Slovenka. Il primo giornale femminile sloveno (1897-1902) – Par cure di Marta Verginella, Vita Activa, Trieste, 2019

Un libri interessant par cheste rubriche parcè che al jude a capî miôr la corelazion pussibile jenfri lote des minorancis e lote des feminis, e il dopli rûl di sfrancjament, nazionâl e di gjenar, des ativistis dai popui tibiâts.
◆ Slovenka (“La slovene”) al è stât il tentatîf di meti adun un gjornâl feminin pe cause nazionâl slovene, durât, magari cussì no, pôcs agns, ma rivant istès a puartâ dongje une buine selezion di inteletuâi, ancje oms. La storie dal gjornâl e à vût un sù e jù ideologjic continui: tal imprin plui “neutrâl”, cualchi volte plui dongje aes feminis catolichis, plui inlà a chês socialdemocratichis e progressistis. Stierçadis che i àn fat vê critichis di cualsisei bande, no dome dai conservadôrs, ma in determinâts numars al è rivât adore a jessi un gjornâl feminist, fasint di spieli aes contradizions internis dal moviment sloven des feminis, e in altris dome feminin. Lassant di bande i carûi deteriôrs, Slovenka e je stade une bugade di aiar pal panorame culturâl di chest popul, dant spazi a contribûts poetics, leteraris, politics e a articui difondûts a nivel european ma voltâts in lenghe slovene. E cussì, graciis ai scrits di Verginella e des altris ricercjadoris, il libri al è plui de storie di un gjornâl, ma ancje un aprofondiment de storie politiche e culturâl slovene e su chê des colaboradoris/ôrs (ancje di nivel, tant che Cankar, Murn, Župančič e Trinko). Ma e jere ancje tant altri: tes sôs pagjinis si fevelave di cuistions di caratar internazionâl, dirits, lavôr, educazion dai zovins, e vie indenant.
◆ A no mancjin relazions cul Friûl: no dome pe partecipazion dai slovens dal Friûl orientâl, ma ancje parcè che Gurize, citât simpri stade une vore impuartante pal disvilup leterari e culturâl sloven, e je stade une des primis ipotesis di puest dulà logâ la redazion. Ae fin e je stade sielzude Triest (divignint la prime riviste triestine des feminis pes feminis), altri lûc une vore impuartant pai slovens.
◆ Nol è il spazi par fâ une liste des colaboradoris (in buine part di Triest e dal Litorâl, aree in chê volte plui cosmopolite di Lubiane), però al vâl la pene nomenâ almancul lis dôs diretoris: Marica Nadlišek, zovine slovene triestine, mestre, tradutore e scritore, obleade a lâ vie di Triest tal 1919 daspò de ocupazion taliane; e Ivanka Anžič, plui radicâl e professionâl de predecessore, ative ancje intun periodic feminin seguitîf, il Ženski svet, ancje chel publicât a Triest, fin tal 1929, cuant che al è stât bandît des autoritâts fassistis dutune cu lis altris publicazions in lenghe slovene.
◆ “Nel primo numero questo onore fu riservato alla poesia programmatica del poeta, sacerdote e apostolo del risveglio nazionale nelle Valli del Natisone, Ivan Trinko. Il componimento intitolato “Slovenka” è caratterizzato dalle parole d’ordine “Determinazione – lingua – popolo – patria!”. Questa poesia conferì una particolare enfasi alla presentazione del nuovo giornale, in cui si delineava, nell’ambito del progetto nazionale sloveno, il ruolo di sviluppo, sia pubblico che privato, del processo di emancipazione nazionale delle donne già avviato dalla metà del XIX secolo.” ❚