SPECIÂL – I campions dai tratôrs

«Mi àn robât il tratôr! Mi àn robât il tratôr!»: un berli si jevarà il prossim 20 di Jugn tai cjamps di Vile di Flum. I vecjos Landini o i gnûfs Hürlimann: nissun al varà voie di lavorâ, parcè che a saran in localitât Tavella dulà che si davuelzarà la tape dal campionât talian di Tractor pulling. «Imagjine – a contin i patîts di chest sport nassût in Americhe (e dulà po?) 50 agns fa – un tratôr che al tire une slite simpri plui pesante, fûr par une piste di tiere batude di cent metris. Cui che al rive plui lontan, al vinç». Eh, va là, par tirâ dome une slite… «Viôt – a zontin – che e pues rivâ ancje a 25 mil chilos di pês! A coventin tratôrs une vore potents». Lis machinis dal Tractor pulling a son tratôrs rielaborâts par vê une vore di potence: motôrs plens di «cjavai», ruedis daûr par leâsi al teren e par grampâsi te maniere juste, tant che dispès il pilote al fâs une impenade.
I MIÔR PILOTIS_ Di cualchi an la Tractor Pulling Italia di Parme e organize cheste serade a Flum cui siei pilotis plui brâfs. Cinc lis categoriis: Italian pulling (2,6 toneladis di pês e fin a 8.300 di cilindrade), Prostock (derivâts dai tratôrs di serie fin a 3,5 toneladis di pês), Libero 35 (nissun limit, dome jessi di 3,5 toneladis di pês), Truck (i camions, 8,5 toneladis e 19 mil di cilindrade), Libero 45 (nissun limit, dome jessi di 3,5 toneladis di pês). Sù par jù 40 lis scuadris che a partecipin al campionât. Al è ancje l’innomenât team Lamborghini, cui pilotis Pier Antonio Castelli e Ruggero Massari e il tratôr Squalo (Italian pulling).
UN CAMPIONÂT_ Chê di Flum e sarà la tierce tape dal tour dal campionât talian, daspò Lendinara (Rovigo) e Roreto di Cherasco (Cuneo). Par dut l’istât i tratôrs a viazaran ator pe Italie, fin al gran finâl di San Pancrazio (Parme), ai 20 di Setembar. Cui vinçaraial? Tal Italian pulling, di tignî di voli il Fiat R25 TP, il Fuorilegge e il New Bufalo. Tal Prostock Red Fox, Blue leader e Cervo veloce, mintri tal Libero 35, atenzion a Dragon fire, Sota spirit e Blu tornado. E-Mostar (Truck), Power, Star, Tornado II e Star light express III (intal Libero 45) a sierin la liste. Nons plens di potence e di fuarce, par tirâ la slite plui lontan di ducj. Par savê di plui su chest mont di tratôrs e di garis, clicait www.tractorpulling.it, dulà che o vin cjatât ancje lis fotos di chest articul.
Davide Francescutti