Pe prime volte inte sô storie,
la scuadre dal president Arduino Pattaro
e zuiarà intal torneu interregjonâl
Cuant che intal stadi di Monfalcon l’arbitri al à sivilât trê voltis, ae fin de partide cuintri il Pordenon, ducj i tifôs rivâts di Mortean a àn cjalât il cîl e a àn tacât a fâ fieste. Da rest, chei di Mortean a son usâts a cjalâ adalt: il tor plui alt de Italie al è l’esempli miôr de voie de comunitât di rimpinâsi in grandece. Sabide ai 16 di Mai dal 2026 e je stade une zornade storiche pal balon morteanot.
Su la jerbe dal stadi Morin, inte citât dai cantîrs, la LME e à batût il Pordenon par 2-1, vincint il campionât di Ecelence, il nivel massim di competizion regjonâl in Friûl -Vignesie Julie, metint te sachete il biliet par lâ sù in Serie D, ven a stâi il campionât che al è il prin nivel dai professioniscj.
Graciis al sburt dal president Arduino Pattaro, in sîs agns la scuadre che e rapresente lis comunitâts di Mortean e Lavarian e à dismenteât lis dificoltâts dal vivi tal anonimât de Prime categorie, cence tantis ambizions. Vuê, invezit, dopo cetante fature tal lâ indenant, e je une des clapis sportivis plui preseadis dal balon regjonâl.
Il non, LME, al vûl clamâ lis iniziâls di Lavarian, Mortean e Esperia, lis trê societâts che, agns indaûr, a jerin ativis tal balon di chel teritori. Massime la rivalitât che e je simpri stade fra i paîs di Mortean e di Lavarian, e à causât cetancj problemis intal meti dongje lis dôs animis. Zontâ ancje la Esperia al è stât l’unic mût par lâ indenant, dîs agns indaûr.
Cuant che, intal 2020, al someave che la clape e ves di sierâ par mancjance di risorsis, al è rivât Arduino Pattaro, impresari e industriâl cun cetante disponibilitât a dâ une man par tignî vîf il balon morteanot. Di chê volte, intal an dal Covid, la societât e je stade tirade sù in pôc timp de Prime categorie. Daspò, cuatri stagjons in Promozion, ducj di protagoniscj prime dal salt in Ecelence, cun Riccardo Migliore sentât inte bancjute blancje e rose tai ultins mês, dopo che Amedeo Russo al veve tacade la stagjon come alenadôr.
Cumò, cun dome une stagjon in Ecelence, e rive la Serie D. Vinçude cun Andrea Barbieri come alenadôr, sentât indulà che, fin ai prins di Otubar dal 2025, al jere ancjemò Migliore.
“Chest al è un sucès storic – al à dit Pattaro ae fin de partide di Monfalcon –, alc che al va une vore plui lontan des nestris spietis plui salvadiis dal inizi di chest cicli. Doi agns indaûr o vin festezât la promozion in Ecelence e vuê o sin intal Interregjonâl. Un risultât che al premie la planificazion, il lavôr cidin e l’impegn cuotidian di une clape di personis straordenaris. O vin vint un campionât dopo jessi rivâts insom cui stes ponts di une scuadre cetant fuarte e preseade come il Pordenon. Cun di plui, rivâ a vinci une finâl, intune partide secje, a Monfalcon, denant di doi mil personis, al vûl dî che la scuadre e à il caratar just: sedi i zuiadôrs, sedi i tecnics e ducj chei che a lavorin pe LME. O vin scrit une pagjine di storie dal balon morteanot che nissun al rivarà a scancelâ e no si podarà dismenteâ”.
_
Di cui sono i merits?
“O ai voie di impiâ une lûs grande come il tor di Mortean – al va indenant il president – sui merits dai zuiadôrs e dal alenadôr. A àn savût frontâ la pression di une sfide une vore faturose, zuiant simpri cun calme e concentrazion. Ancje cuant che o vin pierdût alc pe strade, cualchi pont, cualchi gol, la fiducie no je mai mancjade”.
_
Cumò si scuen meti adun un progjet pe Serie D: pe prime volte, Mortean al rive intal Interregjonâl.
“La Serie D – al conferme Pattaro – e je un nivel competitîf gnûf par dute la nestre clape. Un campionât semiprofessionistic che al domande struturis, invistiments e une organizazion nete e sclete. O gjoldìn la fieste ancjemò par cualchi zornade, dut câs il cjâf al è bielzà indreçât a cemût inmaneâ la scuadre. Di une robe o vin di jessi ducj sigûrs: no fasarìn mai il pas plui lunc de gjambe”.
_
Isal alc di cjalâ come model?
“O vin voie di tirâ sù un model di societât – al conte Arduino – fondât su la sostignibilitât e la valorizazion dai zovins, come che al è simpri stât di cuant che o soi president. La volontât e je chê di usâsi a la svelte ae gnove categorie, cui pîts ben plantâts par tiere e cu la identitât che nus à sburtât fin achì”.
_
A pet di cinc agns indaûr, la LME ise propit une clape dal dut diferente?
“Il non de societât – al finis Pattaro –, in dì di vuê, al è simpri LME, ma nol bisugne plui intindilu come acronim di Lavarian Mortean Esperia. E je propit une gnove identitât, tirade sù parsore des divisions che a son stadis timp indaûr. Une scuadre che e vûl jessi la rapresentazion di un teritori no pues jessi simpri peade a ce che al è stât e che cumò nol è plui. O vin voltade la pagjine e o pensìn a ce che al vignarà”. ❚
:::::::::::::::::::::::::::::::::::::::::::::::::::::::::::::::::::::::::::::
Doi campionâts vinçûts in doi agns, un daûr di chel altri.
Dopo cuatri stagjons in Promozion,
in 24 mês un salt di no crodi
Al è dificil pensâ a une rivalitât plui becantine intun teritori comunâl, come chê che si vîf jenfri Mortean e Lavarian. Mortean al è il cjâf lûc, al à il cjampanili e il domo, al è famôs pe blave, pal pali dai Turcs, pes rivis dal Cormôr, pal marcjât dal Miercus di matine…
◆ Lavarian e je la frazion, cu la Tor milenarie, lis vilis, i portons di etis passadis, la agriculture, il marcjât di dutis lis secondis Sabidis di ducj i mês. Un borc che al à simpri vude la voie di jessi cognossût par ce che al è e no dome par jessi sotan di Mortean.
◆ E pensâ che Cjasielis, chê altre frazion, e à vude une scuadre di balon in Serie A femenine, cumò e à une struture indulà che si pues zuiâ di golf. Dut câs, se no rivave la fusion fra lis realtâts sportivis dal balon dal teritori, si varès sfantât dut.
◆ Un dai prins merits dal president Arduino Pattaro al è stât chel di jessi rivât a meti adun dut, cun risorsis impuartantis e cetante passion pal balon. Cuatri agns di assestament in Promozion, e po intai ultins doi agns la rimpinade e je stade maraveose. Vinçût il campionât 2024/25, intun an la LME e à savût vinci ancje la Ecelence, cun zuiadôrs di alte categorie e une vuide fuarte e stabile.
◆ Intal 2026/27, la scuadre di Mortean e zuiarà intal stes campionât dal Cjarlins Muçane, dal Brian Lignan e de Triestine, cul svant di vê meretât di jessi culì e la determinazion di no jessi contade come un lamp che si distude a la svelte. ❚
:::::::::::::::::::::::::::::::::::::::::::::::::::::::::::::::::::::::::::::
Une bataie fin tal ultin cuintri Pordenon e ufm: a Monfalcon il sucès decisîf
La vitorie par 2-1 cuintri dai neris
e verts di là da la Aghe e à gjavât
il tapon ae fieste
E vignive jù une ploiute fine sul stadi “Sergio Morin” di Monfalcon, ai 16 di Mai stât. Dut câs al faseve une vore cjalt tes tribunis, cui tifôs di LME e Pordenon che a tignivin pes dôs scuadris, sberghelant ce che a rivavin.
◆ Al minût 37, il portîr dal Pordenon, Marco Meneghetti, al à scugnût lassâ la gare par un infortuni, e al è lât in puarte il secont, Andrea Mason. Dîs minûts plui indenant, l’argjentin de LME, Ivan Fabricio Bolgan, che al jere stât ancje al Pordenon, al à trat un tîr cetant fuart, in diagonâl, che al à puartât al 1-0.
◆ Intal secont timp la tension e à causât la espulsion dal mister Barbieri, par protestis cuintri dal arbitri. Dut câs, al 64′, une biele zuiade di Eric Lirussi, forsit un dai zuiadôrs plui di talent dai morteanots, al à lassade une biele bale a Enrico Ruffo che al à vît mistîr tal segnâ il 2-0.
◆ Ancjemò cinc minûts e il Pordenon, cuntun gol une vore biel di Simone Toffoli, al à fat viodi di no vê nissune voie di molâ. Fintremai che l’arbitri nol à sivilât trê voltis, e je stade une bataie. Ae fin la LME e à vinçût pe tierce volte in trê partidis cuintri il Pordenon: alc al volarà ben dî. ❚
