Sfuei Mensîl Furlan Indipendent
Archivi de Patrie

SPECIÂL – Liet, une idee in musiche pe Europe

............

Liet e je une peraule frisone che e vûl dî «cjançon». Propit i frisons a àn inventât chest festival, partint dal inizi cu la idee di une formule che e rivàs a meti adun lis variis minorancis di Europe te organizazion dal plui impuartant event european di musiche in lenghe minoritarie.
LA FORMULE_ La formule di chest concors, che e reste compagne ancjemò ‘in di di vuê’, e je une vore semplice: dîs grups e artiscj invidâts a rapresentâ altretantis minorancis linguistichis, a sunin un toc par om vignint judicâts di une jurie cualificade e dal public.
Lis primis trê edizions dal festival si son tignudis a Leuwardeen, la capitâl de Frisie, e a son stadins vinçudis intal 2002 dal grup catalan Pomada, intal 2003 dal grup sami norvegjês Transjoik e tal 2004 di Niko Valkeapaa, simpri de minorance sami.
Daspò di un an di pause tal 2006, il festival si è tignût a Ostersund, inte Laponie meridionâl, dulà che, une altre volte, a son stâts i sami, tant che parons di cjase, a vinci cul duo Joahn Kitti e Ellen Sara Baher.
I FURLANS AL LIET_ In trê des primis cuatri edizions, o vin di segnalâ la presince dai grups furlans Prorastar, Kosovni Odpadki e Arbe Garbe che, dopo di vê superade la dure selezion jenfri i tancj grups  che ogni an a partecipin, si son plaçâts simpri viers la metât de classifiche finâl.
Chestis primis edizions a son coventadis ancje a coinvolzi diviersis realtâts di minorance che, aderint al progjet, si son impegnadis a organizâ une fase semifinâl tal lôr paîs.
A son nassûts duncje il festival Nos Ur che, a Inverness in Scozie, al ten dentri ducj i artiscj des lenghis celtichis; il Sami Grand Prix che al met adun lis minorancis scandinavis e laponis, e Suns, inmaneât di nô furlans pes minorancis talianis e dal arc alpin.
LA ULTIME EDIZION_ Daspò de ultime edizion a Lulea in Svezie, e di un bon plaçment al tierç puest de bande dai furlans Carnicats, il festival al torne une altre volte in Frisie prime de edizion scozese dal 2010.
Dilunc cheste edizion frisone, e je stade uficialmentri formalizade la candidature dal Friûl,che finalmentri si prepare a ospitâ chest grant event intal 2011.
Leo Virgili

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +