SPECIÂL – Lis pussibilitâts par imparâ la marilenghe in linie

Vuê come vuê, la rêt e je deventade un mût par sparagnâ timp e par vê dut a puartade di man. Nol covente plui movisi di cjase par lâ a une lezion. Soredut lis universitâts si son justadis ae tecnologjie moderne e a son cetancj i students che a doprin chescj imprescj. O vin fat un zîr pe rêt par viodi se ancje la lenghe furlane e pues jessi imparade cussì, cjatant trê esemplis.
LA PROVINCIE_ La Provincie di Udin tal 2007 e à screât un gnûf sît www.minud.it cun notiziis storichis, gjeografichis, culturâls, leterariis e normativis sul mont furlan. In chest sît e je ancje une sezion dome di e-learning, ven a stâi une part dedicade a imparâ il furlan on line. Intune maniere svelte e ben organizade si pues imparâ la marilenghe, lis regulis de gramatiche e de grafie uficiâl e fâ la prove di ce che si à imparât cui esercizis che a son dentri, intune sezion di pueste. Si pues ancje inviâ un rapuart diret jenfri student e docent, cussì che l’aprendiment al sedi plui personalizât su lis  esigjencis di cui che al vûl o al à bisugne di imparâ.
LA ACADEMIE_ Scrusignant ancjemò, al è vignût fûr ancje il cors che la Academie dal Friûl e propon tal so spazi su internet. Ae direzion http://www.geocities.com/CollegePark/union/1702/cors.html?20097 si rive drets te sezion dal Cors di furlan. Lis lezions, curadis di Sandri Carrozzo, a son 13 e in plui e je une pagjine su la grafie (Cuistions e regulis pratichis). Chest cors al è prontât plui di dut su la gramatiche e a vegnin frontadis e spiegadis lis parts dal discors intun sisteme clâr e schematic. Tantis lis lezions sui verps (7 su 13), cun atenzion pai mûts e pai timps. Al è interessant lei ancje cualchi coment dentri tal sît de Academie furlane parcè che si cjatin messaçs di int, magari fîs o nevôts di emigrants, sburtâts de voie di imparâ la marilenghe. Par chest e pues jessi une vore buine ancje la version par inglês dal cors, che e je a disposizion simpri in chel sît e che e je stade voltade di Stefania Garlatti Costa.
LA SFF_ La ultime iniziative in chest cjamp, in ordin di timp, presentade sul finî dal 2008, e je stade ativade de Societât Filologjiche Furlane in gracie di une convenzion firmade cu la ARLeF. Tal sît www.lenghefurlane.org a son a disposizion cuarante unitâts ben presentadis e prontadis, dividudis in cuatri percors tematics: lenghe furlane, pussibilitâts di ûs de lenghe furlane, storie dal Friûl, minorancis in Europe. L’obietîf al è chel di rivâ al nivel B2 dal Cuadri European di Riferiment, partint dal nivel B1 des abilitâts dai arlêfs (lei, scrivi, scoltâ e fevelâ). Insom di ogni unitât, a son esercizis par rinfuarcî ce che si à imparât. Il cors al dopre une plateforme pe formazion a distance (e-learning) disvilupade dentri intun progjet di ricercje de Universitât dal Friûl, che e permet tantonis pussibilitâts e in particolâr une interazion docent/arlêf e arlêf/docent.
Elena Zanussi