In Slovenie chest an si celebrin i 145 agns dal principi dal cooperativisim. Lis primis cooperativis a son stadis fondadis di fat za inte seconde metât dai Votcent, cuant che – inte zone di Tolmin e in chê tor di Bohinj – a son stadis istituidis lis primis latariis sociâls, che ur son vignûts daûr pôc plui tart i prins istitûts di cooperatîfs di credit a Ljutomer e a Celje.
Cundut de lungje tradizion, il cooperativisim in Slovenie al è daûr a afermâsi e svilupâsi dome intai ultins dîs agns, forsit ancje par vie che lis ativitâts cooperativis a son chês che a àn savût reagjî miôr ae crisi e che si son dimostradis plui resistentis. Tantis a son fintremai nassudis tal puest di aziendis che no àn tignût bot ae crisi economiche e finanziarie che e à colpît in maniere pesante il paîs dal 2008 incà. Par ce che al tocje lis cooperativis agriculis e forestâls, che a son chês plui impuartantis di un pont di viste economic, i dâts a mostrin che dilunc de crisi a àn fintremai plui che dopleât il volum dai afârs. Cemût che a àn fat savê de Union des cooperativis de Slovenie e tant che ripuartât intun articul sul portâl de RTV Slovenija, la radio e tv di stât slovene, vuê une cooperative e prodûs in medie un volum di afârs di passe 10 milions di euros. Lis cooperativis, afiliadis ae Union, a produsin jentradis dal valôr di plui di 630 milions di euros ad an, che al corispuint al 83% des jentradis di dutis lis cooperativis slovenis.
Daûr dai dâts de Ajpes – la Agjenzie de Republiche di Slovenie pes evidencis publichis e pai servizis -, ae fin dal 2015 in Slovenie a jerin regjistradis 387 cooperativis, ativis in ducj i setôrs economics. Di pont di viste numeric, a prevalin ancjemò chês cun ativitâts comerciâls, intant che chês ativis intal setôr agricul, forestâl, itic e venatori a son 85, e tra chês 62 a son afiliadis ae Union des cooperativis de Slovenie. Il numar des cooperativis regjistradis al è però in aument costant: intal 2012 a jerin 304, 311 intal 2013 e 332 tal 2014, par citâ dome che i dâts dai ultins agns.
Lis cooperativis a rapresentin in Slovenie un anel impuartant de filiere alimentâr e il lôr rûl al risulte fondamentâl soredut inte aree rurâl, dulà che dispès a ufrissin ancje servizis di base.
Al infuartiment e ae afermazion dal cooperativisim ancje tant che valôr a àn contribuît dal sigûr lis disposizions normativis che a regolin il setôr. I rapresentants dal mont des cooperativis a stimin positive la legjislazion in materie e lis novitâts introdusudis in maniere progressive dal Stât. Al è stât facilitât l’acès a un ambient favorevul al disvilup de imprenditorie, e mioraments impuartants a son stâts metûts in vore ancje par ce che al tocje i bants publics e dut il sisteme dai incentîfs statâi e dal acès ai schemis di garanzie e di consulence. Lis cooperativis, cun di plui, a vegnin ecuiparadis dal Stât a chês altris aziendis istituidis daûr de leç su lis impresis economichis. Inte Union des cooperativis de Slovenie però a son convints che a sedin ancjemò margjins di miorament e a àn proponût za une serie di incentîfs, e tra chei cualchi disgravi fiscâl e la introduzion inte costituzion di une clausule su la impuartance dal cooperativisim e de imprenditorie sociâl. Secont l’Istitût di ricercje pe economie sociâl invezit, pas indenant si podaressin fâ stimolant la ocupazion midiant des cooperativis. Daûr dai analiscj dal Istitût, in Slovenie si continue ancjemò a cirî di produsi puescj di vore dentri des impresis classichis o cul lavôr autonom, intant che diviers paîs de Union europeane za di diviers agns a proponin politichis ocupazionâls incentivant lis personis a cooperâ.
Tjaša Gruden