Daspò dal diviêt dal comissari Zamberletti, invezit dal campionât al è stât pensât un mût
di zuiâ dome cui paîs plui dongje
Il 6 di Mai dal 1976, une zornade sculpide te memorie di ducj i furlans. Un prin taramot distrutîf al à colpît la pedemontane furlane, metint in zenoli dut il teritori ator di Glemone. Daspò de prime scosse, a son rivadis altris, fin in Setembar: mês di corots, disgraciis, di pôre par ducj. Vuê, cincuante agns daspò, si ricuarde un aniversari che al part de culture e de identitât dal Friûl e chei che l’Orcolat lu àn vivût pardabon a son testemonis preseâts di chei timps.
◆ Timps cuant che dut si jere fermât, massime lis ativitâts ricreativis come il sport. Ancje se no dut al è stât pardabon metût in bande. Il mont dal balon, par esempli, in Cjargne al è rivât a cjatâ fûr une soluzion par lâ indenant e dâ ai apassionâts une ocasion di straviament, almancul une volte par setemane, in chel Istât maledet e impussibil di dismenteâ.
◆ Cui, miôr di Renato Damiani, storic gjornalist dal balon dai diletants e anime dal Campionât Cjargnel, nus puedial contâ la storie sportive di chel periodi?
“In chês setemanis al veve di tacâ la edizion numar 27 dal campionât – al conte Damiani –, invezit il torneu nol è stât zuiât parcè che la situazion e jere une vore complicade. Il comissari governatîf, Giuseppe Zamberletti, mandât di Rome a gjestî dutis lis operazions di jutori e dai lavôrs pal prin tentatîf di tornâ a fâ sù la vite di ducj, al à obleât i dirigjents dal balon a fermâ daurman il campionât. E al veve reson: no si podeve zuiâ. Sante scugne, par tignî iniment l’ordin public. Un ordin che ducj a àn rispietât, cence mateâ. Di li, la delegazion de FederBalon di Tumieç e il sô principâl dirigjent, Giacomino Cortiula, che par une vore di agns al à fat il president dal mandament cjargnel de FIGC, insiemi cun Diego Meroi, storic president dal Comitât regjonâl dal balon, a àn pensât di meti adun il Torneu dai Cjanâi cjargnei”.
_
Parcè propit un torneu spartît par cjanâi?
“Parcè che la necessitât e jere chê di no fâ cori sù e jù la int pes stradis. In Cjargne la situazion e garantive ancjemò la pussibilitât di movisi di un paîs a chel plui dongje. I cjanâi a davin chest jutori, par cuistions gjeografichis e di trafic i dirigjents a àn decidût di butâ jù une liste di cinc zirons. Intal ziron A a zuiavin Dimpeç, Audax, Edera, Folgore, Fornese, La Delizia, Rapid e Vile, intal Cjanâl di Soclêf. Intal ziron B a zuiavin Ancora, Ardita, Cedarcjis, Comelians, Davâr, Ravasclêt, Rigulât e Sapade, dutis scuadris dal Cjanâl di Guart e Valcjalde: achì la uniche ecezion al jere il Cedarcjis. Intal ziron C, Darte, Çurçuvint, il Marmi di Timau, i Mobiliârs di Sudri, Paluce, Real Dimponç, il Trelli e la Velox par cjapâ dentri la concje di Tumieç e un cjanton de Valcjalde. Intal ziron D a jerin stadis metudis lis scuadris plui dongje dal teritori indulà che il taramot si è sintût di plui: Scluse, Malborghet, Mueç, Pontebane, Tarvis, val Resie, la Weissenfels di Fusine, tal Cjanâl dal Fier e te Valcjanâl. In ultin, il ziron E, cu lis scuadris plui interessadis dal Orcolat: Bordan, Cjavaç, Dieç, Stele di Glemone, Trasaghis, Val del Lago e Verzegnis”.
_
E cemût ise lade?
“La classifiche finâl dai cinc zirons, daspò 14 zornadis in dut, e à viodût vinci il Dimpeç, cun 24 ponts, 52 goi fats e 12 cjapâts. Intal ziron B al à vinçût il Davâr, cun 23 ponts, 30 rêts e 14 cjapâts. Intal C, prins i Mobilîrs di Sudri, cun 22 ponts, cence mai pierdi, 28 rêts fatis e 8 cjapadis. Intal ziron D, prin il Mueç, cun 18 ponts, 33 goi fats e 10 cjapâts. Infin, intal ziron E, al à vinçût il Cjavaç, cun 20 ponts, 27 rêts e 9 cjapâts”.
_
Cui isal stât il “bomber”?
“Il miôr di ducj al è stât Geni Fachin dal Dimpeç, cun 17 goi. Daûr di lui Graziano Dell’Ins de Velox di Paulâr, Fiore Filaferro dai Mobilîrs di Sudri e Franco Mainardis dal Mueç, cun 12 rêts. Daspò si scuen nomenâ Sandro Clapiz de Edera di Denemonç, Rino Rainis dal Cedarcjis, Renzo Casali de Ancore e Walter Picco dal Mueç, ducj cun 11 goi. A nivel gjenerâl, la scuadre che e à segnât plui rêts e je stade il Dimpeç, cun 52 goi fats. La piês difese e je stade chê dal Scluse, cun 61 goi cjapâts. E il Trelli di Paulâr e je stade la scuadre plui batude, cun 12 partidis zuiadis cence mai vinci”.
_
Ise vere che il torneu al à vude une gjestion dai cartelins une vore pevarine?
“Come simpri. Resonant a ledrôs, mi plâs bati lis mans a Rapid, Mueç e Verzegnis che, cence mai cjapâ un cartelin, a àn vinçude la Cope Dissipline”. ❚
::::::::::::::::::::::::::::::::::::::::::::::::::::::::::::::::::::::::::::::::::::::::
Renato Damiani: un grant spac, massime in Setembar
Il ricuart personâl di Renato Damiani di chei dîs.
“In chel timp, intal 1976, o vevi la gjestion di une pizarie a Tumieç insiemi cui miei cugnâts. Ai 6 di Mai, mi ricuardi une vore ben, al faseve cjaldon, robe di scjafoiâsi, si faseve fature a respirâ. La sale dal ambient e jere plene di int, no jerin puescj libars. Cuant che e je rivade la prime scosse, che o vin sintût ducj cetant ben, dutis lis personis che a jerin dentri il locâl a son ladis fûr di corse. Dut câs, i mûrs a àn tignût ben e nol è capitât nuie di pericolôs, almancul par nô. Si sin cjatâts ducj te strade vecje che e mene a Glemone e, crodimi, la strade e balave une vore. Robis di vê pôre”.
_
Sensazions?
“Cjalant viers la Basse, bande Glemone, o viodevin il cîl colôr ros. Un ros vîf. Plui indenant, fevelant cu la int che si cjatave a Glemone, a disevin ducj che a vevin viodût une fumate blancje: jo, stant a Tumieç, mi ricuardi un colôr ros. Un pinsîr che o ai ancjemò cumò. La mê preocupazion e jere che i clients, intal scjampâ fûr de pizarie, a vevin lassât dut su lis taulis. Bêçs, tacuins, ocjâi, clâfs… Dut. E jere mê responsabilitât, si che duncje o soi tornât indaûr a sierâ il locâl. No pensavi ai laris, dut câs no vevi voie di vê problemis. Di bot, intai dîs daspò, a son vignûts ducj a cjoli lis robis lassadis tal ambient e mi àn ringraciât, parcè che o sin stâts cuasi come carabinîrs”.
_
Ce pinsîrs veviso plui di dut?
“Par nô, l’aspiet plui impuartant al jere lâ a viodi dai parincj, par jessi sigûrs che a fossin in salût. E rivâ a Vile di Tumieç nol è stât cuissà ce comut. Dut câs, cuant che mi soi inacuart che a stavin ducj ben, mi soi cuietât. Intal mês di Setembar, invezit, la scosse des cinc di matine le ai sintude une vore fuarte. In chei dîs o stavi a Tumieç e mi soi riparât sot dal jet pe pôre. Al jere impuartant no lâ fûr di cjase. Ai 15 di Setembar, la scosse des 11 di matine me ricuardi parcè che al jere un miercus e al jere zornade di polse dal locâl. Jo o jeri alì par fâ i conts, come simpri. O soi scjampât fûr dal locâl, intal zardin daûr: timp di fâ cualchi metri e il fumarûl al è colât ju: a no plui di 50 centimetri dal gno cjâf. O ai cjapât sù dut, famee e robis, e o soi scjampât a Mestre, dongje Vignesie, indulà che a jerin i miei parincj”.
__
Cincuante agns daspò, ce pensistu?
“L’Orcolat al è stât une esperience di no crodi, impussibil di dismenteâ. Ancje cumò, se si sint une scosse piçule, il pinsîr al va al 1976 e la sgrisule e je simpri tante”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::
Campionât di balon cjargnel 2026: si tache in Avrîl
La stagjon dal balon in Cjargne e tache ai 18 di Avrîl cu la finâl di Super Cope. Intal stadi di Damâr, une cuintri chê altre, Cjavaç e Cedarcjis si zuin il trofeu. Daspò di chest apontament, al tache il campionât: 38 scuadris, trê categoriis, cetante passion par une competizion che e je une vore particolâr. Il campionât cjargnel al è l’unic torneu che si zuie vie pe Istât, afiliât ae Federazion taliane dal Balon. ❚
