SPECIÂL. Il Dizionari dal cine

Tai ultins agns a son saltâts fûr diviers dizionaris par setôrs gnûfs e di grande atualitât, come par esempli chel ambientâl, chel juridic, chel economic, e v.i.
In particolâr, tal 2000 a firme di Fabian Ros e par cure des Edizions dal Centri Espressions Cinematografichis di Udin, al è stât dât aes stampis il Dizionari dai Tiermins cinematografics. Chest Dizionari si ocupe de terminologjie di doprâ “par discori di cine, par lâ al cine, par fâ cine (e salacor ancje television)”. Al è articolât inte sezion terminologjiche Talian Furlan e in chê contrarie Furlan Talian, ma soredut al è insiorât di une sezion (“Lis peraulis dal cine”) li che si spieghe par furlan, e cun grande precision, il significât dai tiermins plui comuns in chest setôr, judantsi ancje cun dissens, fotografiis e schemis. Come che al dîs Donato Toffoli te prefazion, al è un lavôr che al va cuintri dal prejudizi che la lenghe furlane no sarès adate a situazions e imprescj comunicatîfs contemporanis. Une sfide vincente, parcè che il cine furlan al da bogns segnâi di vivarositât e si slargje ai zovins, la fasse di etât plui “delicade” par chel che al rivuarde l’ûs dal furlan. (L.Pic.)
F. Ros, Dizionari dai Tiermins cinematografics, Edizions Centro Espressioni Cinematografiche, Udin, 2000.
Linda Picco