Sfuei Mensîl Furlan Indipendent
Archivi de Patrie

SPECIÂL – La «furlanosfere»

............

La furlanosfere e nas aes cuatri e mieze di lunis ai 26 di Fevrâr dal 2004, cuant che Andrea «Dree» Venier (che daspò al deventarà diretôr di chest gjornâl) al publiche il so prin post su ILfurlanist, blog creât cun Splinder(.com), un servizi di blogging talian une vore popolâr fin a un pâr di agns fa. E di fat, cuasi in contemporanie cun ILfurlanist, al nas trentamarlboro.splinder.com, par man di Gianmatteo Pellizzari, a vuê il blogger furlan (par talian) di plui grant sucès.
ILfurlanist nol è un blog come chei altris. Si trate di fat dal prin blog «fûr par fûr par furlan»: al è un esperiment linguistic e une provocazion.
UN IMPEGN SERI_ Dree al cjape une vore sul seri il so blog e al pueste regolarmentri une o plui voltis in dì, dal lunis ae sabide: la domenie no, parcè che «il weekend no si lavore». I risultâts no si fasin spietâ. Tal zîr di sîs mês ILfurlanist al conte za 10mil visitis e ogni post cinc coments in medie. Intai agns, il sucès dal blog al va indenant a cressi: a Fevrâr dal 2006 al taie il travuart des 100mil visitis, sîs mês dopo al conte 10mil visitis intun mês e doi mês daspò al va sù a cuote  200mil visitis. Dutune cu lis visitis, a cressin i coments e un post dal 28 di Setembar dal 2007 intitulât «Marzio il sgambist» al cjape ben 253 coments, un record che nol è inmò stât superât.
IlFurlanist al devente simpri plui la stele polâr de blogosfere nostrane e ancjemò vuê che il blog al è sierât di cualchi mês, al va indenant a sei un pont di riferiment impuartant par chei che a puestin par furlan.
CHEI ALTRIS_ La furlanosfere e conte a vuê sù par jù une ventine di blogs. Si trate pal plui di blogs personâi, e tra chei si note dal subit par numar di acès chel di Christian Romanini (christianromanini.blogspot.com). Christian al à vût la biele idee di creâ un spazi di dialic in Rêt in ocasion des elezions comunâls di Maian dal 2006. Elezût conseîr comunâl tes filis di Forza Italia, Christian al à decidût di mantignî vîf il blog, inzornantlu cuntune frecuence une vore alte. Un sfuarç, chest, che lu à puartât a taiâ, unic tra i «blogarins» furlans in ativitât, il travuart des 100mil visitis.
Di segnalâ tra i blogs personâi ancje «Brâf Furlan» (furlan.splinder.com), il blog di Stefano Gasti che al pâr che al sedi rivât cumò al so «tipping point», vâl a dî il pont li che alc al sta par cjapâ il svol.
Di blogs personâi interessants e ben fats indi è ancje altris, tant che «Cîl Glaciât» (cilglaciat.blogspot.com) e chel dal Crot (ilcrot.blogspot.com), ma a son ducj penalizâts di une frecuence di inzornament masse basse par atirâ la atenzion dai navigants.
Ae furlanosfere a apartegnin ancje un pâr di blogs tematics: «archeofurlane» (archeofurlane.blogspot.com), dedicât ae archeologjie, e l’enoblog «sommelier furlane» (sommelierfurlane.blogspot.com). Doi blogs puartâts indevant di dôs furlanis coragjosis che a àn decidût di tratâ un argoment particolâr in marilenghe, e chest al rint i lôr lavôrs particolarmentri interessants.
PAL MONT_ In fin, e vâl la pene vê indiment i blogs dai furlans tal mont Norman (furlans.blogspot.com) e Luche (furlansdibaviere.blogspot.com) che a scrivin il prin dal Maryland (U.S.) e chel altri de Baviera (DE); i blogs coletîfs dai Fantats Furlans (fantats.splinder.com) e dal Comitât 482, e il fotoblog di Sandri Carrozzo (sandricarrozzo.blogspot.com) che al à creât ancje il blog atipic Storie Furlane (storiefurlane.blogspot.com), une specie di manuâl di storie locâl in linie.
Ultim nassût de famee al è il blog leterari Contecurte (contecurte.splinder.com), une «ostarie leterarie virtuâl» che la Patrie e à anunciât il so inviâsi il mês passât.
Matteo Baldan

Apontaments / AVÔT DAL FRIÛL

Redazion
Furlans,a son passe 50 agns che si cjatìn a Aquilee la dì de fieste dai sants Macôr e Fortunât palAVÔT DAL FRIÛLe o cjantìn Messe te nestre lenghe, tal spirt di chê libertât che si iludevin di podê respirâ almancul in glesie scomençant a doprâ il Messâl, che al è ancjemò intune spiete penose par […] lei di plui +

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +