SPECIÂL. Une Academie… tal Ateneu

Tor de metât dai agns Novante a Udin a si son dâts dongje un pôcs di students e di altris zovins intune associazion che si clamave Academie dal Friûl.
Cemût che al diseve il so statût “Il Circul Universitari Furlan nomenât “Academie dal Friûl” si met sù in associazion culturâl cence fin di vuadagn, cul intent primari di promovi l’implei professionâl de lenghe furlane, il disvilup di une fuarte cussience identitarie dutune cu la difese dai dirits e dai interès dai students furlans tal gjenerâl…”
La osservazion di Albert Travain, prin dean de Academie dal Friûl, e di chei altris socis e jere che par che la lenghe e la identitât furlane a lessin indevant e a vessin un sens, al coventave che il furlan al fos doprât in ducj i cjamps, e plui di dut in chei fondamentâi dal lavôr e dal studi e si viodeve te universitât la scune ideâl par inviâ chestis dinamichis.
Cussì, cun pôcs mieçs ma cun tant impegn e diviersis ideis origjinâls, la Academie dal Friûl, ancje se no je mai rivade a tirâ dentri o a fâ partecipâ un grant numar di students o di zovins, e je stade protagoniste tal proponi ativitâts par furlan dentri di un Ateneu udinês che in chei agns al jere ancjemò indaûr su la cuistion de lenghe.
Par esempli, si veve vierte la schirie di studis “Erois par un popul”, su figuris impuartantis pal lôr valôr simbolic pal popul furlan e a jerin vignûts fûr doi scrits: un su Marc di Morùs, ultin puartebandiere dal Friûl patriarcjâl, e chel altri su Rotgaut, ultin duche langobart dal Friûl. Cun di plui la Academie e organizave conferencis, presentazions, e ancje il prin cors di furlan fat par furlan te Universitât dal Friûl, une sorte di letorât volontaristic tignût di Sandri Carrozzo, che al è stât dean de Academie dal Friûl dopo Travain. Travain intant al à mantignût il so impegn cuntune altre iniziative impuartante: la cure de publicazion, simpri cun pôcs mieçs, dal sfuei udinês “La Sclese Nere”.
La Academie dal Friûl e jere in dialic e in colaborazion ancje cun Radio Onde Furlane, che in plui ocasions i à dât spazi par trasmissions radiofonichis, e cun chês altris clapis dal mont furlanist tal inmaneâ iniziativis tant che Eurolenghis, te Fiere dal Libri di Pordenon, o lis variis edizions de Fieste dal Friûl pai 3 di Avrîl.
Tai ultins agns la Academie dal Friûl e à pierdût par diviersis resons la poie de plui part dai socis storics, che dispès a son deventâts figuris di prin plan tal moviment pe lenghe e pe identitât furlane, si è slontanade de dimension universitarie e, par tancj aspiets, fintremai di chê furlaniste.
Redazion