SPECIÂL. La pagjele dai retôrs

L’articul 26 de leç 546/77, istitutive de Universitât dal Friûl, al dîs che l’Ateneu si pon l’obietîf di “deventâ un imprest organic dal disvilup e dal rignuviment dai filons origjinâi de culture, de lenghe, des tradizions e de storie dal Friûl”.
I retôrs che a son sotentrâts in chescj trente agns (lassant fûr par cheste volte l’ultin, Cristiana Compagno, che si è sentade su la cjadree plui alte dome tal mês di Mai stât), cemût àno soreintindût a cheste finalitât di fonde de istituzion?
(n.c.) Il prin retôr, si ben dome dal pont di viste aministratîf, al è stât Bruno Cadetto che al jere il president dal Consorzi pe costituzion e il disvilup dai studis universitaris a Udin, e che tal ‘78 al à inviât l’an academic. La sô incariche e je durade trê mês e cun altris pinsîrs.
(12/30) Dopo di lui, e àn cjapade la sente Antonio Servadei (1978-1979), Mario Bonsembiante (1979-1981) e Roberto Gusmani (1981-1983), e sul lôr cont no si cjate che a vedin cjapât iniziativis concretis.
(15/30) Cul 1983 al è rivât tant che retôr Franco Frilli, che al à vuidât l’Ateneu par nûf agns, fintremai tal 1992 e in chest timp al è stât prontât il Statût. In chel test si cjate un prime olme significative de ‘traduzion’ dal detât legjislatîf. Tal articul 1, di fat, il riferiment dal art. 26 de leç 546 a “culture, lenghe, tradizions e storie dal Friûl” al ven strucât intune uniche peraule, ven a stâi “culture”. Si lei duncje che l’Universitât cu la sô ativitât e à di contribuî  “al disvilup civîl, culturâl, sociâl e economic dal Friûl”.
(22/30) Si à di spietâ Marzio Strassoldo (retôr dal 1992 al 2001) par vê il prin imprest pardabon operatîf in cjamp universitari a pro de lenghe e de culture furlanis. Tal 1995, di fat, par sô volontât e dutun cul Consorzi Universitari dal Friûl, al nas il Cirf (“Centri Interdipartimentâl di Ricercje su la culture e la lenghe dal Friûl – Josef Marchet”). Vâl a dî, un motôr di iniziativis, di studis e une struture di coordenament tra docents e ricercjadôrs interessâts al disvilup de lenghe e de culture. Si che, Strassoldo si pues nomenâlu tant che un retôr che si à cjapât a cûr il mandât origjinari de leç istitutive.
(21/30) Su lis sôs olmis si è mot Furio Honsell (2001-2008) che in cualsisei moment public nol à mai mancjât di vê un voli di rivuart pe lenghe e le à simpri doprade te vierzidure dai agns academics.
Vuê te Universitât dal Friûl a son atîfs un cors di lenghe e di leterature ladine; un cors di lenghe e culture furlanis; un cors di antropologjie (che al cjape dentri storie e tradizions); un puest di ricercjadôr. L’Ateneu, par dongje, al paie la impiegade dal Cirf e, in curt, al varès di zontâsi ancje une figure tecniche.
(18/30) Valutazion finâl. Se l’impegn formâl e sostanziâl a pro de lenghe e de culture furlanis di fat al è, ce che plui di cualchidun al rimarche al è il fat che di bêçs siei la Universitât no ‘nd à po metûts cuissà ce tancj, massime par chel che al rivuarde i investiments. Di fat, la plui part des iniziativis e dai progjets e je stade realizade cu lis domandis, fatis chês sì dal Ateneu, par otignî i finanziaments de leç regjonâl 15 dal ‘96 e de leç statâl 482 dal 1999, e cul jutori dal Consorzi Universitari dal Friûl.
Antonella Lanfrit