Daspò 13 agns come alenadore des “Azzurre”,
la tecniche di Cividât e à lassât
la scuadre taliane par avodâsi ae sô societât
Intal 2012, il moviment talian di bale tal zei feminin des personis sordis al jere une vore piçul, cence struturis, cun cualchi clape di frutis che a gjoldevin de pussibilitât di zuiâ, cence obietîfs sportîfs di nivel. Risultâts, competizions, disfidis internazionâls a jerin pôc plui di un sium. In chel moment, par sburtâ adalt il moviment, e coventave une persone che e ves passion, competence tecniche, capacitât di adatâsi ae situazion e che e ves il caratar just par svicinâsi a personis cuntune disabilitât che, almancul in teorie, e rint dificil zuiâ di bale tal zei. Movisi suntun cjamp di basket cence rivâ a sintî ce ce al sucêt, doprant dome i voi par rindisi cont dai moviments che si scuegnin fâ, al è une vore complicât.
◆ Dut câs, nissun probleme par Sara Braida, classe 1982, di Cividât. La persone juste, cul profîl perfet par disvilupâ il progjet e rivâ indulà che, di bot, nissun in principi al pensave. In 13 agns, Braida e je rivade a puartâ la scuadre taliane indulà che, ancje intai siums plui biei, nissun al crodeve. Un cuart puest aes “Olimpiadis cidinis” di Tokyo intal 2025, daspò l’arint dal 2022 in Brasîl, la vitorie intai Campionâts Europeans dal 2021 e une considerazion alte pal lavôr davuelt concuistade in dut il mont. Cumò, Sara e à decidût di lassâ la incarghe par lavorâ cu lis scuadris di club e cu la sô ativitât a Marigliano e Cercola, in Campanie, dongje Napoli. Il moment just par fâ un rindicont di dut.
◆ “13 agns indaûr – e conte Sara Braida – chest progjet al jere dome alc di sociâl, cence nissune smicje sportive. La nazionâl taliane e jere stade metude sù di pôcs mês e, dut câs, intai prins agns no vin vût pardabon nissun risultât. Un pâs par volte, o vin tacât a fâ reclutament, a tirâ sù une clape di frutis cun ambizions e voie di lâ fûr dai solits schemis. O vin aumentât i alenaments e lis ocasions par zuiâ a nivei competitîfs simpri plui alts, fin che i prins risultâts a son rivâts. O soi une vore braurose di dut ce che o vin fat, dal lavôr, dal impegn di dutis lis personis che si son impegnadis ator de scuadre. Il viaç al è stât straordenari. Lis vitoriis a son sodisfazions, il percors fat insiemi par rivâ a cjapâlis al è di no crodi”.
_
Ce ti restie di dut, cumò?
“O soi lade ator pal mont par agns, o ai condividût un sium cuntune clape di personis ecezionâls. O din masse par scontât che la comunicazion e sedi une robe semplice. Vin di pensâsi che, massime intal periodi dal Covid, cu lis mascarinis su la bocje, lis personis sordis no rivavin a lei i lavris. Par chest, a jerin esclududis di dut e no dome intal zuiâ di bale tal zei. Sot dal pont di viste uman, i 13 agns mi an dât une vore. O ai imparât a lavorâ cun sensibilitâts diviersis, o ai capît cemût viodi il lengaç no verbâl a fevelâ intun altri mût”.
_
La Olimpiade… il pont plui adalt?
“O disarès di sì. Il sucès ai Europeans, zuiâts a Pescara, cundut ce che al à lassât a nivel di visibilitât dal moviment in Italie al è stât cetant impuartant. E o pensi che, cun chê vitorie cuintri la Russie, cjapade zuiant intune arene plene di entusiasim, cui tifôs talians a gjoldi cun nô, al è stât di no crodi. E une medaie di aur ti reste par simpri. Dut câs, zuiâ e rivâ a fâ risultâts intune Olimpiade al è il massim pardabon”.
_
Parcè âstu lassât?
“Une sielte che o ai fat jo, daspò di un resonament lunc. O ai pensât che ae Olimpiade a Tokyo o sin rivâts al ultin grât di ce che al jere intes nestris pussibilitâts. Forsit o podevin vinci cualchi altre gare, dut câs o vin fat il massim. Intal sport, come inte vite, si vivin simpri ciclis, cul dovê di cambiâ ogni tant. Tantis voltis, al capite che cualchidun si lamenti di fâ e sintî simpri lis stessis robis, des stessis personis. No varès mai lassât la Nazionâl, parcè che e je une robe cetant biele. Cuant che si rive a un nivel, al è ancje just provâ a mudâ, par tornâ a partî cun altris obietîfs, ancje par cirî gnovis motivazions”.
_
Âstu cualchi dediche?
“O ai dome cetante voie di ringraciâ dutis lis fantatis de scuadre: intai 13 agns, o sin cressudis insiemi. E, clâr, la Federazion Taliane dai Sorts, par dute la poie e la fiducie. Pardabon, une robe di no crodi. E mi plâs ricuardâ e ringraciâ Beatrice Terenzi, Giovanna Franzese e Elisabetta Ferri, lis personis straordenaris che a àn colaborât cun me intal staff tecnic e dirigjenziâl”.
__
Tornistu mai in Friûl?
“Sigûr, dutis lis voltis che o rivi. O ai i miei gjenitôrs a Cividât e o torni a viodi di lôr. E ancje par cjatâ i amîs che o ai di cuant che o jeri frute. Al è simpri un plasê”. ❚
::::::::::::::::::::::::::::::::::::::::::::::::::::::::::::::::
Di zovine zuiadore a Udin, a tecniche di gale ator pe Italie
La esperience come “vuardie” fin in serie A2 cul Sporting Club e daspò une vite suntune bancjute di cetantis scuadris dal Sud.
Sara Braida e à tacât a zuiâ di bale tal zei di frute, intal Sporting Club Udin che, intai agns Doi mil, al faseve la serie A2. Daspò finît di zuiâ, e à tacât a fâ la alenadore in tancj puescj: Pesaro, Salerno, Sorrento e Marigliano. Dal 2012 indenant e je stade la vuide de Nazionâl taliane di bale tal zei des feminis sordis e, intai ultins agns, e à alenât ancje la Nazionâl dal 3 cuintri 3 feminin des frutis sordis. Cumò e lavore ancje come diretore sportive a Cercola, simpri intal ambit de bale tal zei, e cure il setôr dai zovins dal Marigliano Basket, che al à plui di 200 fruts, dal under 13 al under 19. E à decidût di invistî risorsis inte proprietât de clape campane. Cun di plui, e cure diviersis ativitâts come preparadore atletiche e e cure lezions di gjinastiche posturâl cun personis anzianis. ❚
:::::::::::::::::::::::::::::::::::::::::::::::::::::::::::::::
“Tu nus âs cjapadis che no jerin une scuadre, ma dome une clape di frutis. dîs agns daspò o sin stadis sul tet de europe”
Il biel messaç de scuadre Nazionâl a Braida cuant che e à lassât la incarghe. “Par 13 agns tu sês stade le nestre vuide, la sûr plui vecje. Tu âs studiât i schemis miôr e consolât cualchi lagrime. Tu âs ridût cun nô, par sigûr tu âs fate fature e ti disìn graciis pal to impegn di no crodi. Graciis pe serietât che tu âs doprât intal cjapâ la incarghe e pal entusiasim che tu âs simpri pandût. Dutis lis robis a àn une fin, dut câs no finirà mai la stime e i leams che a restin par simpri. Graciis a Sara Braida e a Giovanna Franzese: la Nazionâl di Bale tal zei des feminis sordis e zire une pagjine, ma chês che o vês scrit cun nô no vignaran mai scanceladis”.
◆ Sul profîl social de Nazionâl, lis zuiadoris “azzurre” a àn lassât un messaç une vore biel par Sara e pe sô assistente Giovanna Franzese. Cumò, il gnûf alenadôr de Nazionâl al è Mauro Procaccini, in passât zuiadôr di serie A. Al larà a cirî gnûfs obietîfs, savint che il lavôr fat di Sara Braida al è une base cetant impuartante par fâ sù i prossims risultâts.. ❚
