torrenti e à incuintrât i emigrâts furlans in Americhe dal Sud, in Argjentine e Uruguay. Presints ancje i rapresentants des associazions dal F-VJ che a viodin dai coregjonâi che a son vie pal mont. Sui gjornâi si à fevelât di chest dome par vie che Debora Serracchiani, vie pal viaç, e à incuintrât rapresentants dal guvier argjentin par pandi la impuartance dal puart di Triest e par cirî di inviâ altris acuardis economics. Chê altre notizie che si à savût e je stade che il sindic di Triest Di Piazza al è stât rapinât a Buenos Aires intant che al jere in machine cu la femine e il puartevôs. Di chel che si à fevelât vie pai Stâts Gjenerâi nol è stât scrit piç. Une mancjance curiose, stant che propit i nestris emigrâts a son stâts la puarte par rivolzisi in maniere privilegjiade viers di chei Paîs di bande de numerose delegazion vignude dal Friûl-Vignesie Julie. Nissune peraule, par esempli, a proposit dal document presentât dai Fogolârs de Americhe Latine li che si presentavin une serie di istancis su dirits e promozion. Cuistions che, di ce che o sin rivâts a savê, no àn vût cetant acet di bande dai sorestants regjonâi. Dut câs, nus somee interessant publicâ chestis richiestis par savê ce che a pensin e ce che a volaressin chescj “furlans de altre bande dal mont”. Velis…
Ae Zent.me Presidente Serracchiani, Preseât Assessôr Torrenti, Rapresentants des Associazions dai Coregjonâi tal mont (…) la nestre comunitât organizade intai Fogolârs us propon vot ponts che o calcolìn strategjics par consolidâ lis nestris azions sul continent e aprofondî il rapuart cu la Patrie dal Friûl. (…) Chescj vot ponts si sintetizin dentri di doi macro temis.
DIRITS E DOVÊS CIVÎI
O domandìn il rinovament de Leç 379/2000 dal Parlament talian Ricognossiment de citadinance taliane ai dissendents di residents nassûts intai teritoris in chê volte cjapâts dentri tal imperi austroongjarês al moment de migrazion par ricognossi la italianitât dai emigrâts partîts tra il 1876 e il 1920 cun passepuart austriac. Par chest motîf, tancj dai dissendents di personis emigradis dal Friûl orientâl o dal Friûl de Basse no puedin ancjemò acedi al dirit di citadinance taliane.
Facilitâ l’acès ae citadinance taliane intai consolâts ridusint lis proceduris burocratichis e fâ sù struturis buinis pal trasferiment di certificâts di nassite di comuns e parochiis dal Friûl.
O riclamìn il dirit di rapresentance intal Consei Regjonâl tant che furlans citadins tal forest e il dirit di votâ e di jessi votâts tes elezions regjonâls, cemût che al sucêt a nivel nazionâl.
O proponìn la creazion di un Ufici de Regjon F-VJ in Argjentine, Brasîl e Uruguay, stant il numar di dissendents di furlans, pal distrigament di ats e di pratichis di vari gjenar.
O proponìn ae Regjon F-VJ che dutis lis associazions che a domandin finanziaments regjonâi a sedin obleadis a jessi costituidis in entitâts ricognossudis de leç e che la assegnazion des risorsis e sedi corelade a strent al numar dai membris, determinât in mût afidabil.
INIZIATIVIS CULTURÂLS, DI FORMAZION E DI COOPERAZION INTERNAZIONÂL:
Cressi la ufierte di oportunitât di formazion in Friûl pai zovins, pai professioniscj e pai adults di origjin furlane e favorî l’interscambi cui zovins furlans resident in Friûl-VJ.
Favorî progjets e scambis tra associazions furlanis e imprenditôrs furlans in diviersis parts dal mont, furnint i struments mediatics che a coventin.
Promovi progjets di cooperazion internazionâl tra i paîs sede de emigrazion furlane, la Regjon F-VJ e la Union Europeane, calcolantnus tant che partner strategjics. ❚
✒ Dree Venier

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +