Sfuei Mensîl Furlan Indipendent
Archivi de Patrie

SPECIÂL – Cuant che ancje il strument al è difarent

............

Arpe celtiche

Fra lis nazions minorizadis che ogni an a partecipin al Liet Festival (il festival pes cjançons in lenghe minorizade) a ‘ndi è cualchidune che e à, inte sô culture musicâl, ancje cualchi strument tipic. La culture plui rapresentade di chest pont di viste e je chê des minorancis di riunde celtiche. Inte monede di un euro stampade inte Republiche irlandese si pues viodi par esempli une biele arpe celtiche. La arpe celtiche (clàrsach in gaelic scozês o cláirsach in gaelic irlandês) e je une arpe plui piçule di chê doprade inte musiche classiche, cence pedâi e cun cuardis di nylon o di carboni che si puedin sunâ ancje cui dêts, cence doprâ lis ongulis come che si è obleâts a fâ inte arpe classiche. Chest strument al jere doprât in Scozie, in Irlande, in Gales e in Bretagne. La arpe celtiche e à cognossût un periodi di grant sflandôr in Irlande fin al Sietcent. Dopo de muart di Turlough O’Carolan intal 1738 e je scomençade la decjadence. La riscuvierte de arpe celtiche e je scomençade inte seconde metât dal Nûfcent. Un musicist di ricuardâ inte riscuvierte de arpe celtiche e dal repertori tradizionâl al è il breton Alan Stivell.
IN GALLES_ Inte musiche celtiche galese e je doprade ancje la arpe triple galese, un strument pôc cognossût e une vore dificil di sunâ. Simpri de culture musicâl irlandese si à di ricuardâ il bouzuki irlandês, un strument simil ae ghitare, cun cuatri cuardis doplis.
Bodhran
Bodhran

PERCUSSIONS_ Par chel che al rivuarde lis percussions, il strument tradizionâl princip al è il bodhran, un tambûr di forme circolâr che al ven tignût in man e sunât cuntun piçul toc di len staronzât di dutis e dôs lis bandis, clamât tipper. Ancje chest strument al è stât riscuviert inte seconde metât dal Nûfcent in gracie dal gnûf interès viers de musiche irlandese e dal lavôr di grups tant che The Clancy Brothers o The Chieftains. Altris doi struments tipics de musiche celtiche irlandese di ricuardâ a son dal sigûr il tin whistle (feadóg o feadóg stáin par gaelic) e lis uilleann pipes. Il prin al è un flaut fat di late o di len e cuntune estension di dôs otavis. Al è forsit il strument di musiche irlandês plui cognossût e plui doprât, ancje al di fûr de musiche tradizionâl. Lis uilleann pipes invezit a son une sorte di baghe li che l’aiar nol ven furnît midiant de bocje dal sunadôr, come tes cuarnamusis scozesis par esempli, ma di un soflet picjât tor de vite.
Ghironde
Ghironde

HEVIA, DA LA GALIZIE_ Un strument de stesse famee des uilleann pipes e je la gaite galiziane, che in realtât i somee di plui a une classiche cuarnamuse. Un sunadôr di gaite che al à vût un grum di sucès ancje fûr dal marcjât de musiche folk al è José Ángel Hevia Velasco, plui cognossût semplicementri tant che Hevia. Un altri sunadôr di gaite, ma ancje di altris struments tradizionâi e antîcs, une vore cognossût al è il galizian Carlos Núñez. Un altri strument di ricuardâ e je la ghironde, un strument a cuardis doprât inte musiche tradizionâl di diviersis zonis de Europe e in particolâr inte Ocitanie. Un grup che al à intal sô organic la ghironde al è chel dai ocitans Lou Dalfin. La particolaritât di chest strument al è che il sun al ven produsût di une ruede che e ven in contat cu lis cuardis intant che e je metude in moviment dal sunadôr (e di chi al ven un altri dai nons dai strument, chel di viole a ruede).
Launeddas
Launeddas

IN SARDEGNE_ Un strument tipic de Sardegne a son  invezit lis launeddas, un strument polifonic une vore antîc formât di trê cjanis di misure e di spessôr diferent che a finissin cu la cabitzina, dulà che il sunadôr al sofle. Il bas (basciu o tumbu) al è dât de cjane plui lungje che e fâs une uniche note continue, chê toniche che e da la intonazion a dut il strument. La seconde cjane (mancosa manna) e à la funzion di fâ lis notis di acompagnament. La tierce cjane (mancosedda) e ven doprade par produsi lis notis de melodie. Par sunâ lis launeddas si à di doprâ une tecniche particolâr di respirazion che e ven clamade respirazion circolâr che e permet di sunâ un strument a flât cence interuzions intal flus di aiar.
Txalaparta
Txalaparta

IN EUSKADI, ALBOKA E TXALAPARTA_Un altri strument che par jessi sunât al à bisugne de respirazion circolâr al è l’alboka, un clarinet dopli tipic de musiche dal Paîs Basc. Finìn chest piçul (e incomplet) viaç intal mont dai struments musicâi tipics simpri intal Paîs Basc, ricuardant il txalaparta, un strument une vore particolâr simil a un xilofon ma fat dut di len, che al ven sunât di dôs personis doprant cuatri bachets di len.
Matteo Fogale

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +