Sfuei Mensîl Furlan Indipendent
Archivi de Patrie

SPECIÂL – Blog: un mût di comunicâ

............

Ce isal un blog? Un blog al è prin di dut un mût di comunicâ vie Web che al è nassût tor la fin dai agns Novante. Si conte che il prin blog al sedi vignût fûr tal Dicembar dal 1997, in gracie di Jorn Barger, un comerciant american passionât di cjace.
In origjin i blog a contignivin un elenc di link e a jerin creâts di int za in stât di disvilupâ un sît web.
LA RIVOLUZION_ A metât dal 1999, al capità un event clâf: e nassè la plateforme «Blogger» e cun chê diviers altris servizis gratuits che a permeterin di publicâ un blog in maniere semplice e svelte. Al nas il blog tant che diari personâl: pinsîrs trascrits e notis personâls. Si formin lis primis «tribûs»; cualchi blog al cjape autorevolece e si jemplin di elencs di links (blogroll) e di elements distintîfs che a mostrin la tribù che i bloggers a vuelin jentrâ a fâ part. Une di chestis tribûs le clamarès «furlanosfere», che il so pont di riferiment al è stât, e par tancj aspiets al va indenant a sei, «ILfurlanist», il blog di Dree Venier. Il segn distintîf de furlanosfere al è l’ûs de lenghe furlane.
PODÊ AE SCRITURE_ Un dai merts dal blog tant che diari personâl al è di vê puartât a une espansion grandonone e che nancje si sperave de scriture, intun moment che la sô sorevivence e jere metude in forsit dal strapodê dal audiovisîf. I blogs a àn in definitive metût in vore une des grandis promessis dal Web. Ven a stâi il fat che un cualsisedi al varès podût deventâ autôr e editôr di se stes, comunicâ e jentrâ in contat cun cetantis altris vôs par mieç de Rêt. Une altre carateristiche dal blog e je la pussibilitât di lassâ coments a chel che l’autôr al à publicât, creant un dibatit.
VIVAROSETÂT E SELEZION_ Tal Setembar dal 2000 si contavin za miârs di blogs e il lôr numar al è lât indenant a cressi svelt. Vuê si contin blogs di ogni gjenar: blogs tematics, alternatîfs, di atualitât, politics, stravagants e v. i.
Di un pôc di timp in ca, la atenzion dal popul dal web e je daûr a spostâsi viers i Social Media (par esempli, Facebook, MySpace) e la incressite dai blogs e je finalmentri daûr a ralentâ, acelerant un procès di «selezion naturâl», ma a son ancjemò un imprest une vore valit di comunicazion.
Dut câs, la robe miôr par capî ben ce che a son
e je dome chê di…vierzint un.
Matteo Baldan

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +