SPECIÂL. Parcè che l’ateneu no si clame Università del Friuli

Il prin a doprâ  lis peraulis “Universitât furlane” al fo il prof. Joseph Gentilli, docent di gjeografie te University of Western Australia, intun articul publicât tal 1965 sul Boletin de CCIAA di Udin cul titul “Per una Università friulana”. Di li indevant, dutis lis rivendicazions pe istituzion de Universitât, fintremai ae propueste di leç di iniziative popolâr dal 1976 – dulà che a forin cjapadis sù ben 125.000 firmis –
a fevelarin simpri e dome di “Università del Friuli-Universitât dal Friûl”.
Cuant che però il Parlament al fasè bon il proviodiment istitutîf de Universitât, midiant de leç 546 dal 1977, tant che non uficiâl al saltà fûr “Università di Udine”.
IL PARCÈ DAL CAMBIAMENT DAL NON_ La spiegazion uficiâl dai politics e fo che te tradizion academiche italiane i nons des universitâts a cjapavin simpri il non de citât. In realtât nol jere propit cussì: za tal 1972 e jere stade metude in pîts la “Universitât de Calabrie”, e daspò a saressin stadis cetantis ancjemò lis Universitât cuntun non no peât a di une citât. La vere motivazion, invezit, e jere soredut politiche: la gnove Universitât no veve di fâ ombre a chê di Triest e se si fos clamade “Universitât dal Friûl” e varès vude implicitementri la benedizion par pandi la sô jurisdizion ancje su lis Provinciis di Pordenon e di Gurize.
MA TE LEÇ ISTITUTIVE SI FEVELE ANCJE DI FRIÛL_ E je, salacor, la uniche consolazion pai promotôrs de Universitât furlane. Te leç, di fat, si dîs che l’Ateneu furlan “si pone l’obiettivo di divenire organico strumento di sviluppo e di rinnovamento dei filoni originali della cultura, della lingua, delle tradizioni e della storia del Friuli”. O crôt, dut câs, che al sedi rivât il moment pe Universitât di fâ un belanç di trop e cemût che e à mantignût fede fin cumò a chescj siei obietîfs.
SI AIAL FAT ALC, DOPO, PAR DÂ AE UNIVERSITÂT IL SO “VÊR” NON?_ La uniche iniziative che o cognòs par gambiâ in vie normative il non de Universitât e je stade proponude tal 2001 di Pietro Fontanini, cuant che al jere deputât, cul disen di leç 1430 su “Modifica della denominazione dell’Università di Udine in Università del Friuli” (firmât ancje di Ballaman, Collavini, Lenna, Moretti, Romoli e Saro), ma – magari cussì no – il ddl nol è lât indevant. Une altre iniziative e je stade metude in vore di Honsell tal 2006, in ocasion de Fieste de Patrie dal Friûl, cu la scree di dôs targhis cu la scrite “Universitât dal Friûl” tes jentradis di Palaç Florio e di Palaç Antonini. Dal sigûr un at impuartant, ma plui dal pont di viste simbolic che formâl, stant che pardut si continue a lei dome “Università di Udine” e che un doman lis targhis a podaressin sei rimovudis cence problemis di sorte.
William Cisilino
President dal Istitût Ladin Furlan “Pre Checo Placerean”