SPECIÂL – I sucès musicâi des lenghis mancul pandudis

Musichis strambis, suns che a rimandin a altris culturis. In cierts câs, lenghis mai sintudis. Ma inmagantis. Tant inmagantis di rivâ a sburtâ i tocs musicâi in classifiche e fâju deventâ sucès internazionâi.
I TAZENDA_ Se si pense dome al festival di Sanremo – che al reste la uniche vetrine musicâl taliane nomenade tal forest – al ven indiment il câs dai “Tazenda”, il grup sart che al gjoldeve de colaborazion di Pierangelo Bertoli e che, fuart di une gnove clausule dal Regolament, al à doprade la lenghe sarde par proponi “Spunta la luna dal monte” (version taliane de lôr “Disamparadose”) e, l’an dopo, “Pitzinnos in sa gherra”, scrite cun Fabrizio De André. De stesse clausule a àn gjoldût i plui piturâts “Pitura freska”, che tal 1997 a àn cjantât “Papa nero” in dialet venit. Meteore, a Sanremo Giovani tal 1993, ancje il grup che al doprave la fevele di Asti, i “Farinei dla brigna” (i galiots dai brundui): masse inovatîfs e duncje subit fats fûr.
VIE PE EUROPE_ E sul front internazionâl, cemût dismenteâ la cuarnamuse eletriche dal asturian Hevia, che al sunave dome e nol diseve peraule? Tal 1998 al à publicât il prin album “Tierra de nadie” (jessût cul titul “No Man’s Land” in cualchi paîs), che dome in Spagne al à vendût un milion di copiis. Di citâ ancje il cjant gregorian, che secont il progjet discografic “Enigma”, al è stât tornât a lei in clâf pop e house. Musichis etnichis, sonoritâts scuris, spirituâls e musichis sacris, dentri dal album MCMXC a.D., deventât une piere miliâr de musiche “New age”. Si sin impratichîts ancje cul grêc, recitât dal filosofi Manlio Sgalambro in “Di passaggio” (1997) di Franco Battiato.
Lis lenghis dal Est a son invezit chês plui refudadis de discografie. Un esempli su ducj. Tal 2003, trê fantacins – i O-zone – a jessin cuntun toc destinat a butâ jù il mûr di chel che nol rivave a sei scoltât ancje viers soreli a mont. Si intitule “Dragostea din tei” e al ven publicat dome in Moldavie e in Romanie. Ma l’an dopo, al à il bot european par cure di une soubrette, une cierte Haiducii. L’an passât, la stesse cjançon e je stade adiriture campionade di Rihanna e T.I. par “Life your live”. Bis.
SANREMO PLUI TERITORIÂL_ Vuê che si fevele di lenghis regjonâls, si pense adiriture a di un festival di Sanremo ancjemò plui viert aes espressions teritoriâls e locâls,  cuntune sezion ad hoc dentri tal concors. Tantis lenghis in gare, par sielzi la “vere” cjançon plui biele dal Paîs. In timps di magre, i discografics si zuin ancje cheste cjarte, par rilançâ la kermesse. Ma no le viodarìn in tele, presentade de Clerici: e sarà une manifestazion paralele di contorni.
Oscar Puntel