Sfuei Mensîl Furlan Indipendent
Archivi de Patrie

SPECIÂL – Liet: il prossim an in Scozie

............

Brian Ó hEadhra al è un ecletic e preseât musicist e organizadôr di events, nassût a Dublin. Cumò al vîf a Inverness in Scozie dulà che si ocupe de organizazion di Nòs Ùr, la semifinâl dal Liet che e rivuarde lis lenghis celtichis. Lu vin intervistât tant che organizadôr de prossime fase finâl dal Liet che tal 2010 si tignarà propit in Scozie.
Brian, tu stâs lavorant di tancj agns cu lis lenghis minoritariis e lis culturis tradizionâls: cemût âstu disvilupade cheste cussience?
Jessint cressût in Irlande o soi simpri stât tal mieç des lenghis gaelichis e o soi simpri stât consapevul di trop che a son preziosis pe nestre identitât celtiche. Gno pari al è un cjantant irlandês e la plui part des primis cjantis che o ai imparât a jerin propit in gaelic irlandês. O ai simpri scombatût par permeti aes lenghis celtichis di cressi e di disvilupâsi e cumò, in gracie dal Liet, o soi rivât a cognossi int di altris minorancis e a imparâ tant des lôr esperiencis. O stin ducj lotant pes nestris identitâts unichis e e je pardabon dure intun mont dominât dal imperialisim culturâl angloamerican.
Lis culturis celtichis e scozesis a cjapin dentri diviersis regjons e stâts: sintîso pardabon lidrîs comuns?
Si, o sint che o sin ducj dongje, ma cualchi volte si imberdeìn tai nestris problemis individuâi,  cence lavorâ insieme. Par chest, o soi une vore leât al concors Nòs Ùr (www.nos-ur.eu). E je une ocasion par tignînus ducj adun e viodi ce che al sucêt tes altris senis musicâls e linguistichis.
E rivuart ae sene musicâl tes lenghis celtichis?
Le sene musicâl celtiche e je in salût. O vin tancj grups e artiscj che a scrivin musiche e a fasin concierts, no dome tai lôr paîs di apartignince, ma ancje ator pal mont. O vin di dî che la plui part de musiche e je peade ae tradizion ma simpri di plui la int e tente di “normalizâ” lis lenghis e di confrontâsi cun altris gjenars musicâi. Jo o suni cun trê grups difarents che a doprin ducj il scozês, il gaelic e l’inglês. A son: www.myspace.com/fionamackenziemusic, www.myspace.com/brianoheadhra e www.macgregor-brechin-oheadhra.com.
Il prossim an, la Scozie e darà acet al Liet International. Vêso za une atenzion de bande dai media e dal public su chest event?
Par dî il vêr o stin ancjemò risolvint il probleme dai finanziaments a chest event. O vin vût tancj tais par colpe de crisi economiche, duncje o vin di stâ une vore atents. Il grant lavôr al rivarà propit il prossim an. Sperìn che il spetacul al sedi trasmetût in television e vie internet. Insome, lis robis di fâ a son tantis.
Cuai sono i aspiets plui divertents e chei plui noiôs che e compuarte la organizazion di un festival come chest?
Le robe plui biele dal organizâ un event di chest gjenar e je le int che tu incuintris. Al è biel savê che tu stâs fasint alc di bon pe tô lenghe, pe tô culture e pal puest dulà che tu vivis. O combatìn ducj lis stessis bataiis e o cirìn il miôr pe nestre int e pai nestris artiscj. Cualchi volte i incuintris a son pardabon divertents pes manieris cussì difarentis di fevelâ inglês che o vin.
Ce che no mi plâs al è cirî bêçs e scugnî preocupâmi di vê int. O stoi cirint di meti adun un team di lavôr par garantî che il Liet 2010 al sedi un grant sucès!
Par sierâ, ti domandìn un auguri al Friûl pe nestre candidature a ospitâ il Liet intal 2011…
No viôt la ore di formalizâ cheste candidature tal cors de prossime edizion dal Liet, e o speri sincerementri che il Friûl al rivedi a ospitâ il Liet tal 2011. O sarai il prin a comprâ un biliet par visitâ le vuestre bielissime regjon. Buine fortune!
Leo Virgili

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +