Sfuei Mensîl Furlan Indipendent
Archivi de Patrie

SPECIÂL. La Confederazion ladine jenfri lis dôs vueris

............

O vin provât a imagjinâsi cemût che al podaressial jessi nassût un stât furlan, plui precisamentri ladin, daûr de utopie di Tellini. Ve ca une ipotesi “fantastoriche ” di cemût che al podeve sucedi.
1918: E finìs la prime vuere mondiâl, i rapresentants furlans e ladins a Viene a domandin la autodeterminazion dal popul furlan. La idee e jentre ad in plen tes prospetivis dai tratâts di pâs, ma il Ream di Italie al è contrari: si tache a fevelâ di vitorie mutilade. I parlamentârs furlans a Rome, nomenâts dal re o elets de minorance plui siore a cirin di taiâ cheste idee sul nassi, ma za cualchidun di lôr al è avonde clip te fedeltât ae Italie, di fat no dome tal Friûl orientâl, ma ancje in chel regnicul a cjapin simpri plui credit lis posizions dai socialiscj di vecje ispirazion austromarxiste che a jerin antiinterventiscj. Di chê altre bande i popolârs furlans, sostignûts in bloc de glesie, a tachin a cjalâ di bon voli la division de Italie, caraterizade di un spirt anticlericâl profont. In chest dibatiment a deventin fondamentâls lis ideis di un inteletuâl prime pôc cognossût, Achille Tellini, che al teorize la formazion de Confederazion dai Popui ladins, tant che bariere pacifiche tra l’espansionisim talian e lis potencis gjermanichis. La idee di base e je acetade di Stâts Unîts, France e Ream Unît.
1919: daûr dai tratâts di pâs l’esercit talian al à di lassâ dutis lis posizions a Est de Livence. La esasperazion de popolazion locâl dopo trê agns di vuere e la disilusion dai soldâts a convincin i alts uficiâi a rispietâ la volontât internazionâl. No son rârs i câs di diserzion di militârs talians che a decidin di restâ in Friûl par contribuî ae nassite de Republiche Furlane.
Sot di Achille Tellini si forme une assemblee costituente che e fisse la costituzion de gnove republiche. Tal stes moment ancje tes dolomitis si forme la Republiche Dolomitane che si coordene cun chê furlane e cu la Confederazion Elvetiche, par formâ la Confederazion dai Popui Ladins, che si articole tant che struture sorenazionâl, li che cun autonomie a jentrin Friûl, Ladinie dolomitane e a son tratativis avanzadis cu la Svuizare par fâ entrâ i Rumançs dal Cjanton dai Grisons.
A Ovest la Italie e jentre intune crisi postbeliche serie, cun disordins sociâi e un slanç socialist ae rivoluzion; di cuintri si vierç la tierce vie, tra marxisim e capitalisim, dade dal fassisim. A Est al è il Stât dai Slovens, dai Cravuats e dai Serps che si rezarà in forme monarchiche; a Nord la Austrie, ancje chê costituide in Republiche.
1920: Lis primis elezions a segnin la vitorie dal Partît Socialist Ladin-Furlan, al è president de Republiche Zuan Minut, di Visc, su la onde di un fenomen che al è fuart in dute Europe. A nivel confederâl tes Republiche Dolomitane a vincin i popolârs: al è elet president confederâl Achille Tellini. Di fat lis singulis republichis a restin indipendentis e la confederazion e à dome comeptencis monetariis e di politiche internazionâl.
In Friûl, ancje se alis plui radicâls a volaressin la proclamazion de proprietât coletive, la linie gjenerâl e je chê des riformis che a jerin za tacadis sot de Austrie, cuntun dialic vîf ma in gjenerâl no violent tra Socialiscj e Popolârs. Si disvilupe il cooperativisim e si sosten la formazion de piçule proprietât. Si formin ancje lis primis veris industriis, plui di dut te zone orientâl de Republiche, e in mont, par ripaiâ in part lis zonis plui batudis de vuere.
1922: Cuntun colp di Stât il Fassisim al cjape il podê in Italie: tra i ponts dal program fassist e je la espansion a Est e a Nord, fermade intun prin moment de diplomazie internazionâl. In Friûl e je avonde pôre devant de menace de invasion taliane, par chest e ancje pes dificoltâts de riprese economiche, fate plui dificile ancje de crisi di ducj i stâts dongje, e je une fuarte emigrazion in France e in Sudameriche.
1927: Il president Minut al reste ferît intun atentât, che si suspiete organizât di circui fassiscj. Il so puest al ven cjapât di un guvier di sigurece nazionâl menât di doi consui, Achille Tellini, pari de costituzion, e di Egjidi Ferui, ducj i doi gjeolics.
1930: Il program dal regjim fassist talian di slargjâsi a Nordest al pues infin inverâsi, tra pocjis protestis internazionâls, plui di dut de Austrie, dal Ream di Jugoslavie e de France. La dissoluzion de Confederazion dai Popui Ladins e des sôs republichis e torne comude pe Italie par resons nazionalistichis e pe Glesie Catoliche Romane che e condanave il dialic masse viert tra i catolics furlans e i socialiscj e la pericolose culture laiche che e caraterizave la republiche. Ancje il Ream Unît, subite pintût pai efiets che la politiche di ricognossiment des piçulis nazions e veve vût in Irlande, al veve gjavât la sô poie al Friûl. La ocupazion e sucêt cence nissune vere bataie: di fat par costituzion la Confederazion no veve un esercit, ma dome cuarps di polizie di frontiere e di vuardiis. La plui part dai politics furlans antifassiscj e va in esili tai stâts dongje e dopo in France, in Spagne e in Americhe meridionâl. Te glesie furlane e je une repression cuintri dai predis filorepublicans e furlaniscj e al ven fat vescul il filofassist Giuseppe Nogara.
Cussì e finìs la Confederazion dai Popui Ladins e la prime republiche furlane, che in ogni câs e reste ancjemò un riferiment te cuistion furlane dopo de seconde vuere mondiâl e fin in dì di vuê.
Sandri Carrozzo

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +